Full view of a note about event related to education stage and academic degree

Note fragment 1 , Page/tab number in the source: 92

CCCL. Ordinatio Collegiaturae Astrologiae per Mathiam de Miechow Doctorem Medicinae A. 1522 fundatae, per Ioannem de Ercieszow Rectorem et Doctores Universitatis Studii generalis Cracoviensis immutata.
Cracoviae, Anno 1524, die 30 mensis Maii.

Note fragment 2 , Page/tab number in the source: 92

Iacobus de Erczyeschow Rector, et Ioannes Amicinus de Cracovia, Artium et Decretorum, Dei gratia Episcopus Laodicensis, Suffraganeusque, ac Stanislaus Byel de Nova civitate, Sacrae Theologiae Doctores, Canonici ecclesiae cathedralis Cracoviensis, caeterique Doctores et Magistri omnium facultatum Studii generalis Cracoviensis, universis et singulis praesentibus et futuris, quorum interest, vel quomodolibet in futurum interesse poterit, tenore praesentium significamus: quomodo annis paucis antelapsis, venerabilis et egregius vir dominus Mathias de Mye- chow Artium et Medicinae Doctor, praefatae ecclesiae cathedralis Cracoviensis Canonicus, pro virtute sua singulari et affectu, maximoque desiderio, quod habebat erga studium ac studiosos et philosophantes Universitatis nostrae Cracoviensis, certo die et anno, videlicet vigesima mensis Maii, Anni Domini Millesimi Quingentesimi vigesimi secundi, veniens personaliter in medium nostrum, ubi tunc iuxta eiusdem Universitatis Studii Cracoviensis consuetudinem, omnium facultatum Professores convocati et congregati fuerunt, liberaliter et sincere centum florenos pro fabrica seu completione librariae communis domus Maioris Collegii Artistarum, et alios centum florenos et triginta numeri et monetae Polonicalis, florenum quemlibet per triginta grossos computando, pro instrumentis horologii in eadem domo dedit et donavit: ibidemque eosdem ducentos et triginta florenos realiter in effectu coram nobis reposuit, et numerari iussit. Praeterea dominus Doctor censum annuum decem marcarum Polonicalium, a se emptum in praetorio Cracoviensi, una cum proprietate seu dominio directo summae capitalis, pro qua emptus est praefatus census, videlicet Quadringentos florenos Hungaricales boni et iusti ponderis, in eventum reemptionis dicti census Doctoribus et Magistris eiusdem domus maioris Artistarum dedit, donavit et resignavit, volensque ipse dominus Doctor, ut melius salubriusque utilitati ac honori Universitatis Cracoviensis, quae ex arte et facultate astrologica dudum antea et ad haec usque tempora, etiam apud exteras remotissimasque nationes nominatissima et honoratissima semper extitit, aeviterne consulatur, et quanto melius fieri posset, provideatur; quodque Magistri et Studentes tanto ardentius et diligentius huic scientiae insudant, quanto maiori gratia et privilegio eius Professores provisos et honoratos conspexerint: proinde dictus dominus Doctor Mathias omnem facultatem et potestatem ad dominos Doctores et Magistros

Note fragment 3 , Page/tab number in the source: 93

Maioris Collegii Artistarum, et quorum etiam potissimum interest, honorem, utilitatem et omne bonum Universitatis Cracoviensis ampliare et custodire, aliquem ex Magistris aut Doctoribus in ea arte et scientia magis peritum et idoneum ad Collegiaturam praefatam Astrologiae sic adauctam, vacatione ipsius occurrente, eligendi, praeficiendi et vocandi, spectare et pertinere voluit, certis tamen tunc ad- iectis conditionibus, quibus ipse Astrologus ad eandem Collegiaturam Astrologiae assumi seu vocari potuisset et debuisset. Quae tamen conditiones cum successu temporis et post obitum eiusdem domini Doctoris, inutiles et intolerabiles apparuerunt, nec aliquis inveniri posse videbatur in tota Universitate Cracoviensi, qui dictam Collegiaturam sub ipsis conditionibus suscipere vellet: venerabiles viri domini Ioannes Choienski utriusque Iuris Doctor, Archidiaconus, et Thomas Roschnowski, Canonici Cracovienses, praefati domini Doctoris ultimae eius voluntatis executores, considerata voluntate et mente ipsius domini Doctoris in testamento suo de hac ipsa Collegiatura descripta, pro commodo, utilitate et honore Studii Universitatis Cracoviensis, in mutationem aliqualem ipsarum conditionum consenserunt et praesentem ordinationem approbarunt, quae et perpetuo durare et magnum profectum Universitati Cracoviensi afferre posset, ita videlicet: quod postquam haec scientia non minus longam experientiam quam scientiam magnam requirat, et ob praefatae Collegiaturae antiquam ordinationem nedum in ea quispiam peritus diu permanere, sed quod magis absurdum et ab omni ratione alienum est, plerumque eius artis et scientiae penitus ignarum ad eandem Collegiaturam assumere, seu ex ordine vocare, contigerat; unde Universitas haec famata Cracoviensis iacturam non modicam honoris sui sustinebat, quando ab imperitis Iudicia fabulis anilibus et neniis quibusdam similia, in orbem ferme universum prodibant, contingebatque amicos et benevolentes Universitatis, ac eius artis peritos, saepissime ingemiscere, quod scientia tam nobilissima, ob incautam de hac Collegiatura ordinationem, toti mundo ludibrio saepe sine fronte exponeretur; quibus ignominiis cum aliter occurri non potuisset, quam dictae Collegiaturae ex antiquo ordinationis translatione: visum est Universitati et praefatis dominis executoribus, quatenus saepe dicta Collegiatura Astrologiae sic adaucta, sit deinceps vaga, ita quod ad eam non iuxta morem et ordinem antiquum Magistri ascendant vel vocentur, sed quod, vacatione eius occurrente, domini Doctores et Magistri Maioris Collegii Artistarum ad eam eligant Magistrum vel Doctorem quemcumque, sive etiam extraneum, magis tamen idoneum et doctum in ea facultate et scientia: ita, quod post electionem huiusmodi ad ipsam Collegiaturam, ipse Magister vel Doctor sic electus debet in eadem Collegiatura adminus per quindecim annos lectiones infrascriptas diligenter legens, et Iudicia prudenter pro honore Universitatis et ad utilitatem Christifidelium componens, sive in Minori, sive Maiori Collegio permanere. Ne tamen inde praegravetur unde relevari deberet, habebit huiusmodi Astrologus semper ascensum iuxta locum suum et vocationem suam, cum eadem tamen Collegiatura et ipsius oneribus ac diligentiis debitis: ita, quod si ipsum contigerit habere ascensum ad Maius Collegium infra dictos quindecim annos, extunc debet vocari ad Collegium maius cum sua Astrologiae Collegiatura, et ibidem explere onera debita. Poterit quoque in eadem Collegiatura in maiori domo permanere, et locum suum iuxta ascensum habere, usque ad Canonicatum Sancti Floriani. Et ubi valde idoneus et expertus fuerit, ex quo Universitatis honor augeretur, poterit per dominos

Note fragment 4 , Page/tab number in the source: 94

Doctores et Magistros ei ascensus et locus inter Canonicos Sancti Floriani reservari, donec voluerit in Astrologicae artis facultate laborare, ut tandem, vacatione occurrente Canonicatus Sancti Floriani, acciperet Canonicatum, et locum ante illum haberet, ante quem sibi competebat ius ascendendi et vocandi. Quando vero contigerit vacare dictam Collegiaturam, et inter extraneos Magistros non esset aliquis satis peritus et idoneus, sed in Minori Collegio inveniretur magis idoneus: tunc ille posset eligi et huic Collegiaturae praefici, sub conditionibus et modis praescriptis. Postquam autem contingat quempiam iuxta locum suum ex Minori Collegio ascendere, eo tunc tempore ultima Collegiatura maioris domus cederet pro aliquo in Minori Collegio. Quae quidem Collegiatura tunc rediret ad domum minorem, quando iterum ista Astrologiae cum electione alicuius rediret ad Minus Collegium; quod tunc evenire poterit, quando vacatione ipsius Astrologiae quomodolibet occurrente, in Maiori non inveniretur aliquis, qui vel peritus esset in hac arte, vel onus eius suscipere vellet; deinde aut extraneus, aut aliquis ex Minori ad eam eligeretur. Quodsi in Maiori Collegio esset et peritus, et ex omni parte idoneus, tunc ille posset ad istam Collegiaturam eligi, ita tamen, quod ad minus per quindecim annos in arte ista se exerceat, reservato sibi loco etiam inter Canonicos, iuxta ascensum seu vocationem suam. Ubi autem nullus, quod absit, satis idoneus reperiretur, qui conditiones suprascriptas acceptare vellet, extunc poterint domini Doctores et Magistri, iuxta conscientias suas, conditiones hic descriptas ad tempus moderare. Tenebitur autem huiusmodi Astrologus sic electus, ex ordinatione dicti domini Doctoris Mathiae, tribus annis continuis legere continuando libros Iudiciorum astrorum, videlicet: Quadrupartitum Ptolomaei, Hispalensem, Alcabicium, Octavam partem Hali Habenragel vel Gwidonem Bonati de revolutionibus annorum, Centiloquium, Albumazar de coniunctionibus maioribus, aut caeteros Astrologos iudiciarios. Voluitque etiam praefatus dominus Doctor Mathias, quod ipse Astrologus quarto anno legeret Almagestum Ptolomaei, postillando et exponendo per Almagestum abbreviatum, vel per Epitomata Ioannis de Monte regio, aut per Commentum Geber; et finito Almagesto in duabus commutationibus vel tribus, redeat ad libros iudiciarios tribus annis legendos, et sic alternatim ut legeret, quoad usque praedictam Collegiaturam tenebit. Praeterea quod talis Astrologus singulis annis scriberet et cum diligentia conficeret maius Iudicium anni, cum multis auctoritatibus, rationibus, allegationibus et experientiis. Simile quoque faciat Iudicium maiorum revolutionum, eclipsium et cometarum, et tale daret ad stubam domus Maioris Collegii Artistarum. Et etiam non inconveniens esset, quod simile daret ad praetorium Cracoviense pro dominis Consulibus, ut censum favorabilius solverent. Aliud etiam Iudicium abbreviatum, experientiis comprobatum, det in communem usum hominum. Actus etiam ordinarios in ordine suo visitet et eompleat, argumenta deducendo mathematice per propositiones Quadruvii, Euclidis, Ptolomaei et Perspectivas. Caetera quoque hanc facultatem concernentia, in laudem et honorem omnipotentis Dei et Universitatis celebritate, ac famae ampliatione, maiori cum fervore et diligentia exequatur. Ut autem ea praemissa dictus Astrologus facilius in effectum deducere possit, idem dominus Doctor Mathias de Myechow quosdam libros in librariam Maioris Collegii reponendos consignavit, et tali Astrologo secundum necessitatem ipsius mutuandos fore debere, videlicet: Almagestum Ptolo-

Note fragment 5 , Page/tab number in the source: 95

maei in pargameno et asseribus rubea cute superductum, cum quibusdam glossis et annotationibus in marginibus; item Almagestum abbreviatum et Commentum Geber super Almagestum Ptolomaei; item quindecim libros Euclidis cum commento et expositione Auaricii; item Theodosium de sphaeris; item Messahalach de causis orbis et motus eius; Perspectivam Alaceni, et caeteris in eodem libro; Planisperium; Theodosium de locis habitabilibus; Demonstrationes Iordani; item Cosmographiam parvam in tela pictam novam, et aliam Cosmographiam etiam parvam in pargameno pictam, pro tota Europa, cum gradibus coeli secundum longitudinem et latitudinem; item et tertiam Cosmographiam navigationis de Portugalia in Indiam, in magna cute pargameni etc. Postulans praeterea idem venerabilis dominus Doctor Mathias de Myechow, ut pro his omnibus beneficiis pie per Paternitatem suam Universitati nostrae concessis et largitis, Universitas nostra Cracoviensis provideret et ordinaret singulis Quatuortemporibus anni in perpetuum computandis, tunc quando peragi solet et obiri Missa Universitatis in Quatuortemporibus, ut etiam legeretur una Missa pro eo, videlicet in vita ipsius pro peccatis, et post mortem et decessum pro sacerdote defuncto. Quae omnia praedicta Universitas Cracoviensis grate, imo quam gratissime suscepit, approbavit, susceperuntque et approbarunt, ac omnia se facturos promiserunt, obligantes insuper se et suos successores ad huiusmodi executionem, intentionemque Paternitatis suae reverendissimae in executionem ponendam se submisit et submiserunt, ac superintendere huiusmodi lecturae per praefatum Collegiatum peragendae, et punitioni per Rectorem in defectu continuationis praemissorum. Datum Cracoviae, feria secunda intra Octavas sacratissimi Corporis Christi, Anno Domini Millesimo Quingentesimo vigesimo quarto, Rectoratus nostri sub sigillo maiori. Praesentibus tunc ibidem venerabilibus et discretis dominis Nicolao de Coprziwnycza Canonico Cracoviensi, Stanislao Bargel de Cazimiria, Decretorum Doctoribus, Erasmo Vanzam de Cracovia Artium Magistro et sacrorum Canonum Baccalario, Ioanne de Zomerfelth Artium Baccalario, Andrea et Ioanne de Cracovia, ministris Universitatis nostrae Cracoviensis, et aliis pluribus testibus fide dignis, ad haec specialiter requisitis et vocatis.

Note fragment 6 , Page/tab number in the source: 95

(L. S. n.) Et ego Stanislaus Machnatski Pauli de Machnathka, clericus diocesis Posnaniensis, authoritate apostolica Notarius publicus et coram memoratis reverendis patribus et dominis Rectore, Doctoribus et aliis Magistris scriba, quia praedictis census annui decem marcarum per olim venerabilem dominum Mathiam de Myechow empti in praetorio et crematorio Cracoviensibus, Universitati Cracoviensi donationi per executores testamenti ipsius domini Mathiae, et incorporationi sub conditionibus suprascriptis, ac eiusdem census per dominos Rectorem et Doctores ac totam Universitatem Cracoviensem, sub conditionibus et oneribus adiectis, susceptioni et approbationi, et praesentium decreto, aliisque omnibus et singulis praemissis, dum sic ut praemittitur, fierent et agerentur, una cum praenominatis testibus praesens interfui, eaque sic fieri vidi et audivi: ideo hoc praesens privilegium in vim publici Instrumenti, manu alterius legalis Notarii fideliter scriptum, exinde confeci et in hanc publicam formam redegi, signoque et nomine meis solitis

Note fragment 7 , Page/tab number in the source: 96

et consuetis communivi et consignavi, una cum sigilli Rectoratus Cracoviensis maioris appensione, in fidem et testimonium omnium et singulorum praemissorum requisitus et rogatus.

Comment to note fragment:
(Ex archetypo membranaceo, cuius sigillum avulsum. — Nr. Archiv. Univ. 349.)