Full view of a note about event related to education stage and academic degree

Note fragment 1 , Page/tab number in the source: 231

CCCX. Consules civitatis Cracoviensis, recepta a Mathia de Miechow Medicinae Doctore et Rectore Universitatis studii Cracoviensis, summa capitali 600 florenorum aureorum Hungaricorum, pro fundanda altera Collegiatura Medicinae in eadem Universitate, censum annuum 20 marcarum Polonicarum Professori Medicinae, simulque medico civitatis, inscribunt.
Cracoviae, Anno 1505, die 27 mensis Novembris.

Note fragment 2 , Page/tab number in the source: 231

In nomine Domini Amen. Ne ea quae aguntur in tempore, decrescente hominum memoria, temporis successu simul evanescant et pereant: dignum est, scrip-

Note fragment 3 , Page/tab number in the source: 232

turae testimonio, ut ad posteros perveniant, perhennare. Proinde nos Iohannes Boner protunc Proconsul, Iohannes Kletner, Seffridus Bethman, Iohannes Regulis Artium et Medicinae Doctor, Adam Swarcz, Iohannes Kyzinger, Petrus Mornstein et Mathias Felix Consules civitatis Cracoviae praesidentes, recognoscimus publice per praesentes universis et singulis praesentibus et futuris, harum notitiam habituris : quia de honestate et commodo rei publicae nostrae, prout tenemur, tractantes, ut bono et debito ordine singula regantur, disponentur et gubernentur, felixque capiant incrementum; attendentesque, quod venerabilis et egregius dominus Mathias de Myechow Artium et Medicinae Doctor, protunc Rector almae Universitatis Cracoviensis, zelo devotionis accensus, animae suae saluti intendens providere, ad Universitatem et civitatem praedictam Cracoviensem, in quibus etiam ab annis iuventutis suae crevit, promotusque existit, singularem gerens affectionem et benivolentiam, certum annuum censum pecuniarum pro erectione, dotatione et fundatione Collegiaturae in Medicinis in dicta Universitate Cracoviensi, et pro Doctore in Medicinis, qui singulis (h)ebdomadis legibilibus diebus lectiones in Medicinis in Collegio legeret, faceret et studentes in Medicinis edoceret, pro certa pecuniarum summa emere et comparere, dictumque censum pro erectione et fundatione Collegiaturae in Medicinis in dicta Universitate Cracoviensi dare, donare et incorporare vult et intendit; etsi nobis in pecuniis pro tunc pro re publica nostra acquirendis magna et pregnans incumberet necessitas: magis tamen ipsius praenominati domini Doctoris affectum et benivolentiam, quam ad almam hanc Universitatem et civitatem nostram gerit, animo pensitantes, habito super his frequenti ac maturo cum omnibus nostris Senioribus consilio ac matura deliberatione, et signanter eo respectu permoti, quod civitas ipsa Cracoviensis medicum appropriatum posset habere, et quod in dicta Universitate, ad quam studentes ex longissimis et diversis mundi partibus gratia studii in magna multitudine cum bonis eorum confluunt et concurrunt, unde civitati et rei publicae nostrae notabilis et continua accrescit fama et commodum; insuper quod unica duntaxat in Medicinis Collegiatura existat, Medicusque et lector eam possidens pro tam magno et numeroso populo spiritualium et saecularium utriusque sexus personarum sufficere non possit: eoque respectu ac praemissis et aliis de causis permoti, summam pecuniarum Viginti marcarum census annui ad praetorium civitatis Cracoviensis praedictae pertinentem, monetae et numeri Polonicalium in terra Cracoviensi communiter currentium, quadraginta octo grossos in quamlibet marcam computando, praefato domino Doctori Mathiae pro Sexingentis aureis Hungaricalibus veri et iusti ponderis, quos tunc ab ipso in toto et integraliter pro erectione, dotatione et fundatione Collegiaturae praefatae, omnium Seniorum nostrorum voluntate et assensu ad id specialiter accedente, tulimus, levavimus et percepimus. Quem quidem censum viginti marcarum praefatum vendidimus et tenore praesentium vendimus iusto et vero reemptionis titulo alias Widerkawff, quando nobis aut nostris successoribus praefatae civitatis Consulibus pro tempore existentibus videbitur et placuerit. Ut autem ipse dominus Doctor praenominatus aut alter post eum ad eam Collegiaturam per nos constituendus, in lectione et officio ipsius Collegiaturae non negligatur et lectionom suam debite possit continuare: promittimus nos et pro successoribus nostris Consulibus, eundem censum non exemere, nec a solutione huiusmodi census viginti marcarum

Note fragment 4 , Page/tab number in the source: 233

cessare tamdiu, donec in aliquo bono, tuto et securo loco similem censum viginti marcarum pro Sexingentis aureis Hungaricalibus praetactis invenerimus, et cum eundem comparaverimus, tunc et deinceps a solutione huiusmodi census erimus et debebimus esse liberi et absoluti. Ipsius nihilominus summae capitalis florenorum praefatae, ubicumque deposita aut census pro eadem emptus fuerit, semper debebimus et debemus de voluntate ipsius domini Doctoris praenotati esse tutores domini et patroni, et providere, ut sine aliqua negligentia ipse census praefatus solvatur, et sive in praetorio aut alibi talis census emptus fuerit, semper per manus nostras et successorum nostrorum Consulum tanquam patronorum, Medico nostro praenotato pro tempore existenti census ipse ad quaelibet anni Quatuortempora dari et solvi debebit. Quem quidem censum viginti marcarum una cum summa capitali praenotata, ipsi domino Doctori Mathiae praenominato, aut ipsius Collegiaturae praefatae successori per nos instituendo, reformamus, inscribimus et obligamus in et super emolumentis praetorii nostri, signanter super pensa nostra minore et domo pellificum et censibus nobis exinde dari et solvi consuetis; eundemque censum viginti marcarum de praetorio nostro, ut praemittitur, verbo nostro consulari sub bona fide promittimus et nos praesentibus obligamur, signanter ad quaelibet Quatuortempora anni per quinque marcas numeri et monetae praetactorum, nunc a Quatuortemporibus Sanctae Luciae proxime venturis primam incipiendo solutionem, et sic consequenter ad quaelibet Quatuortempora anni se proxime et immediate sequentia per quinque marcas, nullo modo aut aliqua causa se tuendo. Et si, quod absit, nos aut successores nostri Consules in solvendo dicto censu in toto vel in parte essemus aut forent negligentes: tunc Rector et Universitas studii Cracoviensis nos et successores nostros Consules coram quocunque iudice pro ipso censu monere et eundem censum pro Doctore praefato exigere poterit, donec eundem in toto et integraliter solverimus. Salvo etiam iure nostro et successorum nostrorum Consulum, Medicum idoneum locandi et ad ipsam Collegiaturam instituendi, dum et quotiens nobis et successoribus nostris Consulibus videbitur: ita quod sit Medicus vir idoneus, sufficiens pro cathedra ad legendum in Collegio, ad dandum consilia omnibus eum requirentibus paratus; et ut praedicta sufficienter consequi valeat, debet esse Artium liberalium Magister et Doctor Medicinae legitime promotus et Universitati Cracoviensi incorporatus; insuper ne circa laborem suum sit negligens, aut quod absit, in aliquo enormiter excedat, sit manualis et institutus duntaxat ad arbitrium nostrum, ut ex causa legitima posset removeri et alius quotiens foret opportunum, substitui. Insuper ipse Medicus tenebitur singulis diebus legibilibus lectiones in Medicinis legere; super cuius lectionibus et diligentia Rector et Universitas debebit attendere et negligentias per arrestationem solutionis punire, secundum Statutum Universitatis praedictae. Tenebitur etiam idem Medicus ex ordinatione ipsius domini Doctoris Mathiae praenominati, in qualibet septimana unum pauperem petentem exaudire et eidem super aegritudine vel aegritudinibus gratis consulere. In testimonium et evidentiam omnium praedictorum, praesentes literas nostras sigilli nostri subappensione iussimus communiri. Actum

Note fragment 5 , Page/tab number in the source: 234

et datum feria quarta post Katherinae Virginis et Martyris, Anno Dominicae Incarnationis Millesimo Quingentesimo quinto.

Comment to note fragment:
(Ex archetypo membranaceo, cum sigillo cereo rubro, taeniolis membranaceis appenso. Sigillum eiusdem typi ac sub Nr. II.— Nr. Archiv. Univ. 365.)