Blick im Eintrag über Funktionen/Ämter/Beschäftigungen

Eintragsabschnitt 1 , Seite/Karte in der Quelle: 104

CCCCLVIII. Petrus Posnaniensis philosophiae et medicinae doctor, domum suam Cracoviae in platea Vistulana sitam, cum censibus quibusdam reemptionalibus, Collegio Maiori Universitatis Cracoviensis, medici pauperum sustentandi gratia confert.
Cracoviae, anno 1578, die 5. mensis Martii.

Eintragsabschnitt 2 , Seite/Karte in der Quelle: 104

A. D. millesimo quingentesimo septuagesimo octavo, die Mercurii, quinta mensis Martii. Reuerendus dominus Petrus a Posnania, philosophiae et medicinae doctor, ecclesiae s. Floriani in Kleparz praepositus, Cracoviensis, Vilnensis canonicus, coram reue- rendo domino Luca Podoski, praeposito Gnesnensi, canonico, in spiritualibus vicario et officiali generali Crac. et actis praesentibus personaliter constitutus, libere, nullo iuris aut facti errore seductus, sed maturo intra se fretus consilio, beneque deliberatus, palam et expressis verbis recognovit, se de domo sua lapidea propria, Cracoviae in platea vulgo dicta Vislna, a tergo domus lapideae ducalis et penes domum lapideam Kiernarowska consistente, aere suo proprio empta et coram iudicio S. Regiae Maiestatis in a. D. millesimo quingentesimo septuagesimo, feria secunda post festum s. Ioannis Baptistae celebrato
sibi resignata, et propter bonum publicum atque emolumentum miserabilium personarum privilegio atque praerogativis gratiosis per serenissimum olim Sigismundum Augustum, Poloniae regem, Varsaviae die decima nona Octobris anno millesimo quingentesimo sexagesimo nono dotata et pro medicinae doctore assignata, talem dispositionem et ordinationem perpetue valituram constituere velle praesentibusque eandem facere in eum, qui sequitur, modum. Quod videlicet imprimis ab eadem domo lapidea abalienat, amovet exnunc in perpetuum tanquam nullum ius habentes omnes et singulos suos consanguineos, affines et alios quosvis propinquos ex ea causa, quia ipse domum eandem lapideam suprascriptam non ex aliqua paterna aut materna vel consanguineorum vel affinium bonorum successione aut devolutione consecutus est, sed propria pecunia assiduis et gravissimis laboribus suis per Dei gratiam acquisita emit. Deinde domus praefatae lapideae dispositionem, gubernationem praefatus reuerendus dominus Petrus medicinae doctor totum et integrum ius, dominium, proprietatem et haereditatem eiusdem domus, quod sibi ad eandem domum pleno iure competere dignoscebatur, egregiis et venerabilibus dominis et magistris Maioris Collegii Universitatis Crac. dat, concedit, irrevocabiliter donat et incorporat tataliter omneque et integrum ius suum et totam iurisdictionem, quemadmodum ipsemet dominus doctor Petrus Posnaniensis habet et quandocunque habiturus in eadem domo esset, in eos transfert et transfundit ac condescendit perpetuo et in aevum. Quiquidem praefati praepositus, doctores et magistri Maioris Collegii domum eandem lapideam et secundum privilegium in libertatibus et praerogativis pro amore Universitatis conservent atque sese omnibus iis opponant, qui servitutem aliquam in eandem domum introducere vellent et ipsam quomodolibet gravare contenderint, sedulo, et sollicite curabunt ac eandem domum lapideam medicinae doctori Almae Universitati Crac. incorporato, quem maxime idoneum putabunt, ad inhabitandam et utifruendam sine quavis census exactione seu pensionis solutione gratis conferent et assignabunt, qui eandem domum ita gratis inhabitans suo sumptu a scopitibus et fumo, a scillicidiis et impluviis mundam et incorruptam conservare ac si quid in ea corruptum foret, quod grossis triginta reparari possit, ipsemet doctor inhabitans sine quavis mora

Eintragsabschnitt 3 , Seite/Karte in der Quelle: 105

et non expectatis decem, viginti aut triginta grossis expensis, sumptu suo reparare tenebitur. Ratione vero domus praefatae inhabitationis medicinae doctor pro tempore existens, pauperes aegrotos Cracoviae ubique locorum et in hospitalibus vel in suburbiis degentes vel Cracoviam aut suburbia causa recuperandae sanitatis et valetudinis undecunque venientes ac ipsum per se vel per submissas personas requirentes, absque quavis mercedis vel praemii exactione arte medica curabit curareque debebit ac tenebitur et toties eosdem visitabit, quoties ipsemet opus fieri videbit, idque se facturum sacramento iusiurandi coram provisore inferius specificando, firmabit. Qui sic eandem domum inhabitans de qualibet familia sua et inquilino suo iustitiam unicuique petenti administrabit et in defectu administrationis gravamen sentiens ad rectorem Universitatis recursum habebit, qui secundum leges, statuta, privilegia et conclusiones atque consuetudines Universitatis causam cognoscet et gravamen sitne necne diiudicabit. Quod si etiam in curandis et medendis pauperibus negligens aut non gratis hoc facere convictus legittime fuerit, vel ab ecclesia catholica Romana desciverit vel in decursu anni supra duos menses a Cracovia simul vel interpollatis diebus sine scientia et permissione provisoris eiusdem domus pro tempore existentis, absens fuerit, aliumque medicum loco sui aegrotos interim gratis curaturum, non reliquerit (pestis tamen tempore excepto, quo abesse poterit, donec periculosa lues grassabitur), extunc praefati praepositus, doctores et magistri Maioris Collegii Crac. eundem ex eadem domo et inhabitatione ipsius amovebunt amovendique et alium in locum eius substituendi toties, quoties opus fuerit, facultatem habebunt perpetuam. Quod si vero aliquo casu medicinae doctor haberi, qui eiusmodi conditionem suscipiat, non possit, extunc in hirurgum sub conditionibus superius de medico expressis, domum memoratam conferent tantisper, donec se obtulerit medicus eidem Universitati incorporatus, post cuius electionem idem hirurgus post tempus ipsi a communitate praefixum, cedet e domo medico cedereque debebit. Si vero nec hirurgus haberi possit, secundum industriam et prudentiam suam domum praedictam praepositus, doctores et magistri praedicti Collegii Maioris disponent et ordinabunt tantisper, donec alius medicus incorporatus haberi poterit et pecuniam ex locatione domus atque ex censibus infrascriptis reemptionalibus proventuris in eiusdem domus commoditatem et pios usus accommodando se dispositioni praesenti, dispensabunt, in quo eorum conscientias oneratas praefatus dominus Petrus Posnaniensis esse voluit. Postea quicunque hanc domum lapideam inhabitaverit eiusque usum fructum habuerit, sive ille medicus sive hirurgus aut conditionis alterius pro tempore alius fuerit, praedictorum dominorum praepositi, doctorum et magistrorum Maioris Collegii et provisoris infrascripti per eos electi superioritatem agnoscere debebit, et quemadmodum in aliis domibus Universitatis institutus est utiliter superintendens seu provisor, ita in eadem praefata domo fieri expedit. Vult itaque dominus doctor Petrus, ut per eandem communitatem Collegii Maioris talis superintendens seu provisor ex s. theologiae doctoribus eligatur, qui census inferius descriptos exigat ac expendat atque de regimine domus praefatae bono, honesto et debito possit esse sollicitus et qui aedificia ruinosa, dum per medicum aut quempiam alium eandem domum inhabitantem, de labefactione ipsorum certior factus fuerit, restauranda et resarcienda impensis ad hoc inferius institutis diligentissime curet. Quoniam vero vix utile et expediens foret pauperibus aegrotis medicum, qui gratis eisdem mederetur, instituere, nisi sumptus quoque pro pharmacis comparandis providerentur, ideo ibidem in continenti praefatus reuerendus dominus Petrus Poznaniensis habens et tenens suis in manibus et coram reuerendo domino vicario et officiali Cracoviensi producens certas obligationes censuum annuorum reemptionalium, imprimis videlicet (censum) duodecem talerorum per grossos triginta tres pecuniae usitatae, coram officio et residentia consulari Casimiriensi anno millesimo quingentesimo septuagesimo septimo, feria quinta ante festum Omnium SS. proxima per honestam Sophiam olim providi Francisci Franek civis Casimiriensis nunc vero famati Nicolai Walkier, civis eiusdem civitatis, coniugem legittimam pro summa capitali trecen-

Eintragsabschnitt 4 , Seite/Karte in der Quelle: 106

torum flor. pecuniae et monetae currentis in regno reuerendo domino Petro doctori memorato venditum et insuper domo lapidea Casimiriae in platea Wieliciensi inter famatorum Petri Czarny consulis ex una et Urbani Rozyc, civium Casimiriensium, ab altera partibus sita, obligatum et inscriptum; item censum alterum annuum reemptionalem duodecem etiam talerorum, per grossos triginta tres numerando quemlibet, coram supramemorato officio et residentia consulari Casimiriensi anno, die, quibus supra, per providos Stanislaum et Adrianum Kłoskowie, cives Casimirienses, fratres germanos ac illorum uxores legittimas pro summa capitali trecentorum talerorum pecuniae in regno communis venditum ac in et super domo lapidea in platea Cracoviensi penes domum providi Stanislai Trzebinski civis ab una, et in acie angiporti ad ecclesiam s. Catherinae tendentis, parte ab altera sita, inscriptum et obligatum ac obfirmatum; item tertium censum annuum reemptionalem octo talerorum coram memorato officio et residentia consulari Casimiriensi anno, die eisdem, quibus supra, per providum Ioannem Okrutny et illius Hedvigem coniugem legittimam pro summa capitali ducentorum flor. monetae et numeri in regno currentis factum, venditum et super domo sua lapidea in circulo Maiori Casimiriensi inter domos Niedzielinska ab una, et providi Pauli Walega parte ab altera consistenti inscriptum, obligatum; item quartum censum annuum reemptionalem decem florenorum pecuniae et monetae communis, coram praefato officio et residentia consulari Casimiriensi a. D. millesimo quingentesimo septuagesimo octavo, feria quinta post festum Epiphaniarum proxima per honestam Reginam providi olim Ioannis Czeski civis et lanii Casimiriensis viduam relictam, pro summa capitali ducentorum quadraginta talerorum pecuniae usitatae factum et venditum, in et super duobus macellis seu institis laniariis Casimiriae inter alia macella, altero quidem inter famati Stanislai Haberkost alias Lex consulis et Alberti Czegielka haeredum, altero vero inter eorundem haeredum Czegielka et Ioannis Wolff civium Casimiriensium consistenti inscripta et obligata, accedente speciali consensu s. Maiestatis Regiae de dato Varsoviae in conventu generali regni die ultima Ianuarii a. millesimo quingentesimo septuagesimo octavo, ad actaque praesentia inferius inscripto et ingrossato, solvendum iuxta rathas in obligationibus expressas, praeposito, doctoribus et magistris communitatis Collegii Maioris in manus provisoris supramemorati, quibus exnunc prout extunc et e contra de hac ipsa summa et censu reemptionali condescendit et omne ius suum, quod hactenus habuit et tenuit perpetuum, in ipsos transfundit et resignat sub tali ordinatione et dispositione perpetuo servanda, ut praefatas summas cum censibus aliquando redimendas, iuxta originales inscriptiones collocent, disponant et assecurent atque ex censu reemptionali sic ut praemissum est, percepto, primum reponant quattuor florenos in moneta Polon. per mediam sexagenam computatos, quorum (duo) cedere debebunt communitati ad excitandam illius diligentiam in sufferendis oneribus supra positis pro refectione ipsi ad prandium apponendi in festo s. Petri ad vincula prima Augusti celebrari solito, et duo reliqui floreni provisori eiusdem domus pro tempore futuro, ne aggravet illum labor, de quo nulla praemia sequuntur temporalia, licet centuplum consequantur aeterna. Deinde ad resarcienda et reparanda praedictae domus aedificia, ad evincendosque census aliquo casu retinendos, provisor praefatus annuatim octenos florenos segregabit et fideliter conservabit, quoties opus fuerit expendendos, triginta autem florenos et tres cum sex grossis similis ut supra computationis, pro pharmacis iuxta medici suprascripti descriptionem, dispensandis et apotecario persolvendis, singulis quartualibus exponet et tam de perceptis, quam expositis officio praedictae communitatis die secunda Augusti, aut si impedimentum intercesserit, tertia Augusti rationem sufficientem in praesentia medici domus praefatae inhabitantis faciet. Quem apotecarium idem provisor communicato consilio cum praeposito et consiliariis communitatis Collegii Maioris et cum medico eandem domum inhabitante pium et competentem orphanis et miseris eligent et electum mutabunt, quotiescunque expedire videbitur. Quam domus praefatae et totius iuris atque iurisdictionis donationem

Eintragsabschnitt 5 , Seite/Karte in der Quelle: 107

transfusionem, incorporationem, ordinationem et dispositionem sic ut praemissum est, factam et recognitam et obligationes atque inscriptiones super censibus et summis reemptionalibus factas, una cum descensione et resignatione ipsorum in praefatos praepositum, doctores et magistros Collegii Maioris subsecutas memoratus dominus doctor Petrus autoritate ordinaria in omnibus et singulis punctis et clausulis atque conditionibus confirmari, ratificari, approbari roburque autoritatis ordinariae perpetuae firmitatis pariter et decretum apponi immunitatique ecclesiasticae adscribi ad actaque praesentia ingrossari per reuerendum dominum vicarium et officialem generalem suprascriptum, debita cum instantia petiit et postulavit. Et praefatus dominus vicarius ne per celerem approbationem et confirmationem cuipiam praeiudicium in suo iure facere videretur, ante omnia litteras in vim cridae contra omnes et singulos sua interesse ad praesens negotium quomodolibet putantes decrevit. Tandem anno, die quinta Martii venerabilis magister Ioannes Posnaniensis, sororinus praefati domini doctoris Petri Posnaniensis, mandato sufficienti exhibito, nomine principalis sui eiusdem domini doctoris litteras citationis in vim cridae per nos decretas, una cum executione illarum debita et legittima facta, exhibuit et contumaciam omnium et singulorum sua ex adverso ad iuris et iurisdictionis praefatae donationem, transfusionem, incorporationem, ordinationem et dispositionem domus praefatae lapideae sic ut praemissum est, factam, ad condescensionem et resignationem censuum reemptionalium supra recensitorum cum summis principalibus eisdem annexis, ipsis praeposito, doctoribus et magistris Collegii Maioris in perpetuum factis, interesse habere putantium, non comparentium neque illorum confirmationem impugnare curantium, accusavit ipsosque contumaces pronuntiari postulavit. Reuerendus dominus itaque vicarius et officialis Crac. id exigente eorum contumacia, satisfaciendo eiusmodi petitioni et postulationi, aequitati consonae, et bono publico utili, prius per principalem, deinceps per procuratorem et mandatarium ipsius factae, iuris et iurisdictionis praefatam donationem, transfusionem, incorporationem ordinationemque et dispositionem praefatae domus lapideae ac condescensionem et resignationem censuum reemptionalium cum summis capitalibus ipsis annexis, obligatorum et inscriptorum et reliqua in petitione et postulatione expressa, in omnibus punctis, clausulis, conditionibus et articulis, recepta tamen ante omnia recognitione sigilli civitatis praefatae Casimiriensis in litteris emptionis et venditionis praedictis subappressis, per duos testes honorabiles Ioannem Leopoliensem et Stanislaum Kiteczki iuris canonici baccalaureos, approbavit, confirmavit, ratificavit censusque annuos praefatos reemptionales alias na wyderkaff emptos, libertati et immunitati ecclesiasticae adscripsit et incorporavit, roburque autoritatis ordinariae pariter et decretum apposuit, ad actaque praesentia ingrossari mandavit. In praesentia reuerendi et venerabilium Stanislai Pincevii s. theologiae doctoris, decani ecclesiae collegiatae s. Floriani et Pauli Lodensis praepositi et Stanislai Skwierniewicensis, consiliarii, praefati Collegii Maioris Collegarum suo. et reliquorum doctorum et magistrorum totius communitatis Collegii Maioris nomine et speciali ut dicebant, illorum voluntate ac consensu unanimi ad id specialiter missorum et deputatorum, suprascripta omnia et singula praemissa donationis, transfusionis, incorporationis, ordinationis, dispositionis, condescensionis et resignationis capita et puncta pro grato et rato in perpetuum acceptantium, qui tam se, quam etiam totam communitatem Collegii Maioris pro tempore futuro ad observationem omnium et singulorum articulorum, conditionum in dicta ordinatione contentorum et specificatorum bona fide obstrinxerunt et perpetuo obligatos et obstrictos esse voluerunt. Praesentibus reuerendo, excellenti et nobilibus Sigismundo a Stęzyca canonico Crac., Martino Foxio medicinae doctoribus, Sebastiano Porembski et Iosepho Krzyzewski testibus ad id vocatis et rogatis.

Bemerkungen zum Eintragsabschnitt:
(Ex copia saeculi XVIII. - Nr. Archiv. Univ. 6048).