Pełny podgląd zapiski o zdarzeniu dotyczącym pełnionych funkcji/urzędów/ról

Fragment zapiski 1 , Numer strony/karty w źródle: 170

CLXXXIL. Literae significatoriales Thomae (de Strzępia) Episcopi Cracoviensis absolutionem a sententia excommunicationis super Nawoykam relictam viduam olim Laurentii Zaręba Palatini Siradiensis, ratione non redditae decimae de praedio Prandnik ad ecclesiam S. Nicolai, lata, in se continentes.
Cracoviae, Anno 1456, die 9 mensis Maii.

Fragment zapiski 2 , Numer strony/karty w źródle: 170

Thomas Dei gratia Episcopus Cracoviensis, universis et singulis, quibus expedit sive interest aut interesse poterit quomodolibet in futurum, notum facimus per praesentes: quomodo pro parte nobilis dominae Nawoyka, olim magnifici domini Laurentii Zaramba Palatini Siradiensis consortis, nobis extitit debita cum instantia supplicatum, ut eidem quandam notam per ipsam coram nobis Cracoviae personaliter constitutam, apud acta nostra, in quadam causa decimarum praedialium praedii vulgariter Prandnyk nuncupati, quam cum venerabili domino Raphaele de Skawina Praeposito Kyelciensi, Canonico et Officiali nostro Cracoviensi generali ac ecclesiae parochialis Sancti Nicolai extra muros Cracovienses rectore, coram nobis habuit, factam et habitam, prout in eadem nota inferius inserta plenius dicitur contineri et haberi, certis de causis sub sigillo nostro sibi dandum in forma decernere dignaremur. Nos igitur petitioni et supplicationi praefatae annuentes, praedictam notam, ut praemittitur, apud acta nostra per praefatam dominam Nawoyka factam, sibi dandum coram Notario et testibus infrascriptis in forma prout petita est, decrevimus et decernimus per praesentes. Cuius quidem notae tenor ex actis sumptus de verbo ad verbum sequitur et est talis:

Fragment zapiski 3 , Numer strony/karty w źródle: 170

„Anno Domini Millesimo Quadringentesimo quinquagesimo sexto, die vero Iovis, decima octava mensis Martii, Cracoviae, constituta coram nobis nobilis domina Nawoyka relicta olim domini Zaramba, petebat se a sententiis excommunicationis aliarum censurarum per reverendissimum in Christo patrem dominum Sbigneum Cardinalem et Episcopum Cracoviensem, et demum reverendum dominum Iacobum de Senno Praepositum ac Sede vacante ecclesiae Cracoviensis Administratorem, ad instantiam venerabilis domini Raphaelis de Skavina Praepositi Kyelciensis, Canonici et Officialis Cracoviensis ac rectoris parochialis ecclesiae Sancti Nicolai extra muros Cracovienses, occasione non redditionis decimae praedialis de praedio Prandnyk in eam latis absolvi, praesente ipso domino Raphaele, qui allegavit, non debere eam absolvi propterea, quia licet comparens coram ipso domino Iacobo Praeposito et Administratore obtulisset se ad probanda modum reddendi decimam praedialem de praedio in Prandnik sub et infra parochialem ecclesiam Sancti Nicolai praedictam consistente provenientem ex decreto ipsius domini Administratoris coram venerabilibus dominis Nicolao Spiczmeri Cantore et Nicolao de Caliszs Canonico, Decretorum Doctoribus Cracoviensibus iudicibus de consensu ipsius domini Raphaelis

Fragment zapiski 4 , Numer strony/karty w źródle: 171

per ipsum dominum Administratorem deputatis; et ipsa domina Nawoyka suam oblationem prosequi et intentionem probare non curante, ipse dominus Raphael eandem reponi in pristinas sententias procuraverat. Et tandem licet ipsa domina Navoyka, absolutione obtenta, summiserat se ad unum mensem pro termino peremptorio intentionem suam probare coram domino Administratore, qui eandem causam ad se advocaverat, eandem tamen probare non curavit. Domina autem Navoyka allegante per procuratores suos defectum huiusmodi in probanda sua intentione intervenisse, et petente se admitti ad probandum, et domino Raphaele respondente, non esse admittendum ex eo, quod iuxta duplex decretum et summissionem suam nihil facere curavit, et asserente, non prius absolvendum fore, donec decimam iuxta sententiam domini Sbignei Cardinalis et Episcopi Cracoviensis, quae in rem transivit iudicatam, reddat, et nihilominus ipse dominus Raphael motus precibus domini, consensit, quod eadem domina Navoyka probet intentionem suam, et dominus de consensu ipsius domini Raphaelis admisit ipsam dominam Nawoyka ad probandum modum reddendi dictae decimae, secundum quem ipsam decimam qui ipsius capax erat, reddebat infra hinc et festum Sancti Stanislai proximum pro termino peremptorio, alias ipsa deficiente in probatione ex nunc sponte et libere renuntiando quibuslibet appellationibus et remediis iuris, summittit et obligat ad reddendum decimam praedialem manipularem ipsi domino Raphaeli et ecclesiae suae Sancti Nicolai et promittit prioribus decretis et inde sequutis in omnibus punctis stare et parere coram domino Episcopo Cracoviensi, aut in absentia sui, suo in spiritualibus Vicario Cracoviensi generali. Praesentibus Laurentio de Wawrzinczicze et Bartholomeo de Gorka publicis imperiali auctoritate Notariis et praefati domini Episcopi Cracoviensis et ipsius Curiae scribis."

Fragment zapiski 5 , Numer strony/karty w źródle: 171

In quorum omnium et singulorum fidem et testimonium praemissorum praesentes literas sive praesens publicum Instrumentum huiusmodi notam in se continentes sive continens, per Notarium publicum et causarum coram nobis scribam infrascriptum subscribi et publicari mandavimus, nostrique sigilli iussimus appensione communiri. Actum et datum in Bodzanczin, nona mensis Maii, Anno Domini Millesimo Quadringentesimo quinquagesimo sexto, Indictione quarta, hora Tertiarum vel quasi, Pontificatus vero sanctissimi in Christo patris et domini nostri domini Calisti divina providentia Papae tertii anno secundo. Praesentibus ibidem circumspectis viris Magistris Laurentio Petri de Wawrzinczicze, Nicolao Sbroslai de Zyvanicze et Iohanne de Grabnycza publicis imperiali auctoritate Notariis, clericis Cracoviensis, Gnesnensis et Posnaniensis diocesum, Notariis et Curiae nostrae scribis, testibus ad praemissa vocatis specialiter atque rogatis.

Fragment zapiski 6 , Numer strony/karty w źródle: 171

(L. S. n.) Et ego Nicolaus Cristini de Lublin clericus Cracoviensis diocesis, publicus apostolica et imperiali auctoritatibus Notarius et negotiorum ac causarum coram reverendo in Christo patre domino Thoma Dei gratia Episcopo Cracoviensi praefato scriba, quia praedictarum literarum de et super nota praedicta petitioni et earum decreto, omnibusque aliis et singulis praemissis, dum sic ut praemittitur, agerentur et fierent, una cum praenominatis testibus praesens interfui, eaque omnia et singula sic fieri vidi et audivi: ideo hoc praesens publicum Instrumentum huiusmodi notam ut praemittitur, apud acta repertam in se de verbo ad verbum continens, manu propria scriptum exinde confeci, subscripsi et

Fragment zapiski 7 , Numer strony/karty w źródle: 172

publicavi et in hanc publicam formam redegi, signoque et nomine meis solitis et consuetis una cum praefati reverendi patris domini Thomae Episcopi Cracoviensis signeti appensione signavi, rogatus et requisitus in fidem et testimonium omnium et singulorum praemissorum.

Komentarz do fragmentu zapiski:
(Ex archetypo membranaceo. Sigillum pensile avulsum, restat solummodo taeniola membranacea. — Nr. Archiv. Univ. 8081.)