Pełny podgląd zapiski o zdarzeniu dotyczącym pełnionych funkcji/urzędów/ról

Fragment zapiski 1 , Numer strony/karty w źródle: 52

CCCXXXIII. Ioannes (Lubrański) Episcopus Posnaniensis, Ioanni Episcopo Cracoviensi libertationem Universitatis Studii generalis Cracoviensis a contributionibus, in Synodo provinciali Lanciciensi decretam, notificat.
Lanciciae, Anno 1514, die 29 mensis Augusti.

Fragment zapiski 2 , Numer strony/karty w źródle: 52

Reverendo in Christo patri et domino Ioanni Dei gratia Episcopo Cracoviensi magnopere honorando, Ioannes eadem gratia Episcopus Posnaniensis et reverendissimi in Christo patris et domini, domini Ioannis Dei gratia sanctae ecclesiae metropolitanae Gnesnensis Archiepiscopi et Primatis Regni Poloniae, locum tenens in Synodo provinciali Lanciciensi, pro festo divi Augustini per nos de speciali commissione et mandato eiusdem instituta, in absentia suae reverendissimae Paternitatis, in Curia Romana, videlicet in Concilio generali ex parte Regni Poloniae protunc Nuntio existente, tenore praesentium significamus: quomodo in eadem Synodo provinciali per nos celebrata, assistentibus nobis reverendissimo ac reverendissimis fratribus nostris, videlicet domino Erasmo eadem gratia Episcopo Plocensi, caeterisque dominis Abbatibus, Praepositis, Decanis, Cantoribus, Custodibus, Praelatis et Canonicis, ac omnium Capitulorum totius provinciae Gnesnensis nuntiis, cum mandatis sufficientibus in eadem Synodo sancta personaliter comparentibus, constituti personaliter venerabiles ac egregii viri, domini Magistri Stanislaus Biel de Nova Civitate Sacrae Paginae Professor, Custos ecclesiae Sancti Floriani collegiatae extra muros Cracovienses, Ioannes de Skawina Canonicus Scarbimiriensis et Nicolaus de Koprzywnica Consul Cracoviensis, luris pontificii Doctores, Lectoresque ordinarii eiusdem, speciales nuntii seu oratores a reverendis, venerabilibus ac egregiis viris dominis Rectore, Doctoribus et Magistris almae Universitatis Studii generalis Cracoviensis ad eandem sacram Synodum cum sufficienti mandato, literisque credentialibus missi, et ibidem coram nobis et memoratis dominis Episcopo Plocensi, Abbatibus, caeterisque Praelatis et Canonicis, nuntiis capitularibus omnium ecclesiarum cathedralium totius provinciae Gnesnensis, tunc synodaliter congregatis, privilegium libertationis de non solvenda contributione de beneficiis eorum, qua ratione suarum obtinent Collegiaturarum, per reverendissimum in Christo patrem Andream Rosam felicis recordationis sanctae ecclesiae Gnesnensis Archiepiscopum et Primatem Regni Poloniae eis eorumque Universitati praedictae gratiose concessae, videlicet reverendissimi patris, caeterorumque dominorum Episcoporum in eisdem literis tunc expressorum cum consensu; aliud vero privilegium confirmationis et approbationis libertationis eorum praedictae, sub titulo et sigillo reverendissimae Paternitatis vestrae; et postremo literas sanctissimi in Christo patris et domini nostri, domini Leonis divina providentia Papae decimi feliciter mo-

Fragment zapiski 3 , Numer strony/karty w źródle: 53

derni, eiusque bulla plumbea in cordula canapi more Romanae Curiae, salvas, sanas et integras, suppendente, confirmationis ac denuo concessionis de et super non solvenda contributione praedicta, exhibuerunt et reproduxerunt, asserentes, quomodo eadem Paternitas vestra reverendissima cum suo Capitulo praefatis eorum iuribus, libertationibus et privilegiis minime attendentes, contributiones ab eisdem dominis Doctoribus et Magistris, contra eorum privilegium libertationis etiam per eandem reverendissimam Paternitatem, literisque eiusdem patentibus approbatum et ratificatum se habere volentes, ipsos ad solvendum et ex eisdem extorquendum per censuras ecclesiasticas nitebantur, contra praedicta eorum iura et libertates ac privilegia, ipsis dominis Doctoribus et Magistris, eorumque Universitati praedictae, per olim dominos Principes Regni Poloniae Reges benignos eiusdem Universitatis fundatores et dotatores concessa et subsequenter per Sedem Apostolicam confirmata et approbata, prout praedicta iura seu privilegia ipsorum id ipsum elucidant et testificant. Supplicaverunt itaque nobis et memorato domino Episcopo Plocensi, nec non Abbatibus, Praelatis, caeterisque dominis Canonicis, nuntiis in eadem sacra Synodo congregatis: quatenus ipsos et eorum Universitatem praefatam circa praedicta eorum iura et privilegium, sicut praemissum est, dictae eorum Universitati gratiose concessa ac per Sedem Apostolicam confirmata, ac denuo concessa, conservare dignaremur. Nos vero cum praefato reverendissimo domino Episcopo Plocensi ac memoratis dominis Abbatibus, Praelatis, Canonicis, nuntiisque Capitulorum ecclesiarum tam cathedralium, quam conventualium totius provinciae Gnesnensis, matura deliberatione ac tractatu sufficienti intra nos praehabitis, attentoque etiam eo: quod memorati domini Doctores et Magistri in dicta alma Universitate Cracoviensi personaliter residentes et per se actu laborantes, pro commodo rei publicae insudant, in eorumque beneficiis, quae ratione suarum obtinent Collegiaturarum, vix subsistere possunt: ipsos et eorum quemlibet coniunctim et divisim, et generaliter Universitatem totam circa eorum iura, privilegia, libertates, ad instar Bononiensis, Paduanae et aliarum Universitatum Studiorum generalium, conservare volentes, praedicta eorum iura et privilegia confirmavimus, approbavimus, ratificavimus, confirmamusque, approbamus et ratificamus, ac manutenendum decernimus, ac a contributionibus seu collectis quibuscunque, laudatis et laudandis in posterum, quantum etiam est in nobis, absolvimus et libertamus per praesentes. Vobis itaque reverendissimo in Christo patri et domino Ioanni eadem gratia Episcopo Cracoviensi una cum Capitulo eiusdem, ac collectoribus a vobis datis et deputatis, aut in posterum dandis et deputandis, nunc et pro tempore existentibus, in virtute sanctae obedientiae et sub ecclesiasticis censuris ac synodalibus poenis in contravenientes per iudicem competentem promulgandis seu imponendis, authoritate synodali nobis concessa et qua fungimur in hac parte, praecipimus et mandamus, ac eisdem inhibemus: quatenus deinceps et peramplius a memoratis dominis Doctoribus et Magistris in Universitate Cracoviensi residentibus, personaliter et per se laborantibus, seu de beneficiis, quae ratione earum Collegiaturarum obtinent, contributiones, exactiones et collectas quascunque laudatas quomodolibet vel in posterum laudandas, statutas et statuendas, non exigatis vel exigendas faciatis, seu super eisdem contributionibus tam praeteritis quam praesentibus et futuris, eosque per se vel per alium quovis colore quaesito inquietare, molestare et impedire minime praesumatis, sed potius eos et eorum quemlibet plenarie et libertate praedicta gau-

Fragment zapiski 4 , Numer strony/karty w źródle: 54

dere permittatis. In quorum omnium et singulorum fidem et testimonium praemissorum, praesentes literas per publicum nostrum Notarium et facti huiusmodi scribam, in scriptum scribi et subscribi, nostrorumque sigillorum iussimus appensione communiri. Actum et datum Lanciciae in Synodo provinciali, per nos ex commissione memorati reverendissimi domini et domini Archiepiscopi Gnesnensis et Primatis Regni Poloniae celebrata, Anno Domini Millesimo Quingentesimo quatuordecimo, Indictione secunda, Pontificatus sanctissimi in Christo patris et domini, domini Leonis divina providentia Papae decimi anno ipsius secundo, die vero Martis, vigesima nona mensis Augusti, in ecclesia parochiali tituli Sancti Andreae Apostoli gloriosi, intra muros Lancicienses, dioecesis Gnesnensis ibidem sita. Praesentibus ibidem venerabilibus et egregiis viris dominis Nicolao de Brolec Archidiacono Polthoviensi, Canonico Plocensi, Stanislao Strzelec Posnaniensi et Plocensi Canonico, Michaele Lublinensi Custode Curniciensi et Canonico Lovicensi, Decretorum Doctoribus, Nicolao de Domanikow Officiali, Ioanne Hardum, Canonicis ecclesiae collegiatae Lanciciensis, Laurentio de Wieliczka actu presbytero, ac me Alberti Mathia de Raudzino clerico Posnaniensi, decretorum imperiali authoritate Notario publico, et aliis compluribus testibus fide dignis, ad praemissa omnia et singula praesentialiter adhibitis.

Komentarz do fragmentu zapiski:
(Ex copia saec. XVIII. exarata in libro manuscripto: „Iura et privilegia Universitatis — Nr. Archiv. Univ. 44, pag. 180.)