Full view of a note about event related to functions/offices/roles

Note fragment 1 , Page/tab number in the source: 222

CCCV. Literae monitoriales Laurentii de Ostrow Decani Vielunensis, in causa Magistrorum Universitatis studii Cracoviensis contra Nicolaum de Kurozwanki Palatinum Lublinensem, ratione solutionis expensarum processus.
In Vielun, Anno 1504, die 9 mensis Februarii.

Note fragment 2 , Page/tab number in the source: 222

Laurentius de Ostrow Decanus ecclesiae collegiatae Beatae Mariae in Vielun, Iudex appellationis commissarius ad infrascripta unacum certo in hac parte collega, cum illa clausula „Quodsi non ambo“ etc., auctoritate reverendissimi in Christo patris domini Petri miseratione divina tituli Sancti Ciriaci in Thermis sacrosanctae Ecclesiae Romanae Presbyteri Cardinalis, sanctissimi olim in Christo patris et domini, domini Alexandri divina providentia Papae sexti, ac ipsius, dictaeque Sedis in Regno Poloniae, Ungariae, Bohemiae, Russiae, Livoniae, Lythwaniae, Valachiae, Sleziae etc. cum potestate Legati de latere, causae et partibus infrascriptis specialiter datus et deputatus, universis et singulis dominis Abbatibus, Prioribus, Praepositis, Decanis, Archidiaconis, Scolasticis, Cantoribus, Thesaurariis, Custodibus, Sacristis tam cathedralium quam collegiatarum metropolitanae Gneznensis et Cracoviensis, Canonicis, parochialium ecclesiarum rectoribus seu loca tenentibus, earundemque plebanis, viceplebanis, capellanis, curatis et non curatis, vicariis perpetuis, altaristis, caeterisque presbyteris, clericis, Notariis et Tabellionibus publicis quibuscumque per civitates, Gneznensem, Cracoviensem, Plocensemque dioceses ac alibi ubilibet constitutis, et eorum cuilibet in solidum, ad quem vel ad quos praesentes nostrae literae pervenerint, salutem in Domino et nostris huiusmodi, imo verius apostolicis et praefati domini Legati cum potestate de latere, firmiter obedire mandatis. Orta primum iam dudum coram diversis iudicibus auctoritate apostolica et ordinaria in diocesi Cracoviensi deputatis, ac ad nos demum ratione appellationis ad sanctissimum olim in Christo patrem et dominum, dominum Alexandrum divina providentia Papam sextum, nec non reverendum in Christo patrem dominum Petrum miseratione divina etc. Presbyterum Cardinalem cum potestate Legati de latere, interpositae et interiectae, devoluta et indecisa pendente causa et materia questionis inter magnificum dominum Nicolaum de Curozwanky Palatinum Lublinensem actorem et appellantem ex una, ac venerabiles et egregios viros dominos Rectorem, Doctores et Magistros Universitatis studii Cracoviensis generalis, de et super certo censu annuo duodecim marcarum in vim reemptionis ipsis dominis Doctoribus et Magistris praefatis de villa Luczyanowycze diocesis Cracoviensis, singulis annis proveniente et solvi consueto, per ipsumque magnificum dominum Nicolaum Palatinum possessorem eiusdem villae diutius a multis annis retento, et illius occasione partibus ex altera, appellatis, auctoritate commissaria

Note fragment 3 , Page/tab number in the source: 223

praefati reverendissimi domini Petri Legati cum potestate de latere, coram nobis vertente: in qua quidem causa ad omnium et singulorum terminorum iudiciariorum observationem gradatim et successive, servatis servandis, debite usque ad causae conclusionem inclusive cum dictis partibus seu ipsarum procuratoribus, ac etiam in contumaciam ipsius magnifici domini Nicolai Palatini Lublinensis rite et legitime procedendo, nostram interlocutoriam sententiam vim diffinitivae in se continentem, pro parte venerabilium dominorum Rectoris, Doctorum et Magistrorum Universitatis Cracoviensis studii generalis, et contra ipsum magnificum dominum Nicolaum Palatinum Lublinensem tulimus et pronuntiavimus huiusmodi sub tenore. Christi nomine invocato, pro tribunali sedentes et ipsum solum Deum prae oculis habentes, de iuris peritorum consilio et assensu, ac matura intra nos deliberatione praehabita, per hanc nostram sententiam interlocutoriam vim diffinitivae habentem, quam ferimus in his scriptis, in causa inter magnificum dominum Nicolaum de Curozwanky Palatinum Lublinensem ex una, et egregios et venerabiles dominos Rectorem, Doctores et Magistros almae Universitatis studii generalis Cracoviensis partibus ex altera, coram nobis auctoritate reverendissimi in Christo patris domini Petri miseratione divina tituli Sancti Ciriaci in Thermis sacrosanctae Romanae Ecclesiae Presbyteri Cardinalis, sanctissimi olim in Christo patris et domini, domini Alexandri divina providentia Papae sexti, ac ipsius, dictaeque Sedis in Regno Poloniae etc. cum potestate Legati de latere, super certis censibus duodecim marcarum diu retentis ipsis dominis Doctoribus et Magistris per praefatum magnificum dominum Nicolaum Palatinum, rebusque aliis in actis causae deductis, et eorum occasione in secunda aut forte in tertia instantia vertente, dicimus, pronuntiamus, decernimus et declaramus: venerabiles et egregios viros dominos Sigismundum de Thargovyska Decretorum, et Mathiam de Grodzysko Medicinae Doctores, Canonicos Cracovienses, Iudicesque commissarios Sedis Apostolicae, inter praefatas partes occasione dictarum duodecim marcarum census annui de villa Luczyanovycze Cracoviensis diocesis, ipsis dominis Doctoribus et Magistris Universitatis praefatae singulis annis solvi consuetarum, et per ipsum magnificum dominum Nicolaum Palatinum Lublinensem a multis annis solvi neglectarum et retentarum, provenientium, bene et iuste ac legitime processisse, ac processus excommunicationum, aggravationum contra ipsum magnificum dominum Nicolaum Palatinum Lublinensem ob non responsionem articulorum pro parte dictorum dominorum Doctorum et Magistrorum productorum, decrevisse et fulminasse, et ab eisdem in processu dictorum dominorum commissariorum ad Sedem Apostolicam, ipsiusque Sedis cum potestate Legatum de latere male fuisse et esse provocatum et non in tempore appellatum; ac tandem per contrarios actus veluti absolutionis a dictis censuris praefatorum dominorum commissariorum Sedis praefatae obtentae, et per litis contestationem ac responsionem ad articulos praefatorum dominorum Doctorum Universitatis Cracoviensis per verbum „ credit “ etc. recessisse. Tandem hic evocatis dictis dominis Doctoribus a loco insigni ad nos, nihil in causa fecisse partem colludendo, nec facere velle; dictosque dominos Doctores suas exceptiones legitimas sufficienter probavisse: et ob hoc processum saepedictorum dominorum Sigismundi et Mathiae Canonicorum Cracoviensium confirmandum fore et confirmari debere, partesque ipsas ad Iudices a quibus remittendas fore et remitti debere, quas et remittimus, nosque et collegam nostrum vigore clausulae „Quodsi

Note fragment 4 , Page/tab number in the source: 224

non ambo“ etc. exonerari de causa ipsa in totum, prout exoneramus per praesentes; ipsumque magnificum dominum Nicolaum Palatinum Lublinensem dictis dominis Rectori, Doctoribus et Magistris in expensis in huiusmodi causa coram nobis factis, legitime condemnandum fore et condemnamus, ac ad solutionem cogimus et compellimus; quas iuxta dispositionem Capituli: „Cum appellationibus frivolis“ eodem titulo Libro sexto, eadem die moderatione, qua cum Deo potuimus, leviori praemissa, ad quatuor marcas taxavimus per praesentes. Lecta, lata et in scriptis pronuntiata est haec sententia interlocutoria per nos venerabilem dominum Laurentium de Ostrow Decanum Vielunensem, Iudicem commissarium memoratum, in domo habitationis nostrae in Vielun, hora Vesperorum, ad iura reddendum et causas audiendum iudicio pro tribunali praesidentem, Anno Domini Millesimo Quingentesimo quarto, Indictione septima, die vero Lunae xxix (sic) mensis Ianuarii. Praesentibus ibidem honorabilibus dominis Iohanne de Parczycze praecentore, Stanislao Swyrczovsky, Thoma de Cosczelecz mansionariis, Iohanne Olevynsky, Martino de Lanczna vicariis perpetuis ecclesiae collegiatae Vielunensis, ac Gregorio plebano in Cadlub, testibus cirea praemissa. A qua quidem sententia interlocutoria et alias vim diffinitivae in se continente, infra decemdium seu fatalia iuris non fuit pro parte dicti magnifici domini Nicolai Palatini Lublinensis, nec verbo, nec in scriptis appellatum, et proinde praedicta nostra interlocutoria sententia seu verius diffinitiva transivit in rem iudicatam. Quare pro parte dictorum dominorum Rectoris, Doctorum et Magistrorum nobis extitit supplicatum, quatenus ad executionem praedictae nostrae sententiae et praecipue taxationis expensarum, procedere dignaremur. Nos itaque attendentes, quod frustra esset iura condere et sententias promulgare, nisi debitae executioni demandentur: ad instigationem et instantiam procuratoris legitimi dominorum Doctorum et Magistrorum Universitatis praedictae, videlicet Magistri Mathaei de Boleslavyecz, quemadmodum id de aequitate iuris venit, praedictam nostram sententiam interlocutoriam et praecipue condemnationem expensarum et earumdem taxationem executioni debitae duximus demandandum et demandamus, Christi nomine invocato, per praesentes; quae omnia et singula vobis dominis executoribus et cuilibet vestrum intimamus, insinuamus et notificamus et ad cuiuslibet vestrum notitiam deducimus et deduci volumus in his scriptis. Quocirca vobis executoribus supradictis et vestrum cuilibet in solidum, in virtute sanctae obedientiae et sub excommunicationis poena, quam in vos et vestrum quemlibet, trina trium duntaxat dierum canonica monitione praemissa, ferinius in his scriptis, nisi mandatis nostris huiusmodi, imo verius apostolicis et praefati domini Legati de latere parueritis cum effectu districte praecipientes mandamus: quatenus personaliter accedentes magnificum dominum Nicolaum de Curozwanky Palatinum Lublinensem, si ipsius praesentiam faciliter habere potueritis, alias in domo habitationis suae et coram familia, si ad eam vobis tutus pateat accessus, sin autem, extunc vestris in ecclesiis publice, alta, intelligibili et sonorosa voce proponentes, ipsum salubriter et efficaciter inducendo requiratis et moneatis, quem praesentibus nos requirimus et monemus, ut infra novem dies vestram huiusmodi monitionem immediate se sequentes, quorum dierum tres pro primo, tres pro secundo et reliquos tres pro tertio ac peremptorio termino, ac trina canonica monitione praevia praefigimus et assignamus, venerabilibus et egregiis viris dominis Rectori, Doctoribus et Magistris Universitatis Cracoviensis studii generalis, quatuor marcas

Note fragment 5 , Page/tab number in the source: 225

pecuniarum, ratione fatigaram et expensarum coram nobis in causa huiusmodi factarum, in quibus est idem magnificus dominus Nicolaus Palatinus per nos iudicialiter condemnatus, det, solvat et realiter ac cum effectu reponat in manibus eorundem aut ipsorum procuratoris, ac huiusmodi nostrae sententiae interlocutoriae pareat cum effectu; alioquin si secus fecerit, extunc prout exnunc mox lapsis novem diebus, ipsum magnificum dominum Nicolaum Palatinum Lublinensem excommunicamus, Christi nomine invocato, in his scriptis, quem et vos sic excommunicatum vestris in ecclesiis singulis diebus dominicis et festivis coram divina audientibus publice denuntietis et denuntiare curetis, tamdiu praemissa exequentes, donec a nobis aliud habueritis in mandatis. In quorum omnium fidem et testimonium praemissorum, praesentes literas nostras monitionis, sive praesens Instrumentum publicum monitionem nostram in se continens, exinde fieri et per Notarium publicum, huiusmodi causae coram nobis scribam infrascriptum subscribi et publicari mandavimus, nostrique sigilli proprii appensione iussimus et fecimus communiri. Actum et datum in Vielun, in domo habitationis nostrae, Anno Domini Millesimo Quingentesimo quarto, Indictione septima, Pontificatus sanctissimi in Christo patris et domini nostri, domini Iulii divina providentia Papae secundi anno ipsius primo, die vero Saturni nona mensis Februarii. Praesentibus ibidem honorabilibus dominis Iohanne de Parczycze praecentore, Stanislao Szwyrczowsky et Thoma de Cosczelecz, mansionariis Vielunensibus, testibus fide dignis circa praemissa.

Note fragment 6 , Page/tab number in the source: 225

(L. S. n.) Et ego Laurentius Stanislai de Gyeszky Gneznensis diocesis clericus, publicus apostolica et imperiali auctoritatibus Notarius, venerabilis domini Laurentii de Ostrow Iudicis commissarii, et causae huiusmodi coram eo scriba, quia praemissis omnibus et singulis, dum sic ut praemittitur, agerentur et fierent, una cum praenominatis testibus praesens interfui, eaque omnia et singula sic fieri vidi et audivi: ideoque hoc praesens publicum Instrumentum monitionis et executionis per alium Notarium, me tunc altioribus intendente, fideliter scriptum exinde confeci et in hanc publicam formam redegi, signoque et nomine meis solitis et consuetis, una cum memorati domini Iudicis commissarii sigilli appensione communivi, in fidem et testimonium omnium et singulorum praemissorum, ad hoc specialiter rogatus et requisitus.

Note fragment 7 , Page/tab number in the source: 225

Anno Domini 1504 die duodecima mensis Octobris, Reverendus in Christo pater et dominus, dominus Ioannes Dei gratia Episcopus Cracoviensis, praesentem processum in diocesi sua ad exequendum admisit, praesentibus Doctoribus et Notariis Curiae.
Felix Schyrzchovski Notarius manu propria ssct.

Comment to note fragment:
(Ad latus:)

Note fragment 8 , Page/tab number in the source: 225

Anno Domini Millesimo Quingentesimo quinto, feria quarta post festum Sanctae Hedvigis, ego Mathias de Bochnya vicarius perpetuus ecclesiae cathedralis Cracoviensis, executus sum praesens mandatum, monendo personaliter intro scriptum

Comment to note fragment:
(In dorso:)

Note fragment 9 , Page/tab number in the source: 226

magnificum dominum Nicolaum de Curoszveky Palatinum Lublinensem, iuxta vim et formam praesentis processus, copiasque praesentium in manus proprias tradidi.

Comment to note fragment:
(Ex archetypo membranaceo, cum sigillo parvo cereo rubro, taeniolis membranaceis appenso. Sigillum exhibet scutum cum stemmate dicto Niesobia, atque hac in ambitu inscriptione literis gothicis exarata: s. laurencii de ostrow. — Nr. Archiv. Univ. 3256.)