Full view of a note about event related to functions/offices/roles

Note fragment 1 , Page/tab number in the source: 233

Anno Domini 1540, die Saturni septima februarii, facta convocacione per rectorem magistrum Gregorium a Sthawyssyn, sacre theologie professorem etc., sub hoc tenore verborum: Egregie domine doctor et magister reverende. Sit tua dominacio hodierna die hora XVI in estuario Collegii maioris artistarum ad consulendum super duplici negocio satis arduo Universitatis nostre, primum de pecunia residua debitorum ab intestatis, alterum est de lapidibus per dominum Casper Bar resignatis Universitati, quos lapides domini consules nolunt tolerare in eo loco, ubi sunt, nolunt quoque eos emere ab Universitate, si sint venales. Detur omnibus decanis facultatum omnium et patribus senioribus, videlicet doctori Martino Ilkusz, Iacobo Cleparz, professoribus theologie, necnon doctori Martino Belze, Gregorio Schamothuli et Ioanni Sanok, doctoribus iuris canonici, sub pena non contradicendi et (pro)ut diligitis bonum commune nostre Universitatis.

Note fragment 2 , Page/tab number in the source: 233

De pecunia vero post intestatum dominum olim custodem Voynyczyensem derelicta et per ordinarium Universitati donata in debitis exigenda, que in magna iam parte in aliquot centum florenorum pro Universitate est extracta et de qua Collegium canonistarum in ambitu et aliis multis constructum est et adornatum, placuit omnibus, ut ex residuis extantibus debitis dominus Felix Porąmbskya, plebanus, pro suis maximis in exigendis illis debitoribus pecuniis diligenciis et fatigis im pensisque consolaretur et donaretur iuxta continendam litterarum, sibi sub sigillo rectoris datarum, quas quidem litteras ratas et gratas per omnia habere ex racionibus in eisdem descriptis voluerunt. De quo eciam ibidem prefatus dominus plebanus Porambsky ad presenciam rectoris et dominorum in convocacione existencium vocatus, factus est cercior et gracias egit debitas. In vim quoque execucionis premissorum

Note fragment 3 , Page/tab number in the source: 234

deputatus est ibidem magister Nicolaus Sądek, procurator Universitatis, ut nomine rectoris et dominorum in illa convocacione Universitatem representancium, accederet dominos Martinum Belza, Ioannem Sanok et Philippum de Cracovia, iuris pontificii doctores, qui successive erant debitorum et pecuniarum, per memoratum intestatum derelictarum, exactores per Universitatem deputati, ut colligerent regestra omnia perceptorum et a debitoribus extraditorum, ut deprehendi possint debitores extantes et quantum adhuc superest de debitis exigendis, ut certa possint assignari debita per prefatum dominum plebanum Porąbski pro sua contentacione dato sibi per Universitatem mandato sufficienti exigenda vel prout Universitati visum fuerit eundem iuxta promissionem sibi factam contentare. Hec facta sunt in convocacione prefata, presentibus ibidem cum rectore Universitatis eximiis ac reverendis patribus doctoribus et magistris Martino de Ilkusch, preposito ecclesie sancti Nicolai, Jacobo de Cleparz, decano ecclesie sancti Floriani, fratre Alberto de Ryczywol ordinis predicatorum, decano facultatis theologice eiusdem, sacre theologie professoribus, Gregorio de Schamothuly, utriusque iuris doctore, archidiacono Posnaniensi, Ioanne de Msthow, facultatis arcium decano et Nicolao de Schadek, baccalario theologie formato, canonico ecclesie sancti Floriani, prefate Universitatis procuratore etc.