Full view of a note about event related to functions/offices/roles

Note fragment 1 , Page/tab number in the source: 115

CCCLIX. Petrus Tomicki Episcopus Cracoviensis, ad petitionem executoris testamenti olim Andreae de Zythno, summam capitalem 300 florenorum cum censu annuo 8 marcarum, super villis Rudno et Garlica locatam, ab altari tituli Annuntiationis B. Mariae V. in ecclesia collegiata S. Floriani in Kleparz, dismembrat et pro mensa communi Minoris Collegii Artistarum incorporat.
Cracoviae, Anno 1532, die 20 mensis Decembris.

Note fragment 2 , Page/tab number in the source: 115

In nomine Domini, Amen. Ad perpetuam rei memoriam. Nos Petrus Thomyczki Dei gratia Episcopus Cracoviensis et Regni Poloniae Vicecancellarius, manifestum facimus tenore praesentium quibus expedit universis, praesentibus et futuris, harum notitiam habituris: quomodo in nostra personaliter constitutus praesentia venerabilis et eximius utriusque Iuris Doctor, dominus Gregorius de Schamotuli poenitentiarius ecclesiae nostrae cathedralis Cracoviensis, et honorabilis olim Andreae de Zythno vicarii perpetui et poenitentiarii nostrae cathedralis ecclesiae Cracoviensis praedictae, testamenti executor, nobis humiliter supplicavit, ut pium desiderium praefati olim Andreae de Zythno testatoris adimplere et debitae executioni demandare, capellaniam perpetuam seu altare tituli Anuntiationis gloriosae Virginis Mariae in ecclesia collegiata Sancti Floriani in Cleparz, dismembrare, et ab eodem altari censum octo marcarum et summam capitalem Trecentorum florenorum apud nobilem Stanislaum Narembski in villis Rudno et Garlicza, in districtu Cracoviensi consistentibus, in vim reemptionis per praefatum testatorem et Annam Lenarthowa civem de Cleparz pro augmentando censu altaris praedicti emptum, inscriptum et obligatum, pro mensa communi Collegii minoris dominorum Artistarum convertere, unire, annectere et incorporare dignaremur. Cuius supplicationibus piis et iustis desideriis annuere cupientes, modumque et formam in si-

Note fragment 3 , Page/tab number in the source: 116

milibus teneri solitam observare volentes, literas citationis nostrae in vim Cridae ante omnia duximus praemittendum. In quarum termino hodierno, in contumaciam citatorum non comparentium, et cur praemissa fieri non debeant, nihil penitus opponentium, capellaniam praedictam seu altare, iustis et rationabilibus causis nos ad id moventibus, dividendam et dismembrandam, censumque octo marcarum praedictum cum eius summa capitali, pro mensa communi Collegii minoris dominorum Artistarum convertendum, uniendum, annectendum et incorporandum duximus, prout dividimus, dismembramus, convertimus, unimus, annectimus, incorporamus, ascribimus et appropriamus in Dei nomine per praesentes perpetuo et in aevum, et hoc de expresso consensu venerabilium dominorum Praelatorum et Canonicorum ecclesiae collegiatae Sancti Floriani et famatorum Proconsulis et Consulum civitatis Cleparz, praedicti altaris patronorum, volentes et decernentes, ut praedictum octo marcarum censum Collegiati minores iure dominii et proprietatis habeant, teneant et possideant in communi, iliumque non in alium usum, nisi pro communi mensa sua convertant et exponant, convertereque et exponere teneantur. Missas tamen et onera praedicti altaris secundum proportionem census octo marcarum praefati, quae in literis erectionis reverendissimi olim in Christo patris domini Ioannis Conarski eadem gratia Episcopi Cracoviensis, praedecessoris nostri, continetur, ipsi Collegiati minores per unum de gremio suo legere et adimplere perpetuo teneantur. Quibus omnibus et singulis praemissis auctoritatem nostram ordinariam et robur impartimur tenore praesentium mediante, quas in fidem et testimonium sigilli nostri appensione iussimus communiri. Actum et datum Cracoviae in Curia nostra episcopali, Anno a Nativitate Domini Millesimo Quingentesimo tricesimo secundo, Indictione quinta, Pontificatus sanctissimi in Christo patris et domini, domini Clementis divina providentia Papae septimi anno decimo, die vero Veneris, vigesima Decembris. Praesentibus ibidem venerabilibus dominis nobilibus et discretis Georgio Myskowski utriusque luris Doctore, Cancellario Curiae, Stanislao Borek de Cracovia, Benedicto Isdbienski, Samuele Maczieyowski, Canonicis ecclesiae nostrae cathedralis Cracoviensis, Magistro Nicolao de Schadek Collegiato maiore, Sigismundo Myskowski, Petro Buzenski, Stanislao Dabinski, testibus ad praemissa vocatis pariter atque rogatis.

Note fragment 4 , Page/tab number in the source: 116

(L. S. n.) Et quia ego Nicodemus Ioannis Pczyenynski, clericus Wladislaviensis diocesis, sacra apostolica auctoritate Notarius publicus et coram reverendissimo domino Episcopo Cracoviensi praefato actorum scriba, praemissis omnibus et singulis, una cum praenominatis testibus praesens interfui, eaque sic fieri vidi et audivi: ideo praesens publicum Instrumentum manu mea fideliter scriptum, subscripsi, signoque et nomine meis solitis, ac appensione sigilli praefati reverendissimi domini Episcopi communivi, in fidem praemissorum requisitus.

Comment to note fragment:
(Ex archetypo membranaceo, cuius sigillum pensile avulsum. — Nr. Archiv. Univ. 4358.)