Full view of a note about event related to functions/offices/roles

Note fragment 1 , Page/tab number in the source: 183

XCIII. Vladislaus Rex Poloniae villam Węgrzce ad altare tituli Omnium Sanctorum in ecclesia cathedrali Cracoviensi pertinentem, de iure Polonico in ius Teutonicum transfert.
Cracoviae, Anno 1434, die 5 mensis Aprilis.

Note fragment 2 , Page/tab number in the source: 183

In nomine Domini Amen. Ad perpetuam rei memoriam sempiternam. Cum inter humanae naturae commoda nihil dignius memoria habeatur: opportunum existit, ut actus hominum literarum apicibus et testium annotatione perhennentur, ne lapsu temporis evanescant. Proinde nos Wladislaus Dei gratia Rex Poloniae nec non terrarum Cracoviae, Sandomiriae, Siradiae, Lanciciae, Cuyaviae, Lythphaniaeque Princeps supremus, Pomeraniae, Russiaeque dominus et haeres etc. significamus tenore praesentium quibus expedit universis, tam praesentibus quam futuris, praesentium notitiam habituris: quod ad instantes et humiles petitiones venerabilis Magistri Petri de Szyenno altaristae altaris Omnium Sanctorum in ecclesia cathedrali Cracoviensi, devoti nostri, nobis dilecti, villam ipsius Wangercze dictam, in terra et districtu Cracoviensi sitam, prout in suis graniciis longe, late et circumferentialiter est districta et limitata, de iure Polonico et quovis alio, in ius Theutunicum, quod Meydburgense dicitur, transferimus perpetuo duraturam, removentes ibidem omnia iura Polonicalia, modos et consuetudines universas, quae ipsum ius Theutunicum plerumque perturbare consueverunt. Eximimus insuper, absolvimus et perpetuo liberamus kmethones et quosvis dictae villae incolas ab omni iurisdictione et potestate omnium regni nostri Palatinorum, Castellanorum, Capitaneorum, ludicum, Subiudicum, Camerariorum, caeterorumque dignitariorum et officialium, ut coram ipsis aut eorum aliquo pro causis tam magnis quam parvis, puta furti, incendii, homicidii

Note fragment 3 , Page/tab number in the source: 184

et membrorum mutilationis seu quibusvis aliis enormibus excessibus citati minime respondebunt, nec aliquas poenas minime solvere tenebuntur, sed kmethones et incolae praedictae villae coram Sculteto suo, qui pro tempore fuerit, Scultetus vero coram haerede suo aut coram nobis vel Iudice nostro generali, dum tamen per nostram literam sigillo nostro sigillatam evocatus fuerit et citatus, et hoc si in reddenda iustitia negligens fuerit et remissus, extunc non aliter, quam suo iure Theutunico de se querulantibus respondere sit astrictus. In causis autem criminalibus seu capitalibus superius expressis Sculteto, qui pro tempore fuerit, in metis et graniciis eiusdem iudicandi, sententiandi, puniendi, plectendi, corrigendi et condempnandi plenam damus et tenore praesentium concedimus omnimodam facultatem, prout hoc ipsum ius Theutunicum in omnibus suis punctis, articulis, sententiis, conditionibus et clausulis postulat et requirit, iuribus autem nostris regalibus semper salvis. Harum quibus sigillum nostrum praesentibus est appensum testimonio literarum. Actum Cracoviae, feria secunda proxima post Conductum Paschae, Anno Domini Millesimo Quadringentesimo tricesimo quarto. Praesentibus reverendissimis in Christo patribus et dominis Sbigneo Dei gratia Cracoviensi, Iohanne eadem gratia Chelmensi Episcopis, magnificisque et strenuis Nicolao de Michalow Cracoviensi Castellano et Capitaneo, Petro de Pyeskowaszkala Cracoviensi, Sandiwogio de Ostrorog Poznaniensi et Szpythkone de Tarnow Sandomiriensi Palatinis et aliis fide dignis testibus ad praemissa. Datum per manus magnifici Iobannis de Conieczpole Cancellarii et reverendi in Christo patris domini Wladislai de Oporow Dei gratia Electi ecclesiae Wladislaviensis, Vicecancellarii regni Poloniae, sincere dilectorum.
Ad relationem venerabilis Laszothae Canonici Cracoviensis, Capellani nostri dilecti.

Comment to note fragment:
(Ex archetypo membranaceo, in tabulario D. Erasmi Niedzielski haeredis in Sledzieiowice asservato. Sigillum pensile avulsum.)