Full view of a note about event related to functions/offices/roles

Note fragment 1 , Page/tab number in the source: 92

CCCXLVIII. Henricus rex Poloniae collationem iuris patronatus ecclesiae Clepardiensis ad s. Florianum a Sigismundo Augusto rege Poloniae Universitati Cracoviensi factam, assensu suo comprobat.
Cracoviae, anno 1574, die 15. mensis Maii.

Note fragment 2 , Page/tab number in the source: 92

In nomine Domini amen. Ad perpetuam rei memoriam. Henricus Dei gratia rex Poloniae, magnus dux Lithuaniae etc. Postquam ex divina benignitate, per quam reges regnant et conditores legum iusta decernunt, atque ex unanimi omnium huius regni ordinum consensu in regem nominati electi essemus et tandem eadem benignitate divina felicibus auspiciis inaugurati sumus, statim muneris et officii nostri esse iudicavimus, omnibus et singulis reipublicae huius regni partibus, quocunque modo afflictis, quam primum gratia et munificentia nostra regali, quantumcunque in nobis situm esset, subvenire. Quoniam vero inter partes reipublicae huius regni nostri non contemnenda est pars Universitas Cracoviensis, tanquam seminarium omnium virtutum et doctrinarum in medio regni positum, uberrimos in omnes reliquas partes eiusdem regni fructus producens, temporum tamen iniquitate propter tenues redditus et steriles proventus in eisdem fructibus producendis decrescere incepit. Quam ob rem nos rex praedictus maiorum nostrorum serenissimorum regum Galliae utilissimum nobis innatum studium secuti et praedecessorum in regno Poloniae serenissimorum regum optimum exemplum in promovendis et locupletandis Universitatibus imitati, intercessionibusque senatorum huius regni et consiliariorum atque

Note fragment 3 , Page/tab number in the source: 93

dignitariorum nostrorum permoti, supplicationem rectoris, doctorum et magistrorum in eadem Universitate Crac. professorum, ut donationem iurispatronatus nostri praepositurae ecclesiae s. Floriani in Klepars per serenissimum olim regem Sigismundum Augustum Universitati eidem pro commodiori ipsius sustentatione in perpetuum factam, pro auctoritate et munificentia nostra regali confirmare et ad effectum multo iam tempore desideratum, sed hactenus impeditum, deduceremus, benigne accipientes et votis ipsorum deesse nolentes, principio eandem donationem serenissimi praedecessoris nostri insertam hic esse voluimus. Cuius tenor sequitur talis; (Sequitur privilegium Nr. CCCXCVIII huius Codicis praemissum). Quam quidem praefatae praepositurae ecclesiae s. Floriani in Klepars iurispatronatus donationem in perpetuum per serenissimum olim praedecessorem nostrum ita, ut praemissum est, factam et nobis salvam, integram et nullam suspitionis notam habentem, exhibitam, et hic proxime insertam, nos quoque pro Universitatis nostrae Crac. incremento ratam, gratam et firmam habentes, eandem approbamus, confirmamus et quantum in nobis situm est, etiam donamus et conferimus exnunc et in perpetuum. Ea tamen conditione interposita et adiecta, ut semel tantum et non amplius post cessum vel decessum moderni eius praepositurae possessoris, venerabilis videlicet Petri a Posnania, medicinae ductoris, eo iure patronatus libere pro arbitrio et voluntate nostra utamur, fruamur et realiter ac effectualiter perfungamur, praesentando pro una vice ad dictam praeposituram s. Floriani personam, quamcunque nobis visum fuerit, extra lectores et professores dictae Universitatis; post eiusmodi autem semel factam praesentationem nostram (quam nobis omni meliori iure pro nobis successoribusque nostris salvam et integram reservamus) et post decessum pacificum ex hac vita et praepositura illius praepositi, quem occurrente prima vacatione pro una vice praesentaturi sumus et per consequens post decessum omnium aliorum praepositorum deinceps sequentium nihil iuris in eiusdem praepositurae iurepatronatus nobis et nostris successoribus amplius relinquimus, sed totum in rectorem, doctores et magistros in Universitate Crac. publicos professores transfundimus. Quinimo omnes defectus eiusdem donationis, approbationis et confirmationis nostrae iuris et facti, si qui forte intercesserint, motu proprio ex gratia nostra erga doctos et doctrinas fideliter promovendos viros, speciali in forma plenissima supplemus, et approbationis, confirmationis et donationis nostrae praesens privilegium atque praeposituram praefatam cum ipsius omnibus bonis et redditibus mobilibus et immobilibus in protectionem et defensionem nostram et successorum nostrorum suscipimus temporibus perpetuis pollicemurque verbo nostro regio pro nobis et serenissimis successoribus nostris, quod post cessum vel decessum pacificum unius praesentati nostri ad eam praeposituram, omni iure patronatus ad eam nostro renunciabimus neque nos amplius in illud ingeremus, sed potius Universitatem ipsam in ea donatione tuebimur, ma- nutenebimus et pleno iure conservabimus. Quin etiam, si opus fuerit, et si rector, doctores, magistri dictae Universitatis protunc existentes, voluerint aut necessarium esse duxerint, tenebimur successoresque nostri tenebuntur posteaquam dictus praesentatus noster in pacifica eius praepositurae possessione extiterit, denuo aliis litteris nostris desuper conficiendis, hanc praesentem donationem nostram cum supradicta conditione factam, pure, simpliciter et plenissime absque ulla conditione adiecta confirmare, approbare et ratificare vel quatenus opus fuerit aut praedicta Universitas voluerit, aliam de novo puram, simplicem et plenissimam cum renunciatione in perpetuum totius iurispatronatus nostri et eam praeposituram dictae Universitati concedere et largiri, eamque re ipsa tueri ac conservare, ita et non aliter, prout ipsis rectori, doctoribus et magistris dictae Universitatis pro tempore existentibus expedire videbitur, non obstantibus in contrarium ullis aliis nostris, successorum nostrorum litteris sive forte antea, sive etiam in posterum tam scienter, quam ignoranter concessis aut concedendis, quas omnes adversus has praesentes litteras nostras, quas in omnibus et singulis earum punctis et clausulis firmiter

Note fragment 4 , Page/tab number in the source: 94

et inviolabiliter approbamus, nullius prorsus valoris aut roboris esse ac fore, ex certa scientia et voluntate nostra exnunc prout extunc et e contra volumus et praesentibus litteris nostris vim ultimae declarationis nostrae et serenissimorum successorum nostrorum habentibus edicimus ac pronunciamus et omnibus ac singulis, quorum interest, interesseve poterit in posterum, significamus. In cuius rei fidem et testimonium manu nostra praesentibus subscripsimus et sigillum nortrum appendi mandavimus. — Datum Cracoviae in conventu generali coronationis nostrae, quindecima Maii, ipsa die s. Sophiae a. D. millesimo quingentesimo septuagesimo quarto, regni vero nostri anno primo. Praesentibus reuerendissimis reuerendisque in Christo patribus dominis Iacobo Vchanski Gnesnense, legato nato et regni Poloniae primate, Stanislao Slomowski Leopoliense ss. metropolitanarum ecclesiarum archiepiscopis, Francisco Crasinski Crac., Stanislao Carnkowski Wladislav. et Pomeraniae, Adamo Conarski Posnan., Petro Myshkowski Plocense, Luca Koscieleczki designato Praemysliense, Petro Costca designato Culmen., Alberto Starozrzebski Chelmen., Dionysio Secigniowski Camenec. episcopis; necnon magnificis, generosis et venerabilibus Sebastiano a Mielecz castellano Crac. et Brzest. capitaneo, Petro a Zborow Sandomir. generali Crac. Stobnic. Camionacenseque, Ioanne Chodkewicz comite in Skliow et Mysh, castellano Viln. Samogitae capitaneo, Livoniaeque administratore generali et m. d. Lithuaniae archimarsalco campiductore necnon Caunense, Plotelense Telsouienseque capitaneo, Casparo Zebrzidowski de Wieczbork Caliss., Alberto de Lassko Syrad., Eustachio Volowicz castellano Trocen., m. d. Lithuaniae vicecancellario et Brzesten. Cobrinenseque, Ioanne Sierakowski Lancit. Praedecenseque, Constantino Constantinowicz duce Ostrosiae, Kiiovien. marsalco Volhyniae, Wlodimirienseque, Georgio Iazlowieczki de Buczacz Russiae, exercituum regni campestri praefecto, Lubaczov. Cerwonogrod. Sniatinenseque, Nicolao a Mielecz Podoliae et Grodecen. Novae Civitatis Korcyn, Stanislao Lawski a Strzegocin Masoviae et ibidem vices gerenti nostro, Nicolao Kischka de Ciechanowiecz Podlachiae et Drohic. Bielscenseque, Anselmo Gostomski Raven., Ioanne a Dzialin Culmen. et Brodianense, Fabiano Cema Mariemburg. Stargardienseque palatinis et capitaneis, Petro a Czarnkow Posnan. Babimostenseque, Ioanne Conarski Caliss., Ioanne comite a Tencyn Voinic., Lublin. Parczouienseque, Ioanne de Tomice Gnesn., Ioanne Costca de Stangenberg Gedanen. et terrarum Prussiae thesaurario, Pucen. Dersouienseque, Andrea comite de Gorca Medirecen. Gnesnenseque, Stanislao Shafraniecz de Pieskowa Skala Biecen. Lelouienseque, Ioanne Tarlo de Sczekarzouice Radom. Pilznenseque, Nicolao Ligęza de Bobrek Zauichost. Biec. Zidaczouienseque, Stanislao de Koscielecz Bidgost., Stanislao Gostomski Sochaczov. Rauenseque, Felice Paris Varsov. Cernenseque, Andrea Ilowski Viznen., Alberto Crasinski Sieprcense, castellanis et capitaneis; Andrea Opalinski regni nostri supremo marsalco, Valentino Dembienski de Dembiany cancellario, Petro Dunin Volski Gnesn. Posnanienseque canonico ac vicecancellario regni nostri, Hieronymo Buzenski de Buzenin thesaurario regni, zuppario Crac. Brzeznic. Krzeczovienseque nostro capitaneo, Nicolao Narushewicz m. d. Lithuaniae thesaurario, Andrea Zborowski de Zborow curiae regni nostri Radomienseque capitaneo nostro, Nicolao Christofero Radzivil duce in Olika et Nieswiez, curiae m. d. Lithuaniae marsalcis, Hieronymo Rozrazewski Ploc. Wratislavienseque praeposito ac maiore regni nostri secretario, Stanislao Sandivogio a Czarnkow commendore Posnan. et Ploc. Inovlod. Drahimenseque capitaneo, Stanislao Osowski scholastico Gnensn. curiae regni nostri referendariis, Erasmo Dembienski decano Crac. et cantore Sendomir., Martino Izdbienski de Rusiecz scholastico et vicario in spiritualibus generali ac officiali Crac., Adamo Pilchowski praeposito Varsov., Hieronymo Garuasski, Laurentio Gosliczki, Iacobo Vdrziczki canonicis Crac. et secretariis nostris, Alberto Sandivogio a Czarnkow Maioris Poloniae generali, Pisdrensique, Stanislao comite a Gorca Colnense, Alexandro Chodkewicz Grodnense capitaneis nostris et aliis quam plurimis dignitariis, officialibus, secretariis et aulicis nostris, ad praemissa testibus fidedignis. —

Note fragment 5 , Page/tab number in the source: 95

Datum per manus praefati reuerendi Petri Dunin Volski Gnesn. Posnan. etc. canonici et regni nostri vicecancellarii. — Henricus rex subscripsit. — Casparz z Powsina pisal.

Comment to note fragment:
(Ex archetypo membranaceo cum sigillo cereo rubro minoris Cancellariae regni, funiculo ex filis sericis coloris albi, glauci, viridis et coelestis contexto, appenso. — Nr. Archiv. Univ. 9729).