Full view of a note about event related to education stage and academic degree

Note fragment 1 , Page/tab number in the source: 34

CCCXXIV. Bernhardus Golthschloer domum suam in platea Sanctae Annae, penes domum Collegii maioris Artistarum, Rectori et Universitati Studii generalis Cracoviensis, coram Officio scabinali Cracoviensi vendit.
Cracoviae, Anno 1511, die 10 mensis Octobris.

Note fragment 2 , Page/tab number in the source: 34

Nos Erasmus Bethman, Nicolaus Stano, Iodocus Glacz, Pancracius Gutthetter, Iohannes Wunsam, Petrus Krupek, Iohannes Bethman, Eustachius Italus, Stanislaus Aurifaber, Carolus Koczer et Stanislaus Belze, Scabini civitatis Cracoviae, recognoscimus publice per praesentes universis et singulis: quia coram Iudicio nostro bannito exposito, cui legalis Casper Krissker Advocatus noster praesidebat, Bernhardus Golthschloer cum consensu dominorum nostrorum Consulum, per spectabiles dominos Iohannem de Regulis Artium et Medicinae Doctorem et Iohannem Kysling, nomine totius Consulatus coram Iudicio nostro personaliter constitutos, domum suam ligneam in platea Sanctae Annae, penes domum Collegii maioris dominorum Artistarum iacentem, cum omnibus eiusdom iuribus, modis et limitibus, sicut eandem tenuit, habuit et possedit, venerabilibus et egregiis viris et dominis, videlicet Adae de Lowycz Artium et Medicinae Doctori et protunc almae Universitatis Studii Cracoviensis generalis Rectori, Nicolao de Koprzywnycza Sacrorum Canonum Doctori et protunc procuratori Universitatis praedictae, Simoni de Szyeprcz et Iacobo de Ilszla Artium Magistris et Collegiatis maioribus, nomine totius Universitatis id suscipientibus, cum plena faciendi et dimittendi potestate, liberam resignavit, promittens pro omni impetitione secundum ius civitatis, et recognoscens, iam sibi pro eadem satisfactum ad plenum in centum florenis per mediam sexagenam. Hac tamen conditione adiecta, quod domus Universitatis in platea Castrensi acialis, e regione ecclesiae Sancti Andreae sita, dicta Serwykaptur, quae prius ab omni exactione et aliis oneribus, tam civilibus quam regalibus, fuit libera et absoluta, iam de cetero aeviterne omnia huiusmodi onera

Note fragment 3 , Page/tab number in the source: 35

et exactiones, tam civiles quam regales, ut vigilias etc. ferre et tolerare, et civitatis obedientiae et imperio ac ditioni omnino subiacere, quae domus penes Collegium in platea Sanctae Annae sita et hodie Universitati resignata, tulit in se et habuit ac persolvit, et praefata domus in platea Sanctae Annae iam deinceps debet esse libera, et ab omnibus exactionibus et oneribus civilibus et regalibus instar aliarum domorum Universitati assignatarum penitus exempta et absoluta, iuxta privilegia talibus domibus concessa et tradita. Consentiente et annuente in ea omnia venerabili Magistro Iacobo de Ilszla praesentialiter constituto, Collegiato maiori et altarista Sancti Alexii, praefatae domus in platea Castrensi pro eo tempore possessore. In quorum omnium et singulorum fidem et testimonium, sigillum nostrum praesentibus est subappensum. Actum feria sexta ante Hedwigis, alias 10 Octobris, Anno Domini Millesimo Quingentesimo undecimo.

Comment to note fragment:
(Ex archetypo membranaceo, cum reliquiis destructi sigilli Officii Scabinatus Cracoviensis, in cera rubra expressi, taeniola membranacea appensi.— Nr. Archiv. Univ. 5665.)