Blick im Eintrag über Funktionen/Ämter/Beschäftigungen

Eintragsabschnitt 1 , Seite/Karte in der Quelle: 166

CCLXXXIX. Literae monitoriales Sbignei (de Oleśnica) Archiepiscopi Gnesnensis contra occupatores beneficiorum et bonorum Nicolai Cristini de Lublin Custodis Skarbimiriensis.
In Skierniewice, Anno 1491, die 12 mensis Iunii.

Eintragsabschnitt 2 , Seite/Karte in der Quelle: 166

Sbigneus Dei et Apostolicae Sedis gratia sanctae ecclesiae Gneznensis Archiepiscopus et Primas, nec non inrium, bonorum et beneficiorum nunc obtentorum et obtinendorum, ac omnium rerum tam ecclesiasticarum quam temporalium, ad venerabilem virum dominum Nicolaum Cristini de Lublin Custodem Skarbimiriensem quomodolibet spectantium iudex et conservator cum clausula: quatenus vos vel duo etc. a Sede Apostolica specialiter deputatus, universis et singulis dominis Abbatibus, Prioribus, Praepositis, Decanis, Archidiaconis, Scolasticis, Cantoribus, Custodibus et Canonicis tam cathedralium quam collegiatarum, parochialiumque ecclesiarum rectoribus et loca tenentibus, eorundem plebanis, viceplebanis, capellanis, curatis et non curatis, vicariis perpetuis, altaristis, caeterisque presbyteris, clericis, Notariis et tabellionibus publicis quibuscunque per civitates et dioceses Gneznensem, Ploczensem, Poznaniensem, Wladislaviensem et Cracoviensem ac alias ubilibet constitutis et eorum cuilibet in solidum, ad quem vel ad quos prasentes nostrae literae pervenerint, salutem in Domino et nostris huiusmodi imo, verius apostolicis firmiter obedire mandatis. Literas conservatorii sanctissimi in Christo patris et domini nostri, domini Innocentii divina providentia Papae VIII. in cordula canapina vera bulla plumbea ipsius domini nostri Papae more Romanae Curiae impendente bullatas, sanas et integras, non vitiatas, non cancellatas nec in aliqua parte suspectas, sed omni prorsus vitio et suspicione carentes, nobis per praefatum dominum Nicolaum Lublin principalem in infrascriptis literis apostolicis principaliter nominatum praesentatas, nos cum ea, qua decuit, reverentia noveritis accepisse, quarum tenor sequitur et est talis:

Eintragsabschnitt 3 , Seite/Karte in der Quelle: 166

„Innocentius Episcopus servus servorum Dei, venerabili fratri Archiepiscopo Gneznensi et dilectis filiis Sancti Vincentii extra muros Wratislavienses, ac Clarae tumbae alias in Mogyla Cracoviensis diocesum monasteriorum Abbatibus, salutem et apostolicam benedictionem. Militanti ecclesiae licet immeriti, disponente Domino, praesidentes, circa curam dignitatum aliorumque beneficiorum ecclesiasticorum omni solertia reddimur indefessa soliciti, ut iuxta debitum pastoralis officii eorum occurramus dispendiis, et profectibus divina cooperante clementia salubriter intendamus. Sane dilecti filii Nicolai Cristini de Lublin Custodis ecclesiae Sancti Iohannis Scarbimiriensis Cracoviensis diocesis conquestione percepimus: quod nonnulli Archiepiscopi, Episcopi, aliique ecclesiarum Praelati et clerici ac ecclesiasticae

Eintragsabschnitt 4 , Seite/Karte in der Quelle: 167

personae tam religiosae quam saeculares, nec non Duces, Marchiones, Comites, Barones, Nobiles, milites et laici, Communia civitatum, Universitates oppidorum, castrorum, villarum et aliorum locorum, ac aliae singulares personae civitatum et diocesum et aliarum partium diversarum, occuparunt et occupari fecerunt castra, villas et alia loca, terras, domos, possessiones, iura et iurisdictiones, nec non decimas, fructus, census, redditus et proventus Custodiae dictae ecclesiae Sancti Iohannis ac aliorum beneficiorum ecclesiasticorum cum cura et sine cura, quae dictus Nicolaus obtinet, et nonnulla alia bona mobilia et immobilia spiritualia et temporalia ad Nicolaum, Custodiam et beneficia huiusmodi spectantia, et ea detinent indebite occupata, seu ea detinentibus praestant auxilium, consilium vel favorem. Nonnulli etiam civitatum, diocesum et partium praedictarum, qui nomen Domini in vacuum recipere non formidant, eidem Nicolao super praedictis castris, villis et locis aliis, terris, domibus, possessionibus, iuribus et iurisdictionibus, fructibus, censibus, redditibus et proventibus eorundem, et quibuscunque aliis bo„nis mobilibus et immobilibus, spiritualibus et temporalibus, ac aliis rebus ad Nicolaum, Custodiam et beneficia praedicta spectantibus, multiplices molestias et iniurias inferunt et iacturas. Quare dictus Nicolaus nobis humiliter supplicavit, ut cum sibi reddatur valde difficile, pro singulis querelis ad Apostolicam Sedem habere recursum, providere ipsi super haec paterna diligentia curaremus. Nos igitur adversus occupatores, detentores, praesumptores, molestatores et iniuriatores huiusmodi illo volentes dicto Nicolao remedio subvenire, per quod ipsorum compescatur temeritas et aliis aditus committendi similia praecludatur, ipsumque Nicolaum a quibuscunque excommunicationis, suspensionis et interdicti, aliisque ecclesiasticis sententiis, censuris et poenis a iure vel ab homine quavis occasione vel causa latis, si quibus quomodolibet innodatus existit, ad effectum praesentium duntaxat consequendum, harum serie absolventes et absolutum fore censentes, discretioni vestrae per apostolica scripta mandamus: quatenus vos vel duo aut unus vestrum, per vos vel alium seu alios, etiamsi sint extra loca, in quibus deputati estis conservatores et iudices, praefato Nicolao efficacis defensionis praesidio assistentes, non permittatis eundem super his et quibuslibet aliis bonis et iuribus ad Nicolaum, Custodiam et alia beneficia huiusmodi, qualiacunque sint, quae, ut praefertur, obtinet et imposterum obtinebit, spectantibus, ab eisdem vel quibuslibet aliis indebite molestari, vel ei gravamina seu dampna vel iniurias irrogari, facturi dicto Nicolao, cum ab eo vel procuratoribus suis, aut eorum aliquo fueritis requisiti, de praedictis et aliis personis quibuslibet super restitutione huiusmodi castrorum, villarum, terrarum et aliorum locorum iurisdictionum, iurium et bonorum mobilium et immobilium, decimarum, reddituum quoque et proventuum et aliorum quorumcunque bonorum, nec non de quibuslibet molestiis, iniuriis atque dampnis praesentibus et futuris, in illis videlicet, quae iudicialem requirunt indaginem, summarie et de plano sine strepitu et figura iudicii, in aliis vero prout qualitas eorum exegerit, iustitiae complementum, occupatores seu detentores, praesumptores, molestatores ac iniuriatores huiusmodi, nec non contradictores quoslibet et rebelles, cuiuscunque dignitatis, status, gradus, ordinis vel conditionis extiterint, quandocunque et quotienscunque expedierit, auctoritate nostra per censuram ecclesiasticam, appellatione postposita, compescendo, invocato ad hoc si opus fuerit, auxilio brachii saecularis, et nihilominus legitimis super his habendis

Eintragsabschnitt 5 , Seite/Karte in der Quelle: 168

servatis processibus, illos quos censuras et poenas per vos pro tempore latas incurrisse legitime constiterit, quotiens opus fuerit, iteratis vicibus aggravandi, et si per summariam informationem super his per vos habendam, vobis etiam constiterit, quod ad loca, in quibus occupatores, detentores, praesumptores, molestatores et iniuriatores huiusmodi ac alios, quos praesentes literae concernunt, pro tempore morari contigerit, pro monitionibus ipsis et citationibus de eis faciendis tutus non pateat accessus, vel commode eorum praesentia haberi non poterit, nos vobis citationes et monitiones quaslibet per edicta publica locis affigenda publicis et partibus illis vicinis, de quibus sit verisimilis coniectura, quod ad notitiam citatorum et monitorum huiusmodi pervenire valeat, faciendi plenam et liberam earundem tenore praesentium concedimus facultatem; ac volumus ac praedicta auctoritate decernimus, quod monitiones et citationes huiusmodi perinde arceant ipsos monitos et citatos, acsi eis personaliter et praesentialiter insinuatae et intimatae legitime extitissent. Non obstantibus tam felicis recordationis Bonifacii Papae octavi praedecessoris nostri, in quibus cavetur, ne aliquis extra suam civitatem et diocesim, nisi in certis exceptis casibus, et in illis ultra unam dietam a fine suae diocesis ad iudicium evocetur, seu ne indices et conservatores a Sede praedicta deputati, extra civitatem et diocesim, in quibus deputati fuerint, contra quoscunque procedere, seu alii vel aliis vices suas committere, aut aliquos ultra unam dietam a fine diocesis earundem trahere praesumant, et de dietis duabus in Concilio generali; seu quod de aliis quam de manifestis iniuriis et violentiis, ac aliis, quae iurisdictionalem requirunt indaginem, poenis in eos, si secus egerint, et in id procurantes, adiectis, conservatores nullatenus se intromittant, quam aliis quibuscunque constitutionibus a praedecessoribus nostris Romanis Pontificibus tam de iudicibus delegatis et conservatoribus, quam personis ultra certum numerum ad iudicium non vocandis, aut aliis editis, quae vestrae possent in hac parte iurisdictioni aut potestati, eiusque libero exercitio quomodolibet obviare; seu si aliquibus communiter vel divisim a praedicta sit Sede indultum, quod excommunicari, suspendi vel interdici aut extra vel ultra certa loca ad iudicium evocari non possint, per literas apostolicas non facientes plenam et expressam ac de verbo ad verbum de induito huiusmodi et eorum personis, locis, ordinibus et nominibus propriis, mentionem, et qualibet alia indulgentia dictae Sedis generali vel speciali, cuiuscunque tenoris existat, per quam praesentibus non expressam vel totaliter non inserta vestrae iurisdictionis explicatio in hac parte valeat quomodolibet impediri, et de qua eiusque toto tenore de verbo ad verbum in nostris literis habenda sit mentio specialis. Caeterum volumus et apostolica auctoritate decernimus, quod quilibet vestrum prosequi valeat articulum etiam per alium inchoatum, quamvis idem inchoans nullo fuerit canonico impedimento praepeditus; quodque a data praesentium sit vobis et unicuique vestrum in praemissis omnibus et eorum singulis ceptis et non inceptis, praesentibus et futuris, perpetuata potestas et iurisdictio attributa, ut eo vigore, eaque fluitate possitis in praemissis omnibus ceptis et non ceptis, praesentibus et futuris, et pro praedictis procedere, acsi praedicta omnia et singula coram vobis cepta fuissent, et iurisdictio vestra et cuiuslibet vestrum in praedictis omnibus et singulis per citationem vel modum alium perpetuata legitime extitisset, constitutione praedicta super conservatoribus et alia qualibet in contrarium edita non obstante, praesentibus quamdiu

Eintragsabschnitt 6 , Seite/Karte in der Quelle: 169

praefatus Nicolaus Custodiam et alia beneficia praedicta obtinuerit duntaxat valituris. Datum Romae apud Sanctum Petrum, Anno incarnationis dominicae Millesimo Quadringentesimo nonagesimo, Nono Kalendas Decembris, Pontificatus nostri anno septimo.“

Eintragsabschnitt 7 , Seite/Karte in der Quelle: 169

Post quarum quidem literarum apostolicarum praesentationem et receptionem nobis et per nos ut praemittitur factas, querelam venerabilis et egregii viri domini Nicolai Cristini de Lublin principalis in praeinsertis literis apostolicis principaliter nominati suscepimus, continentem, quod eo per multos annos in Romana Curia existente, quidam clerici et laici sui factores, qui suorum beneficiorum et bonorum aliorum temporalium administrationem gerebant, multa ex eisdem bonis provenientibus in absentia eiusdem domini Nicolai receperunt et aliqui male rationem reddiderunt, alii penitus et omnino nihil dederunt nec dare voluerunt, neque volunt; nonnulli etiam sunt, qui bona et redditus beneficiorum suorum in sua absentia sine aliquo titulo aut colore pro se usurparunt; aliqui, postquam ad Urbem recessit, de rebus per eum in partibus derelictis se sponte propria intromiserunt et illa consumpserunt. Sunt etiam qui domos ad eum spectantes sine sua scientia et voluntate vendiderunt, alii literas fundationis certorum beneficiorum contra suam voluntatem occultarunt et eundem Nicolaum occultando iura et defensiones, vexare permiserunt, imo ad vexandum suggesserunt, et tam saeculares quam ecclesiasticae personae de morte sua et non reditu ad partes spem habendo, eidem multiplices molestias et iniurias intulerunt pariter et iacturam. Ac ad informandum animum nostrum, quod ad civitatem Cracoviensem pro executione alicuius nostri processus, ac ad Capitulum Cracoviense pro admissione ad exequendum petenda amodo tutus non pateat accessus, et maxime quia circa petitionem admissionis certi nostri processus nedum admissio facta non fuit, sed petitor admissionis sive executor fuit percussus et literae nostrae per vim receptae, nonnullos articulos, iura et testes produxit, ipsisque per nos receptis, admissis et in forma iuris iuratis et examinatis: quare nobis humiliter supplicavit, ut sibi super hoc providere curaremus et monitorium una cum citatione et inhibitione contra inferius designatos et in executione specificandos, per edictum publicum in locis vicinis publicandum et exequendum, iuxta vim, formam et tenorem literarum praeinsertarum dare et concedere dignaremur. Nos igitur Sbigneus Archiepiscopus et conservator praefatus attendentes requisitionem huiusmodi fore iustam et rationi consonam, volentesque mandatum apostolicum in hac parte nobis directum, reverenter exequi ut tenemur; et quia ex testium dictis et depositionibus ac iuribus huiusmodi reperimus, ad dictam civitatem et Capitulum Cracoviense et ad infra nominatos tutum sine laesione et offensa non patere accessum, et ne similia fiant, prout nuper facta sunt: ideo auctoritate apostolica nobis commissa et qua fungimur in hac parte, per hoc praesens publicum edictum in diocesi Cracoviensi primo, si fieri potest sine aliquo scandalo et periculo, in Capitulo Cracoviensi, alias in defectu et in casu quo ad Capitulum tute accessus non pateret, in ecclesiis collegiatis Sancti Iohannis Scarbimiriae et Sancti Floriani in Cleparzs extra muros Cracovienses, valvis seu portis affigendum et publicandum, vos omnes et singulos supradictos et vestrum quemlibet, quibus praesens noster processus dirigitur, tenore praesentium requirimus et monemus primo, secundo, tertio et peremptorie vobis nihilominus et vestrum cuilibet in virtute sanctae obedientiae et sub excommunicationis poena, quam in

Eintragsabschnitt 8 , Seite/Karte in der Quelle: 170

vos et vestrum quemlibet, si secus feceritis, canonica monitione praemissa, ferimus in his scriptis, districte praecipiendo mandantes: quatenus mox visis praesentibus, si fieri potest sine periculo, per praesentationem praesentium literarum ipsis adversariis infra specificatis et nominatis in dicto Capitulo Cracoviensi fiendam et faciendam, alias per affixionem portarum ecclesiarum praedictarum, iuxta vim, formam et tenorem praeinserti conservatorii, reverendum in Christo patrem dominum Abbatem modernum Thiniciensem, eiusque conventum, venerabilesque patres dominos Doctores Iohannem Pylcza modernum Rectorem, Andream Labyschyn et caeteros in domo et Collegio Artistarum commorantes, nec non omnes et singulos luris canonici in Scola Canonistarum lectores et Doctores, Iacobum Stanislai Kyelbaszka de Lublin monopedem in cathedrali Cracoviensi olim psalteristam, et Iohannem Kowal de Pilszno presbyterum gratialem in civitate Cracoviensi morantem, et quoscunque alios dictum dominum Nicolaum Lublin in suis bonis et beneficiis impedientes ac sua communiter vel divisim interesse putantes, et in executione praesentium nostrarum literarum simul vel successive nunc et in futurum nominandos, sub poena excommunicationis moneatis et requiratis, quos nos etiam et eorum quemlibet per simile edictum tenore praesentium requirimus et monemus primo, secundo, tertio et peremptorie districte praecipiendo mandantes: quatenus infra novem dies, die affixionis sive praesentationem vel affixionem et publicationem praesentium contra eos, ut praemittitur, factam immediate sequentes, quem terminum ipsis et eorum cuilibet pro omni dilationis termino peremptorio ac monitione canonica assignetis, prout etiam nos sic eisdem assignamus; praedicti dominus Abbas modernus Thiniciensis et conventus, domum quam in castro Cracoviensi vendiderunt, loco venditae de simili ad tempora vitae provideant, aut super valore precii per eos recepti amicabiliter componant; Magistri et Doctores literas fundationis altaris beati Lazari in capella beatae Mariae Magdalenae in civitae Cracoviensi siti, quas apud se occultant et detinent, ipsi domino Nicolao Lublin dicti altaris altaristae coram nobis iudicialiter exhibeant, censusque, prout ex testamento fundatoris tenentur, quia fiscus pecunias recepit, augeant et coemant iuxta ultimam voluntatem testatoris et fundationis, caeteraque faciant, quae de iure et ex testamento eis relicto facere tenentur, prout hoc in processu causae clarius specificabuntur; Iacobus Kyelbaszka monopes rationem de ipsius administratione, quam in absentia dicti domini Nicolai Lublin in eius beneficiis et bonis per quindecim annos gerebat, specifice reddat et specificet quantum recepit a kmethonibus, eosdem ex nomine specificando, pro quo, quo anno et quartuali ipsi domino Nicolao dedit et ubi fuit illud quod recepit, pecora et domus supellectile in parochiali ecclesia in Ra- czyborovicze, per eum receptos currus, pelliceas diversi generis et vestimenta aut eorum valorem restituat, et de bonis omnibus et singulis per eum receptis rationem de quindecim annis faciat, ac in causis mutilationis pedis ac Cracoviensis Canonicatus et praebendae Vysliciensis, in Curia Romana pro eo exposita viceversa restituat; Iohannes vero Kowal tanquam executor testamenti olim Iohannis Creydlar de Lublin tunc altaristae altaris Sancti Erasmi in ecclesia parochiali Beatae Mariae in civitate Cracoviensi, ad quod altare ipse dominus Nicolaus Lublin successit, omnes res dicti altaris, per eum propria temeritate ab huiusmodi altari alienatas et raptas, videlicet tres ornatus cum suis apparamentis, duas casulas cum albis, stolis et manipularibus, duos calices, ampulas argenteas duplices, missalia,

Eintragsabschnitt 9 , Seite/Karte in der Quelle: 171

corporalia quinque et totidem pallas, Schirzynky quinque cum auro contextas, manutergia et omnes alias attinendas eidem altariae et altaristae restituat, imagines et armaria per eum destructas reformet, post obitum dicti Iohannis Creydlar census altaris per eum raptos restituat et finaliter de omnibus rebus et attinendis ac censibus dicti altaris tanquam vero altaristae rationem expeditam faciat, et alias mandatis et monitionibus nostris huiusmodi imo verius apostolicis plenarie pareant, obediant, et quilibet eorum pareat et obediat realiter et cum effectu. Et nihilominus praefati moniti nos vel forsan nostrum subdelegatum infra viginti dierum spatium dictos novem dies immediate sequentium, se huiusmodi nostris imo verius apostolicis monitionibus et mandatis et aliis supradictis paruisse et obedivisse, ac praemissa omnia et singula, prout ad quemlibet eorum respective spectat et pertinet, plenarie adimplevisse certificent. Alioquin eosdem sic monitos modo et forma ac locis supradictis ex parte nostra imo verius apostolica per simile edictum peremptorie citare curetis, quos nos etiam et eorum quemlibet tenore praesentium per edictum sic citamus, quatenus dicta vicesima die immediate dictos novem dies sequente, si iuridica fuerit, et nos vel forsan noster subdelegatus ad iura reddendum pro tribunali sederimus vel sederit, alioquin proxima die iuridica extunc immediate sequente, qua nos vel subdelegatum nostrum praefatum ibi, ubi tunc cum curia nostra pro tempore residere contingerit, hora Vesperorum more commissariorum pro tribunali sedere contingerit, compareant in iudicio legitime coram nobis vel subdelegato nostro per se vel procuratorem aut procuratores suos idoneos, ad causam seu causas huiusmodi sufficienter instructos cum omnibus et singulis iuribus et munimentis ad causam huiusmodi pertinentibus, se et eorum quemlibet sententias et censuras huiusmodi incidisse declarari visuri et audituri, vel causam, si quam hubeant rationabilem, quare id fieri non debeat, allegaturi, dicturi, aliasque facturi, audituri, ostensuri et excepturi id quod iustitia suadebit et ordo dictaverit rationis, certificantes nihilominus sic monitos et citatos, quod sive in terminis praedictis mandatis nostris huiusmodi imo verius apostolicis parere et obedire, ut praemissum est, curaverint sive non, nos nihilominus vel forsan subdelegatus noster ad declarationem poenarum praetactarum et ad aggravationem et reaggravationem earundem, etiam ad auxilii brachii saecularis, si opus fuerit, invocationem, et alias prout de iure poterimus sive poterit, procedemus seu procedet, dictorum monitorum et citatorum contumacia seu absentia in aliquo non obstante. Et insuper attendentes, quod lite et causa et causis huiusmodi sic coram nobis auctoritate apostolica pendentibus, nil sit per quemcunque inferiorem innovandum seu attemptandum, ideo vobis omnibus et singulis supradictis, quibus praesentes nostrae literae diriguntur, eadem auctoritate apostolica committimus et mandamus: quatenus post legitimam dictae monitionis et citationis executionem, si opus fuerit, reverendo in Christo patri et domino, domino Dei et Apostolicae Sedis gratia Episcopo Cracoviensi, eiusque in spiritualibus et temporalibus Vicario et Officiali generali, ac universis et singulis officialibus, iudicibus, commissariis delegatis, subdelegatis, ordinariis, extraordinariis quibuscunque, quacunque auctoritate fungentibus seu eorum loca tenentibus, et aliis quibuscunque in executione praesentium nunc et in futurum nominandis, et praesertim Abbati et conventui moderno monasterii Thiniciensis, Iohanni Pylcza Rectori Universitatis studii Cracoviensis, ac Magistris et Doctoribus, Iacobo monopedi et Iohanni Kowal, omnibusque aliis et singulis supranominatis,

Eintragsabschnitt 10 , Seite/Karte in der Quelle: 172

ac quorum interest vel intererit quomodolibet in futurum, quibuscunque nominibus censeantur, communiter vel divisim, de quibus pro parte dicti domini Nicolai Cristini Lublin principalis vigore praesentium fueritis requisiti aut alter vestrum fuerit requisitus, per finale edictum modo et forma praemissis inhibeatis, quibus et nos etiam tenore praesentium communiter vel divisim sub poenis excommunicationis, aggravationis, suspensionis et aliis censuris ecclesiasticis, inhibemus, ne ipsi seu eorum alter, aut quicunque alii, in causis huiusmodi in vilipendium litispendentiae et iurisdictionis nostrae imo verius Sedis Apostolicae contemptum et dicti domini Nicolai Cristini principalis praeiudicium, quicquam per se vel alium seu alios publice vel occulte, directe vel indirecte, quovis quaesito colore attemptare vel innovare praesumant vel aliquis eorum praesumat; quod si secus factum fuerit, illud totum revocare et ad statum pristinum reducere, et contra turbantes nostram iurisdictionem et contempnentes Sedis Apostolicae auctoritatem, ad declarationem dictarum poenarum, aliasque graviores poenas et sententias, prout iuris fuerit et facti qualitas poposcerit, procedere curabimus, iustitia mediante. Diem vero sive dies monitionis et citationis nec non inhibitionis vestrarum huiusmodi atque formam et quicquid in praemissis feceritis, nobis vel forsan subdelegato nostro per vestras patentes literas aut Instrumenta publica, harum seriem sive designationem sufficientem in se continentem seu continens, remissis praesentibus, quantocius poteritis, fideliter intimare curetis. Mandamus tamen copiam fieri de praemissis, eam petentibus et habere debentibus, petentium quidem sumptibus et expensis; absolutionem vero omnium et singulorum, qui praefatas nostras sententias incurrerint seu incurrerit quoquomodo, nobis vel superiori nostro tantum reservamus. Loca vero, locum capitularem Cracoviensem vel valvarum collegiatarum Sancti Iohannis Scarbimiriensis et Sancti Floriani in Cleparzs ecclesiarum praedictarum seu portarum earundem, publica et idonea, praesentibus nostris literis exequendis ad instar publicorum edictorum duximus eligenda, quae huiusmodi processum nostrum suo quasi sonoro et patulo iudicio publicabunt, in quibus has nostras literas modo et forma praemissis decrevimus et decernimus publicandum et affigendum, ne dicti sic moniti et citati de praemissis aut aliquo praemissorum ignorantiam aliquam praetendere valeant, seu etiam quilibet allegare, cum non sit verisimile, apud ipsos sic monitos et citatos remanere incognitum et occultum, quod tam patenter et notorie omnibus existit intimatum et publicatum; volentesque nihilominus et apostolica auctoritate decernentes, quod praesens nostrum monitorium et citatio modo praemisso executa, dictos monitos et citatos perinde arceant et astringant et perinde valeant, acsi in eorum propriis personis moniti et citati forent, ac eisdem monitorium et citatio huiusmodi et praesentes nostrae literae personaliter lectae, intimatae et publicatae fuissent. In quorum omnium et singulorum fidem et testimonium praemissorum, praesentes nostras literas sive praesens publicum Instrumentum, huiusmodi nostrum monitorium et memoratum citatorium cum inhibitione per edictum publicum in se continentes sive continens, exinde fieri et per Notarium publicum, nostrumque et facti huiusmodi coram nobis scribam infrascriptum subscribi et publicari mandavimus, nostrique sigilli iussimus et fecimus appensione communiri. Datum et actum in Sqwyernyevicze in domibus nostrae residentiae, sub Anno a Nativitate Domini Millesimo Quadringentesimo nonagesimo primo, Indictione nona, die vero duodecima mensis Iunii, Pontificatus praefati sanctissimi in Christo patris

Eintragsabschnitt 11 , Seite/Karte in der Quelle: 173

et domini nostri, domini Innocentii divina providentia Papae octavi anno ipsius septimo. Praesentibus ibidem venerabilibus dominis Iohanne de Lassothky Scolastico, Iacobo de Crzyzanovicze, Iohanne Craska Gneznensibus, et Nicolao Cothvicz de Zneina Decretorum Doctore, Lanciciensi Canonicis, testibus circa praemissa.

Eintragsabschnitt 12 , Seite/Karte in der Quelle: 173

(L. S. n.) Et ego Laurentius Petri de Wawrzynczycze clericus Cracoviensis diocesis, publibus apostolica et imperiali auctoritatibus, reverendissimique in Christo patris et domini, domini Sbignei sanctae ecclesiae Gneznensis Archiepiscopi et Primatis, nec non conservatoris a Sede Apostolica specialiter deputati, Notarius et scriba, quia praemissis omnibus et singulis, dum sic ut praemittitur, fierent et agerentur, una cum praenominatis testibus interfui, eaque sic fieri vidi et audivi et notam sumpsi: ideo hoc praesens Instrumentum manu alterius, me aliis occupato negotiis, fideliter scriptum exinde confeci et in hanc publicam formam redegi, signoque et nomine meis solitis et consuetis una cum dicti reverendissimi domini Archiepiscopi conservatoris sigilli appensione signavi et subscripsi in fidem et testimonium omnium praemissorum rogatus et requisitus.

Bemerkungen zum Eintragsabschnitt:
(Ex archetypo membranaceo, cum sigillo cereo rubro, taeniola membranacea appenso. Sigillum exhibet imaginem B. Mariae V. stantis, manu dextra crucem episcopalem, manu sinistra vero parvulum Christum gestantis, sub cuius pedibus scutum cum insigni dicto Dembno. In ambitu inscriptio literis sic dictis gothicis minusculis: S. doi. Sbignei.......Nr. Archiv. Univ. 9444.)