Blick im Eintrag über Bildung/Akademichen Graden

Eintragsabschnitt 1 , Seite/Karte in der Quelle: 238

CCCXII. Ioannes (Konarski) Episcopus Cracoviensis, Custodibus ecclesiae collegiatae, S. Floriani potestatem investiendorum octo Professorum facultatis artisticae Collegii minoris in Universitate studii Cracoviensis, tribuit.
Cracoviae, Anno 1506, die 23 mensis Aprilis.

Eintragsabschnitt 2 , Seite/Karte in der Quelle: 238

In nomine Domini Amen. Quoniam universus mundus consistit in ordine et providentia divina, nec posset universitas rerum mundanarum subsistere, nisi congruus ordo et Dei bonitas maxima ipsam salubriter et efficaciter conservaret: ideo nos Ioannes Dei gratia Episcopus Cracoviensis, cupientes paterna sollicitudine tempore nostri felicis regiminis cultum Dei, ordinem, crescentiamque et ampliationem virorum benemeritorum ac Magistrorum eruditorum in civitate Cracoviensi, Universitateque eius conservare, augere, aut prout ex alto nobis conceditur, ampliare ; ad intercessionem venerabilis et egregii Magistri Mathiae de Myechow Artium et Medicinae Doctoris, nec non dicti Studii Rectoris, supplicationemque Magistrorum Minoris Collegii Artistarum nobis in hac parte oblatam, considerata in primis tenuitate proventuum ipsorum Minoris Collegii Magistrorum, ac aliis causis legitimis animum nostrum ad hanc ipsam benignitatem inducentibus: octo lectores in Artibus liberalibus, vulgariter octo Collegiatos dicti Minoris Collegii Artistarum nuncupatos, nam alii quatuor iam dudum per praedecessores nostros liberi sunt ab investitura Cancellariae nostrae, de nostra gratuita meraque liberalitate libertamus, remittimusque, et Custodi ecclesiae nostrae Sancti Floriani eos investiendos per

Eintragsabschnitt 3 , Seite/Karte in der Quelle: 239

manus impositionem gratis et sine quavis solutione, auctoritate nostra quotannis committimus nunc et perpetuo duraturos. Unum videlicet ad Collegiaturam et altare in ecclesia Sanctae Annae sub organo, tituli Sancti Donati, solutionem habentis de sutoribus Cracoviensibus; alterum ad altare in Ilkusch tituli Corporis Christi, salariati in fodinis salis Bochnensibus; tertium ad altare in ecclesia Beatae Virginis Mariae in Circulo Cracoviensi dotatum per Andream Rudowski, censum colligentis ex praetorio Cracoviensi; quartum in ecclesia nostra cathedrali Cracoviensi erectum olim per Doctorem Nicolaum Staw, cuius census sunt in Zuppis Vieliciensibus; quintum ad altare in ecclesia cathedrali Cracoviensi super villam Szidzyna; sextum ad Collegiaturam ecclesiae Sancti Adalberti in Circulo Cracoviensi; septimum ad altare Sancti Alexii in ecclesia cathedrali Cracoviensi, pro fundo habentis domum acialem ex opposito Sancti Andreae; octavum ad altare tituli Assumptionis Beatae Virginis Mariae in ecclesia collegiata Omnium Sanctorum in Cracovia, stipendiati et solvi consueti ex oppido Zathor. Vobis igitur venerabili ac egregio Magistro Nicolao de Pylcza Professori Theologiae et Custodi in ecclesia collegiata Sancti Floriani, per praesentes committimus et vestris successoribus Custodibus Sancti Floriani in aevum duraturis, ut totiens quotiens praefatorum octo minorum Collegiatorum vacatio, immutatio et investitura contigerit, eos investiatis, et vestri successores investiant, ita tamen, quod ad Collegiaturas praefatas non ascendat nec investiatur quispiam Magistrorum, nisi sit bene eruditus et valens in facultate talis Collegiaturae, et bene promptus ac expeditus ad legendum libros et lectiones in eadem, ad Oratoriam orator, ad Poetriam poeta, ad Astronomiam astronomus, sic in aliis Collegiaturis, sub fideli et plena examinatione valoris eorundem Collegiatorum. In quo vestram conscientiam oneramus, sicut in aliis quatuor iam dudum domino Decano Sancti Floriani ad investiendum commissis, ipsius conscientiam similiter oneramus, ut nonnisi in talibus artibus et facultatibus secundum titulos Collegiaturarum bene doctos et valentes lectores investiat; invalidi vero et ineruditi in Artibus, quas Collegiaturae titulus notat, non ascendant ad eas, nec investiantur; verum ascensus reservetur eis ex ordine ad sequentes, ut in mutua caritate et debito ordine conserventur, sub oneratione conscientiae et poena excommunicationis, si quis vestrum aut alius putans sese habere interesse, secus fecerit. In cuius rei testimonium sigillum nostrum praesentibus est appensum. Actum et datum Cracoviae in curia nostra episcopali, Anno Domini Millesimo Quingentesimo sexto, die vero Iovis vigesima tertia mensis Aprilis. Praesentibus ibidem venerabilibus et honorabilibus viris dominis Iacobo de Erczesschow Decretorum Doctore, Cancellario, Thoma Rosznowski Cracoviensibus Canonicis, Gallo Decano Kyelcensi et Wladario nostro Cracoviensi, Felice Sirchowski, Ioanne Iastrzambski et Augustino Baruchowski Notariis Curiae nostrae, testibus circa praemissa.
Stanislaus de Sandomiria Notarius Curiae eiusdem manu propria sspt.

Bemerkungen zum Eintragsabschnitt:
(Ex archetypo membranaceo, cuius sigillum pensile avulsum. — Nr. Archiv. Univ. 9175.)