Blick im Eintrag über Funktionen/Ämter/Beschäftigungen

Eintragsabschnitt 1 , Seite/Karte in der Quelle: 85

CCCXLVIII. Literae Thomae Roznowski Canonici et Officialis generalis Cracoviensis, confirmationem fundationis et ordinationis Collegiaturae Astrologiae in Universitate Studii generalis Cracoviensis, per Mathiam de Miechow Doctorem Medicinae et Canonicum Cracoviensem die 13 m. Octobris A. 1522 factae, in se continentes.
Cracoviae, Anno 1522, die 22 mensis Octobris.

Eintragsabschnitt 2 , Seite/Karte in der Quelle: 85

Thomas Roznowski Canonicus et Officialis generalis Cracoviensis, Indexque commissarius et executor ad infrascripta per reverendissimum in Christo patrem et dominum, dominum Ioannem Dei gratia Episcopum Cracoviensem modernum datus specialiter et deputatus, universis singulis quibus interest, intererit aut interesse poterit quomodolibet in futurum, praesentesque literas nostras visuris, lecturis et audituris, praesentiumque notitiam habituris, per praesentes significamus: quomodo nos certas literas Cridae una cum commissione inserta, sub titulo et sigillo praefati reverendissimi domini Episcopi Cracoviensis, nec non literas donationis Centum florenorum pro continuanda structura librariae domus Maioris Collegii dominorum Artistarum, et Centum cum triginta florenorum vel citra pro horologio et instrumentis horologii praefatae domus, ac Quatuorcenta ducatorum Hungaricalium pro Astrologo praefatae Universitatis, alias censum decem marcarum pecuniarum in praetorio Cracoviensi pro dicta summa capitali Quatuorcenta aureorum emptum, nec non duodecim marcarum in Piotrkovice dudum pro huiusmodi Astrologo consecratarum et donatarum per venerabilem et egregium virum dominum Mathiam de Myechow Artium et Medicinae Doctorem, Canonicum Cracoviensem, factae sub titulo et sigillo venerabilis viri domini Stanislai Byel de Nova Civitate Sacrae Paginae Professoris, Canonici Cracoviensis et almae Universitatis Studii generalis Cracoviensis Rectoris, nobis pro parte venerabilis et egregii viri domini Mathiae de Myechow Canonici Cracoviensis, principalis, praesentatas, sanas, salvas et integras, omnique vitio et nota suspicionis carentes, in papyro et pargameno scriptas, cum ea qua decuit reverentia recepimus et suscepimus. Quarum literarum Cridae et commissionis tenor sequitur talis:

Eintragsabschnitt 3 , Seite/Karte in der Quelle: 85

„Ioannes Dei gratia Episcopus Cracoviensis, honorabilibus viris vicariis ad Sanctam Mariam in circulo Cracoviensi, et aliis quibuscumque, tenore praesentium requirendis, salutem in Domino. Oblata nobis petitio pro parte venerabilis et egregii viri domini Mathiae de Myechow Artium et Medicinae Doctoris, Canonici Cracoviensis, continebat: quatinus certam donationem Centum florenorum pro continuanda structura librariae domus Maioris Collegii dominorum Artistarum, et Centum cum triginta florenorum vel citra pro horologio et instrumentis horologii praefatae domus, ac Quadringentorum ducatorum Hungaricalium pro Astrologo

Eintragsabschnitt 4 , Seite/Karte in der Quelle: 86

praefatae Universitatis Cracoviensis, alias censum decem marcarum pecuniarum in praetorio Cracoviensi pro dicta summa capitali Quadringentorum aureorum emptum, nec non duodecim marcarum in Pyotrkovyce dudum pro huiusmodi Astrologo consignatarum et donatarum, praefatae Universitati Cracoviensi incorporare et in omnibus ac singulis punctis, clausulis, conditionibus et ordinationibus coram nobis sub titulo et sigillo venerabilis viri domini Stanislai Byel de Nova Civitate Sacrae Paginae Professoris, Canonici Cracoviensis ac Rectoris Studii almae Universitatis generalis Cracoviensis praedictae, productis, confirmare, approbare et ratificare, ecclesiasticaeque libertati et immunitati ascribere, ac auctoritatem nostram ordinariam, pariter et decretum interponere et literas desuper necessarias dare et decernere dignaremur. Nos vero modum et formam in talibus fieri solitam servare volentes, attendentesque, ne alicui in iure suo praeiudicium facere videamur, literas citationis in vim Cridae nostras contra omnes et singulos sua communiter vel divisim interesse putantes, ad videndum et audiendum praemissa fieri, decrevimus ante omnia praemittendas, prout in Dei nomine praemittimus et damus per praesentes. Quocirca vobis dominis executoribus supradictis, praesentibusque requirendis, in virtute sanctae obedientiae et sub excommunicationis poena mandamus: quatinus vestris in ecclesiis die dominico intra Missarum et divinarum horarum solennia, alta et sonorosa voce publice proponentes, et per affixionem praesentium ad valvas ecclesiarum vestrarum omnes et singulos sua communiter vel divisim interesse putantes, et quos praesens tangit negotium seu tangere poterit quomodolibet in futurum, uno edicto pro tribus et peremtorie citetis, quos et nos tenore praesentium citamus, ut coram venerabili viro domino Thoma „Rosznowsky Canonico et Officiali nostro generali Cracoviensi, Cracoviae in domo suae solitae residentiae, feria quarta post festum Sancti Lucae Evangelistae proxima, hora audientiae consueta, ad videndum et audiendum praefatam donationem et ordinationem memoratae Universitati Cracoviensi incorporari, in omnibusque punctis, clausulis et conditionibus universis confirmari, ratificari et approbari, ac ecclesiasticae libertati et immunitati ascribi, auctoritatemque ordinariam pariter et decretum interponi, ac literas desuper opportunas sub titulo et sigillo praefait domini Officialis decerni, aut alias ad dicendum causas rationabiles, cur praemissa fieri non debeant, legitime compareant. Cui quidem venerabili domino Thomae Rosznowsky Canonico et Officiali nostro generali Cracoviensi praedicto, omnia et singula praemissa faciendum et literas necessarias desuper decernendum et dandum, duximus committendum et per praesentes committimus, certificantes eosdem sic citandos, quod sive in dicto citationis termino comparuerint, sive non, praedictus dominus Officialis ad ea, quae iuris fuerint, dante Domino, contumacia sive absentia eorum in aliquo non obstante, procedet. Datum Cracoviae, die xviij mensis Octobris, Anno Domini Millesimo Quingentesimo vigesimo secundo, nostro sub sigillo."

Eintragsabschnitt 5 , Seite/Karte in der Quelle: 86

Tenor vero literarum donationis fuit et est talis:

Eintragsabschnitt 6 , Seite/Karte in der Quelle: 86

„Magister Stanislaus Byel de Nova civitate, Sacrae Theologiae Professor, Canonicus ecclesiae cathedralis Cracoviensis, ac Rector Studii almae Universitatis generalis Cracoviensis, Ioannes Amicinus de Cracovia, Episcopus Laodicensis et Suffraganeus Cracoviensis, Iacobus de Erdzyeschow Canonicus Cracoviensis, caeterique Doctores et Magistri omnium facultatum Studii generalis Cracoviensis,

Eintragsabschnitt 7 , Seite/Karte in der Quelle: 87

notum facimus per praesentes omnibus et singulis, quibus interest, intererit, seu aliquo modo interesse poterit in futurum: quomodo venerabilis et egregius vir et dominus Mathias de Myechow Artium et Medicinae Doctor, Canonicusque ecclesiae cathedralis Cracoviensis, personaliter constitutus in stuba communi Collegii maioris Artistarum, nobis omnibus die Martis, vicesima mensis Maii, de Anno Domini Millesimo Quingentesimo vicesimo secundo , per cedulam praefati domini Rectoris rite et legitime convocatis et ad pulsum campanae congregatis, ex sua mera liberalitate et magna in Universitatem nostram pietate, in maius decoramentum et famae eius celebritatem, obtulit Centum florenos in moneta, per triginta grossos florenum computando, ad continuandam structuram librariae praefatae domus Maioris Collegii Artistarum, et alios Centum et triginta vel citra florenos etiam in moneta pro horologio et praecipue instrumentis horologii praefatae domus Maioris Collegii Artistarum, consignavit in numerata pecunia, realiterque et cum effectu dedit, donavit et reposuit donatione irrevocabili inter vivos fieri solita; praeterea Quadringentos aureos Hungaricales de pondere largo assignavit in praetorio Cracoviensi summam capitalem pro Universitate, et censum pro eis emptum decem marcarum communis monetae et numeri Polonicalis pro Astrologo Universitatis nostrae Cracoviensis, et per eundem Astrologum dictum censum decem marcarum, una cum duodecim marcis de Pyotrkowice dudum pro tali Astrologo consignatis, tollendum et percipiendum demonstravit, donavit ac admisit. Hanc tamen dictis dominis praefatis de Universitate libertatem et auctoritatem relinquendo: quod si eis condignius videbitur ex certis respectibus, poterint dictum censum adaugere, dictos aureos in communem monetam permutando. Circa quae praefatus dominus Mathias de Myechow Artium et Medicinae Doctor adiecit: quod domini Doctores et Magistri Maioris Collegii Artistarum habebunt potestatem vocandi, eligendi aliquem Magistrum vel Doctorem Astrologicae artis doctum et peritum, sic quod dicta Collegiatora adinstar aliarum Minoris Collegii Collegiaturarum amplius in optionem non cedat, sed ille duntaxat eam tenebit, quem praefati domini Doctores et Magistri utpote idoneum et magis valentiorem pro ea eligent, qui ad quindecim annos ad minus in Minori Collegio in eadem Collegiatura propter maiorem experientiam conquirendam perseverabit, nec sub alia conditione ad eam eligi debebit, et post quindecim vel plures annos qui habeat ascensum ad alias Collegiaturas Maioris Collegii, uti meritis suis exigentibus, per dominos Maioris Collegii vocatus fuerit et ipse ascendere voluerit. Si autem fuerit rebellis, excessivus, discolus vel negligens, extunc domini Doctores et Magistri praenominati ei auferre, eumque aliam Collegiaturam vacantem acceptare aut commutare cogendi habebunt potestatem. Verum si aliquando in Minori Collegio nullus Magistrorum eius facultatis idoneus et exactus Professor repertus fuerit, extunc praefati domini Doctores et Magistri, vacantia se offerente, extraneum ad Collegiaturam Astrologiae supradictae vocare poterint et eligere libere. Affectavit insuper, praefatus dominus Doctor Mathias de Myechow, ut dictus Astrologus sic electus et designatus, tribus annis continuis legeret continuando libros Iudiciorum Astrorum, videlicet Quadrupartitum Ptolomaei, Hispaliensem, Octavam partem Halihabenragel vel Guidonem Bonati de revolutionibus annorum, Centiloquium Ptolomaei, Albumazar de coniunctionibus maioribus, aut caeteros Astrologos iudiciarios, et quod quarto anno legeret Almagestum Ptolomaei postil-

Eintragsabschnitt 8 , Seite/Karte in der Quelle: 88

lando et exponendo per Almagestum abbreviatum vel per Epithomata Ioannis de Monte Regio, aut per Commentum Geber. Et finito Almagesto in duabus commutationibus vel tribus, redeat ad libros iudiciarios tribus annis legendos; et sic altematim ut legeret, quoadusque praedictam Collegiaturam tenebit. Praeterea quod talis Astrologus singulis annis scriberet et cum diligentia conficeret „maius Iudicium anni, cum multis auctoritatibus, rationibus, allegationibus et experientiis. Simile quoque faciat Iudicium maiorum revolutionum, eclipsium et cometarum, et tale daret ad stubam domus Maioris Collegii Artistarum; et etiam non inconveniens esset, quod simile daret ad praetorium Cracoviense pro dominis Consulibus, ut censum favorabilius solverent. Aliud etiam Iudicium abbreviatum, experientiis comprobatum, det in communem usum hominum. Actus etiam ordinarios in ordine suo visitet et compleat, argumenta deducendo mathematice per propositiones Quadrivii Euclidis, Ptolomaei et Perspectivae. Caetera quoque hanc facultatem concernentia, in laudem et honorem omnipotentis Dei et Universitatis celebritate ac famae ampliatione maiori cum fervore et diligentia exequatur. Ut autem ea praemissa dictus Astrologus facilius in effectum deducere possit, idem dominus Doctor Mathias de Myechow quosdam libros in librariam Maioris Collegii reponendos consignavit, et tali Astrologo secundum necessitatem ipsius mutuandos fore debere, videlicet Almagestum Ptolomaei in pergameno, in asseribus rubea cute superductum, cum quibusdam glossis et annotationibus in marginibus; item Almagestum abbreviatum et Commentum Geber super Almagestum Ptolomaei; item quindecim libros Euclidis cum commento et expositione Avaricii; item Theodosium de Sphaeris; item Messahalach de causis orbis et motus eius, Perspectivam Alaceni et caeteris in eodem libro, Planisperium, Theodosium de locis habitabilibus, Demonstrationes Iordani; item Cosmographiam parvam in tela pictam, novam, et aliam Cosmographiam etiam parvam in pergameno pictam pro tota Europa, cum gradibus coeli secundum longitudinem et latitudinem; item et tertiam Cosmographiam navigationis de Portugalia in Indiam, in magna cute pergameni etc. Postulans idem venerabilis dominus Doctor Mathias de Myechow, ut pro his omnibus beneficiis pie per Paternitatem suam Universitati nostrae concessis, Universitas nostra Cracoviensis provideret et ordinaret singulis Quatuortemporibus anni in perpetuum computandis, quando peragitur Missa Universitatis in Quatuortemporibus, legeretur una Missa pro eo, videlicet in vita ipsius pro peccatis, et post mortem pro sacerdote defuncto. Quae omnia praedicta Universitas Cracoviensis grate, imo quam gratissime suscepit, approbavit, susceperuntque ac approbarunt, et omnia se facturos promiserunt, obligando se et suos successores ad huiusmodi executionem, intentionemque Paternitatis suae reverendae in executionem ponendam se submisit et submiserunt, ac superintendere huiusmodi lecturae per praefatum Collegiatum peragendae, et punitioni per Rectorem in defectu continuationis. Datum Cracoviae, die Lunae, tredecima Octobris, Anno quo supra Millesimo Quingentesimo vicesimo secundo, Rectoratus nostri sub sigillo maiori."

Eintragsabschnitt 9 , Seite/Karte in der Quelle: 88

Post quarum quidem literarum Cridae et commissionis ac donationis praeinsertarum praesentationem et susceptionem nobis et per nos, ut praemittitur, factam, et in termino Cridae contra omnes et singulos sua communiter vel divisim interesse putantes, et quos praesens tangit negotium, seu tangere poterit

Eintragsabschnitt 10 , Seite/Karte in der Quelle: 89

quomodolibet in futurum, ut praemissum est, praemissae et debite, ut apparuit a tergo earundem, executae, comparendo coram nobis pro tribunali sedentibus Magister Nicolaus Clopoczky nomine procuratorio memorati domini Doctoris Mathiae de Myechow Canonici Cracoviensis, accusataque contumacia omnium et singulorum sua communiter vel divisim interesse putantium, citatorum legitime et non comparentium, petivit in contumaciam eorundem praenominatam et praeinsertam donationem almae Universitati Studii generalis Cracoviensis incorporari, nec non confirmari, approbari, ratificari, ecclesiasticaeque libertati et immunitati ascribi, ac auctoritatem ordinariam pariter et decretum eidem interponi, literasque necessarias decerni. Nos vero attendentes, quod iusta petentibus assensus non est denegandus, et in termino Cridae praefatae nemine contradicente, praescriptam donationem, in contumaciam omnium et singulorum citatorum et non comparentium, praenominatae Universitati Studii generalis Cracoviensis incorporavimus, et in omnibus punctis, clausulis ac conditionibus, confirmavimus, approbavimus, ratificavimus, ecclesiasticaeque libertati et immunitati ascripsimus, ac auctoritatem ordinariam pariter et decretum eidem interposuimus et literas necesarias desuper dandas decrevimus; prout in Dei nomine incorporamus, confirmamus, ratificamus, approbamus, ascribimus, interponimus, damusque et decernimus per tenorem praesentium. Quae omnia et singula vobis omnibus et singulis, ad quos praesentes nostrae literae pervenerint, intimamus, insinuamus, ratificamus ac ad vestram et cuiuslibet vestrum notitiam indubitatam deducimus et deduci volumus per praesentes, decernentes, ut his nostris literis ubique plenaria fides adhibeatur. In quorum omnium et singulorum praemissorum fidem et testimonium, praesentes nostras literas per Notarium publicum et causarum, factique praesentis coram nobis scribam scribi, subscribi, publicari mandavimus, nostrique sigilli iussimus et fecimus appensione communiri. Actum et datum Cracoviae in domo nostrae solitatae residentiae, Anno Domini Millesimo Quingentesimo vigesimo secundo, Indictione decima, Pontificatus sanctissimi in Christo patris et domini, domini Adriani divina providentia Papae sexti anno primo, die vero Mercurii, vigesima secunda mensis Octobris. Praesentibus ibidem vonerabilibus et honorabilibus dominis Doctore Martino Belze de Cracovia, surrogato, Alexio de Cracovia, Legniciensis et Opoliensis ecclesiarum Canonico, Stanislao Machnatsky, Nicolao Clopoczky, Iacobo de Pobyedzysky, Ioanne Dlusky, Mathia Mlynsky, Ioanne Cowalowsky, Francisco Russoczky, Stephano Bloczky, Ioanne Plaza, publicis et Consistorii nostri Notariis, testibus ad praemissa.

Eintragsabschnitt 11 , Seite/Karte in der Quelle: 89

(L. S. n.) Et ego Bartholomaeus Mathiae de Costen, clericus Poznaniensis diocesis, publicus sacra auctoritate apostolica Notarius et coram memorato domino Thoma Rosznowski Canonico et Officiali generali Cracoviensi, Iudiceque commissario ac executore ad id specialiter deputato, causarum et facti praesentis scriba, quia productarum literarum Cridae, commissionis et donationis praeinsertarum praesentationi et susceptioni, incorporationisque et confirmationis petitioni ac praesentium decreto, aliisque omnibus et singulis praemissis, dum sic ut praemittitur, fierent et agerentur, una cum praescriptis et praenominatis testibus praesens interfui, eaque omnia et singula sic fiieri vidi et audivi: ideo hoc praesens publicum Instrumentum literas confirmationis

Eintragsabschnitt 12 , Seite/Karte in der Quelle: 90

in se continens, mann alterius scriptum, exinde confeci et in hanc publicam formam redegi, signoque et nomine meis solitis consignavi et praelibati domini Iudicis sigilli appensione communivi, in fidem omnium praemissorum rogatus et requisitus.

Bemerkungen zum Eintragsabschnitt:
(Ex archetypo membranaceo, cum sigillo parvo cereo rubro, taeniola membranacea appenso. — Sigillum exhibet insigne Nowina dictum, in scuto, cum attrita et illegibili inscriptione. — Nr. Archiv. Univ. 348.)