Blick im Eintrag über Bildung/Akademichen Graden

Eintragsabschnitt 1 , Seite/Karte in der Quelle: 166

CCCLXVIII. Literae significatoriales Thomae Rożnowski Canonici et Officialis generalis Cracoviensis, actum cessionis duorum censuum annuorum, super villis Klimuntow, Ieżow, Damianice et Kije inscriptorum, per Doctores Maioris Collegii Universitatis Studii Cracoviensis in rem Sophiae (Tarnowska) Krakowska dictae, monialis tertiae regulae ordinis S. Francisci, factae, in se continentes.
Cracoviae, Anno 1538, die 18 mensis Februarii.

Eintragsabschnitt 2 , Seite/Karte in der Quelle: 166

Thomas Roschnowsky Canonicus et Officialis Cracoviensis generalis, universis et singulis praesentibus et futuris, quibus expedit, tenore praesentium significamus: quomodo nos ad postulationem religiosae et deodicatae virginis Sophiae Cracowska tertiam regulam Sancti Francisci profitentis, certum actum ex Actis nostris de Anno Domini Millesimo Quingentesimo trigesimo septimo, die Lunae, vigesima sexta mensis Novembris, contentum, de verbo ad verbum, nihil addendo vel minuendo, quod facti substantiam immutaret aut intellectum variaret, duximus trassumendum, prout transsumimus per praesentes. Cuius tenor sequitur et est talis:

Eintragsabschnitt 3 , Seite/Karte in der Quelle: 167

„Anno quo supra, die Veneris, sedecima mensis Novembris, venerabiles domini Martinus de Ilkuseh Praepositus ecclesiae Sancti Nicolai extra muros Cracovienses, et Iacobus de Cleparz Decanus, Sacrae Theologiae Professores, Andreas de Cracovia Artium liberalium Magister, Canonicus ecclesiae Sancti Floriani in Cleparz, coram domino et apud Acta praesentia personaliter constituti, suo et aliorum dominorum Doctorum et Magistrorum Collegiatorum Collegii maioris Studii generalis Cracoviensis nominibus, non coacti nec compulsi, nec aliqua sinistra machinatione circumventi, sed sponte, libere et per expressum recognoverunt et quilibet eorum recognovit et fassus est: binos census annuos, unum videlicet viginti florenorum pecuniarum in et super bonis villarum Climunthow et Ieszow, per generosum dominum Stanislaum Czarnoczky sive Climunthowsky pro summa Quadringentorum florenorum venditum, et alium censum quindecim florenorum pecuniarum in et super bonis villarum Damyanycze et Kije per generosum dominum Ioannem de Olesznyky Vicezuparium Bochnensem pro summa Trecentorum florenorum venditum, emptos fuisse et esse propriis pecuniis religiosae virginis Sophiae Cracowska monialis de tertia regula Sancti Francisci, ipsosque census ad ipsam virginem Sophiam legitime pertinere, et praefatis dominis Doctoribus Theologis Collegiatis Maioris Collegii citra voluntatem dictae virginis Sophiae et ea inscia, in Actis reverendi domini Nicolai Bedlensky Scholastici, Vicariique in spiritualibus Cracoviensis generalis, inpertinenter et indebite inscriptos et obligatos esse. De praedictis itaque censibus et summis capitalibus, pro quibus dicti census empti sunt, praefati domini Martinus de Ilkusch, Iacobus de Cleparz Doctores, et Magister Andreas de Cracovia, suo et aliorum, dictorum Collegiatorum Maioris Collegii Studii generalis Cracoviensis nominibus dictae virgini Sophiae cesserunt, et perceptioni huiusmodi censuum ac summarum capitalium receptioni, dum et quando per venditores ipsorum censuum redimendo census venditos, repositae fuerint, expresse renuntiaverunt. Et in maiorem efficatiam cessionis et renuntiationis, literas venditionis et emptionis dictorum censuum, sub titulo et sigillo memorati domini in spiritualibus Vicarii obtentas, eidem virgini Sophiae tradiderunt, in praesentia ipsius virginis Sophiae huiusmodi cessionem acceptantis et petentis inscriptionem et obligationem censuum praeditorum dominis Doctoribus Theologis Maioris Collegii factam, cassari et anullari, et solutionem ipsorum censuum singulis annis pro festo Sancti Ioannis Baptistae flendam, una cum summarum capitalium receptione, dum et quando venditores easdem summas in redemptione censuum reposuerint, sibi quoad vixerit, aut illi vel illis, cui vel quibus ipsos census una cum summarum capitalium receptione in vita donaverit, aut testamentaliter legaverit, assignari, appropriari et adiudicari. Et dominus ne per celerem assignationem et adiudicationem alicui in bono iure praeiudicium inferre videatur, literas Cridae contra omnes et singulos sua communiter vel divisim interesse putantes, decrevit praemittendas, prout et praemisit. Tandem vero Anno quo supra, die vero vigesima sexta Novembris, termino Cridae adveniente, religiosae et deodicatae virginis Sophiae Cracowska nomine Magister Laurentius Wolborz procurator, reproductis literis Cridae debite, ut apparuit, exequutis, accusataque contumacia omnium et singulorum sua communiter vel divisim interesse putantium, citatorum et non comparentium, petiit praedictas inscriptiones et obligationes censuum praefatis dominis

Eintragsabschnitt 4 , Seite/Karte in der Quelle: 168

Doctoribus Theologis factas cassari et anullari, et census eosdem cum summis capitalibus, pro quibus dicti census empti sunt, dum et quando in redemptione censuum repositae fuerint, memoratae virgini Sophiae Cracowska, aut illi vel illis, cui vel quibus ipsa virgo Sophia in vita donaverit vel testamentaliter legaverit, assignari, appropriari et adiudicari. Et dominus in contumaciam citatorum non comparentium, nemineque contradicente, dictos census pro festo Sancti Ioannis Baptistae singulis annis solvendos, una cum summarum capitalium receptione, eidem virgini Sophiae quoad vixerit, vel cui vel quibus ipsa Sophia in vita donaverit vel testamentaliter legaverit, assignavit, appropriavit et adiudicavit, et venditoribus censuum huiusmodi assignationem et adiudicationem huiusmodi censuum intimare mandavit. Praesentibus nobilibus Alberto Mankolsky, Petro Dobrinski et Nicolao Wyzyczki Notario publico".

Eintragsabschnitt 5 , Seite/Karte in der Quelle: 168

Quae omnia et singula praemissa vobis omnibus et singulis, quibus interest, intererit, seu quomodolibet interesse poterit in futurum, quosque praesens tangit negotium, intimamus, insinuamus, notificamus et ad vestram et cuiuslibet vestrum notitiam indubitatam deducimus et deduci volumus per praesentes, hortantes vos in Domino, quatenus his praesentibus nostris transsumpti literis in iudicio et extra, ac ubivis locorum stetur, credatur et plenaria fides adhibeatur, tanquam ipsa originalia Acta in medium exhibita et producta fuerint. In quorum omnium et singulorum fidem et testimonium praemissorum sigillum nostrum praesentibus est subimpressum. Datum Cracoviae, die Lunae, decima octava mensis Februarii, Anno Domini Millesimo Quingentesimo trigesimo octavo.

Eintragsabschnitt 6 , Seite/Karte in der Quelle: 168

(L S. n.) Et quia ego Nicolaus Vyzyczki Andreae de Vyzycze, clericus Cracoviensis diocesis, utraque auctoritate Notarius publicus et coram reverendissimo domino Thoma Roschnowski Canonico et Officiali Cracoviensi generali causarum et facti huiusmodi scriba, praedictorum censuum cessioni et resignationi, et eorundem religiosae virgini Sophiae Cracowska assignationi, et praesentium literarum petitioni, omnibusque et singulis praemissis, una cum praenominatis testibus praesens interfui: ideo praesentes literas, manu alterius Notarii scriptas, exinde confeci et publicavi, signoque et nomine meis solitis subscripsi et sigilli appensione memorati domini Officialis communivi et consignavi, in fidem et testimonium omnium et singulorum praemissorum rogatus et requisitus.

Bemerkungen zum Eintragsabschnitt:
(Ex archetypo membranaceo, cum sigillo cereo rubro, taeniola membranacea appenso. Sigillum exhibet scutum cum stemmate Nowina dicto, in cuius ambitu inscriptio illegibilis. — Nr. Arch. Univ. 3362.)