Full view of a note about event related to functions/offices/roles

Note fragment 1 , Page/tab number in the source: 9

CCCXVI.. Sigismundus de Targowisko Vicarius in spiritualibus generalis Cracoviensis, testamentum ultimae voluntatis Alberti de Szamotuły (dicti Kripa) Medicinae Doctoris et Professoris, die 21 m. Septembris A. 1502 conditum, approbat.
Cracoviae, Anno 1507, die 31 mensis Iulii.

Note fragment 2 , Page/tab number in the source: 9

Sigismundus de Thargovisko Decretorum Doctor, Custos Sandomiriensis, Canonicus et in spiritualibus Vicarius generalis Cracoviensis, significamus tenore praesentium quibus expedit universis: quomodo honorabilis Magister Leonardus de Dobsicze Collegiatus Maioris Collegii Artistarum Studii Cracoviensis ac executor testamenti olim egregii viri Alberti de Schamotuli Medicinae Doctoris nuper vita functi, suo et aliorum suorum coexecutorum nominibus cavendo de ipsorum ratihabitione, manu dicti testatoris conscriptum et coram nobis productum, debita cum instantia supplicavit, quatenus ipsius testamentum in omnibus et singulis punctis, clausulis et conditionibus universis confirmare, approbare et ratificare dignaremur. Nos in talibus formam iuris servando, literas Cridae contra sua interesse putantes dandas decreveramus. Cuius quidem testamenti tenor, de quo supra fit mentio, sequitur et talis est:

Note fragment 3 , Page/tab number in the source: 9

„Quia nihil certius morte, nil vero hora mortis magis dubium, pendet namque libere mors et vita mortalium e manibus Dei: quare parati esse debemus, quia qua hora non putamus, filius hominis veniet. Ego itaque Albertus de Schamotuli Maioris Collegii Collegiatus Cracoviensis, aliis sacri eloquii adhortationibus admonitus, volui fore rebus meis providendum, si dominus Deus mihi vitam adimere velit. Imprimis contestando me mori in fide catholica Romana et sub sacra eius obedientia, domino Deo tradendo hanc obscoenam, foedam, multisque peccatis inspersam animam; corpus vero hoc sordidum et miserum humi devoveo, curandum„que etiam dominis executoribus peto, concedens eis omnimodam potestatem super meis relictis facultatibus. Hi itaque dispensent pro anima mea, sicut et ipsi aliquando pro sua optabunt. Executores vero hi sint: dominus Doctor Martinus de Cracovia Decanus ecclesiae Sancti Floriani, dominus Magister Stanislaus Biel praeceptor et institutor meus diligens, Canonicus eiusdem ecclesiae, Magister Blasius de Casimierz, aut Magister Leonardus de Dobsicze. Vos itaque causa Dei oro et obsecro, suscipiatis executionis onus, et relinquo vobis in paratis Du„centos quinquaginta et sex florenos in auro; in debitis vero apud fratrem, meum germanum Ioannem quinquaginta florenos in auro, quos ei detis, si quid dominus Deus in me permiserit, et petatur, ut sit memor animae meae. Apud dominum Doctorem Thomiczki Cancellarium illustrissimi et reverendissimi, quadraginta florenos Hungaricales in auro. Apud dominum Ioannem magnificum filium domini

Note fragment 4 , Page/tab number in the source: 10

Palatini Wilnensis, quadraginta florenos Hungaricales in auro. Domus Collegii maioris obligatur in dimidia quarta decima marca, vel modico citra vel ultra; regestra tamen in ladula sunt desuper. In theloneo duo quartalia, tertium currit distribuendo; distribuenda notata in alia cedula, quid alicui dandum sit; recollectis „aliis debitis, vos dominos patres et benefactores, dominos executores oro et obsecro, faciatis, ut dominus Deus inspirabit gratiam, eleemosynas et pia opera pro peccatrice anima mea. Et ego pro tam pietatis in me opere facto, dominum Deum pro salute animae et coporis vestra orabo. Vos et me domino Deo commendo, sitis memores animae meae, ut et vobis id ipsum fieret. Datum Cracoviae, ipso die Sancti Mathaei 1502. Albertus manu propria. Hospitale Scolarium, oro, in respectu habeatur, tribuatur ei iuxta arbitrium. Regestrum super rebus Magistri Alberti de Schamotuli: Est Schuba sabellina, nigro adamasco superducta, hanc fratri Ioanni meo germano daretis. Est et mardurina nova, hanc patri mitteretis. Sunt duae Camchae: una viridis et glauci coloris, hanc sorori germanae mitteretis. Est et alia cortina de Camcha blauea, subducta tela, hanc uxori fratris mei Ioannis daretis. Est et tertia nigra et rubea, hanc alicui pauperi ecclesiae tribuatis. Est ciphus argenteus latus, hunc fratri germano detis. Est et altus tenuis, hunc cum alio argento pro ampulis aut alio ornamento ecclesiastico detis. Est et argenteus picarius, hunc Magistro Stanislao Biel praeceptori meo et institutori charissimo daretis. Item pallium brunaticum et Czamleth aliud nigrum, haec vendatis. Caputia tria, brunaticum, blaueum, nigrum alicui Baccalario pauperi tribuatis; alia duo vendatis aut alicui Magistro detis sacerdoti, qui legat tricesimam. Sunt duae cortinae pictae, unum tapete, duo scamnalia, tres Nobli aurei: haec domini executores inter se dividant. Sunt duae mensae, una detur Crispo servo meo, alia convertatur pro voto dominorum executorum. Omnia lectisternia, manutergia, mappae, linteamina, pro eodem dentur. Sunt quatuor annuli aurei: unus sorori mittatur, alter uxori fratris Ioannis germani, alii duo aut vendantur, aut dentur pro deauratione alicuius in ecclesiam pauperem. Est Ioppa de adamasco rubeo, detur fratri. Sunt tres ulnae adamasci nigri, detur pro ecclesia paupere, aut vendatur et pecuniae dentur pro necessitate. Sunt fibulae tredecem deauratae, vendantur. Est alia magna pomum ambrae, detur Magistro meo Biel. Sunt scutellae stanneae duae, dentur servo Crispo, et duo cantari; alia dividant inter se executores. Lavatorium stanneum aut pelvis Crispo detur. Mortarium etiam detur alicui ex amicis. Pulvinaria duo Crispo dentur. Est faciletum margaritis et auro inter contextum, pro ornamento altaris detur. Peplum de Kithaika vendatur. Cum auro adamascum aut athlass, quod ex domino Boner recipietis, pro casula et (d)almaticis, si supererit. Venditis rebus et collecta pecunia, facietis pro anima mea secundum arbitrium vestrum. Rogo tamen, habete respectum in ecclesiam Sanctae Mariae in Arenis, ecclesiam Sancti Marci, super pauperes hospitalis Sanctae Heduigis et super pauperculas virgines Sanctae Agnetis. Domui Collegii maioris emeretis clenodium argenteum viginti quinque florenorum; Gregorio vero quinque florenos pro promotione. Libros quibus non indigeret Crispus, nepoti meo „servaretis, alias filio sororis, aut filio fratris. Oro tamen imprimis, ut ex eadempecunia sic collecta conveniretis aliquem devotum clericum, non presbyterum, ut oraret horas canonicas per duos annos, propter negligentias meas, quas miser peregi et indignus. Crispo famulo darentur decem floreni, Felici Baccalario quin-

Note fragment 5 , Page/tab number in the source: 11

que, si et in quantum velit promoveri. Tabardum et caputium, mitra sabellina daretur Magistro Blasio; Horologium, cuius sedes est argentea, Doctori Martino. Alia singula, ut dominus Deus dabit gratiam et inspiraverit, peragetis. Vos et me domino Deo commendo. Albertus manu propria.“

Note fragment 6 , Page/tab number in the source: 11

Post cuius quidem testamenti praeinserti praesentationem et ad nos receptionem, fuimus per memoratos executores in termino literarum Cridae, debita cum instantia petiti et requisiti, quatenus in contumaciam citatorum non comparentium, huiusmodi testamentum in omnibus et singulis punctis, clausulis et conditionibus universis approbare, ratificare et confirmare, auctoritatemque ordinariam pariter et decretum interponere dignaremur. Nos vero Sigismundus Vicarius praefatus, dictis sic citatis ultra horam solitam diutius expectatis et minime comparentibus, testamento huiusmodi sufficienter examinato et per certos testes mediis eorum iuramentis, videlicet Magistrum Martinum de Ilkusch et Gregorium de Iaroslaw Baccalarium, manum dicti testatoris recognoscentibus, huiusmodi testamentum tanquam officiosum, in omnibus et singulis punctis, clausulis et conditionibus universis duximus approbandum, ratificandum et confirmandum, auctoritatemque ordinariam pariter et decretum interponendum, prout approbamus, ratificamus et confirmamus, auctoritatemque ordinariam pariter et decretum interponimus, decernentes, ipsum et omnia in eo contenta robur perpetuae firmitatis obtinere. In quorum omnium praemissorum fidem et testimonium, praesentes nostras literas Notario nostro infrascripto scribi, subscribi et publicari, sigillique nostri legitima appensione fecimus et mandavimus communiri. Acta sunt haec Cracoviae, ultima Iulii, Anno Domini Millesimo Quingentesimo septimo. Praesentibus ibidem Nicolao de Casimiria, Ioanne Volski, Alexio de Gracovia et Ioanne Choienski ac Andrea Gomolinski Notariis publicis.

Note fragment 7 , Page/tab number in the source: 11

( L. S.n.) Et ego Martinus Mathiae de Garvolin, clericus diocesis Posnaniensis, sacra auctoritate apostolica Notarius publicus et memorati domini Vicarii scriba, quia praedictis testamenti exhibitioni, confirmationis petitioni et praesentium literarum decreto, aliisque omnibus et singulis praemissis, dum sic ut praemittitur, agerentur et fierent, una cum praenominatis testibus praesens interfui, eaque omnia et singula praemissa sic fieri vidi et audivi: ideo praesens publicum confirmationis testamenti Instrumentum manu mea scriptum exinde confeci et publicavi signoque et nomine meis solitis et consuetis consignavi, in fidem praemissorum rogatus et requisitus.

Comment to note fragment:
(Ex archetypo membranaceo, cum sigillo cereo rubro, taeniola membranacea appenso. Sigillum exhibet insigne Tarnawa dictum, in scuto, cum sequenti in ambitu inscriptione literis maiusculis sic dictis italicis exarata: SIGISMVNDVS D. TARGOVISKO VICARIVS ET CANC9 CRA.—Nr. Archiv. Univ. 12,611.)