Blick im Eintrag über Bildung/Akademichen Graden

Eintragsabschnitt 1 , Seite/Karte in der Quelle: 89

CCCCXLVII. Sigismundus a Stężyca praepositus Sandecensis et canonicus Cracoviensis, executor testamenti Stanislai Rzeczyca iuris utriusque doctoris et decani Kielcensis, summam duorum millium ducatorum Maiori Collegio Artistarum Universitatis Cracoviensis confert.
Cracoviae, anno 1572, die 13. mensis Maii.

Eintragsabschnitt 2 , Seite/Karte in der Quelle: 89

In nomine Domini amen. Ad perpetuam rei memoriam. Nos Sigismundus a Stqzycza sacrorum canonum doctor, praepositus Sandecensis et canonicus Cracoviensis, reuerendi olim domini Stanislai Rzeczycza iuris utriusque doctoris, pro lingua Sclavonica in urbe Romania paenitentiarii apostolici, decani Kielcensis etc. pie in Christo defuncti, testamenti executor, universis et singulis, quorum interest, intererit seu interesse poterit quomodolibet in futurum, notum facimus et attestamur, quod cum ipse reuerendus olim Stanislaus Rzeczycza decanus Kielcensis etc. in omni vita sua id potissimum omni conatu et studio persecutus fuisset, ut de quam plurimis verae pietatis hominibus ac de republica ecclesiastica ac etiam totius huius regni bene mereretur, compendiariam ad id viam esse existimavit, si bonae indolis iuvenum, qui aliis vicissim prodesse postea et ad ecclesiae ministeria reique publicae gubernacula commode admoveri possent, industriam conatus-

Eintragsabschnitt 3 , Seite/Karte in der Quelle: 90

que ad capessendas honestas disciplinas omni ratione adiuvaret, cumque animadverteret multis rem angustam obstare domi, quominus liberalibus studiis vacare et aliquousque prodire queant, facultates suas honeste partas ad duo millia ducatorum Ungaricalium se extendentes, dum vixit, eo convertere desiderabat, ut census annuos perpetuos coemere potuisset, quibus complures bonarum litterarum studiosi iuvenes et praesertim ex familia sua progeniti, in hac Cracoviensi Academia sustentarentur. Verum tamen quoniam prius, quam pro praedicta summa pecuniae census desideratos coemit, ex hac vita, uti Domino placuit, migravit, a nobis itaque summa cum diligentia curatum est, ut voluntati ipsius doctoris Stanislai Rzeczycza satisfieret et census annui huiusmodi in eam rem compararentur et coemerentur, prout extant coempti et pro praedicta summa duorum millium ducatorum in auro comparati, qui census annui ad summam usque octoginta ducatorum, in auro Ungaricalium per grossos quinquaginta duos monetae Polonicalis computatorum se extendunt, principioque apud magnificum olim dominum Ioannem Bonar, castellanum Biecensem etc. census annuus viginti ducatorum auri Ungaricalis pro summa quingentorum ducatorum similium super bonis medietatis villae Osiek sub a. D. millesimo quingentesimo sexagesimo primo, feria secunda post festum sanctissimae Trinitatis; item apud generosos dominos Severinum et Fridericum Boneri etc. census annuus quadraginta ducatorum auri pro summa mille ducatorum super bonis integrae villae Osiek; item census annuus viginti ducatorum auri Ungaricalis pro summa quingentorum ducatorum similium super bonis oppido Bydlin et villis ad id pertinentibus, in a. D. millesimo quingentesimo sexagesimo sexto, feria secunda post dominicam Reminiscere proxima, coempti et in actis terrestribus Cracoviensibus inscripti. Quibus emptionibus et venditionibus accessit luculentus S. Maiestatis Regiae consensus et approbatio et immunitati ecclesiasticae ascriptio. Nos itaque doctor Sigismundus a Stązycza, executor praefatus, voluntati praefati olim domini doctoris Stanislai Rzeczycza, decani Kielcensis, innitentes, eos ipsos census, ut praefertur, coemptos, pariter cum eorum summa capitali duorum millium ducatorum in auro supraexpressa venerabilibus viris dominis praeposito, doctoribus et magistris Maioris Collegii Artistarum Studii Generalis Cracoviensis nunc et pro tempore existentibus cum omni iure et proprietate donandum, adiiciendum et appropriandum duximus, donamusque, adiicimus et appropriamus iure optimo et sempiterno a venditoribus suprafatis tollendum, levandum et percipiendum et de perceptis quietandum ac eosdem census perceptos et levatos in usum et sustentationem pauperum studiosorum scholarium praecipue tamen memorati olim domini doctoris Stanislai Rzeczycza nepotum et consanguineorum, iis autem deficientibus aliorum quorumvis egentium a familia licet dicti olim doctoris Rzeczycza alienorum scholarium hoc, quo sequitur, et non alio modo convertendum. Pecunia nimirum ex censibus annuis huiusmodi collecta, debebit per singulas septimanas perpetuo distribui pro victu studiosis iuvenibus et ad capessendas litteras idoneis in grammaticisque aliquousque progressis et exercitatis, in hac urbe et Academia Cracoviensi honestarum disciplinarum studio vacantibus, nepotibus quidem et consanguineis doctoris Rzeczycza per grossos duodecim, his autem, ut praefertur, deficientibus, tunc a familia ipsius doctoris Stanislai etiam alienis per grossos quattuor Polonicalis pecuniae aut alias iuxta arbitrium dominorum praepositi, doctorum et magistrorum eiusdem almae Universitatis Studii Cracoviensis septimanatim fiet distributio. Quorum inopiae circa susceptionem ad beneficii eiusmodi participationem erit necessaria debita consideratio, ut videlicet tales suscipiantur, qui nec de patrimonio, nec de beneficiis ecclesiasticis neque de quibusvis aliis censibus et proventibus in studiis commode se valeant sustentare, nullo tamen generis, conditionis aut nationis eorum discrimine habito, sed generaliter nobilium ac plebeiorum, saecularium ac sacris initiatorum, indigenarum regni et externorum eadem ratio habeatur. Nec quicquam referet, si in aliquo studiosorum contubernio ipsi studiosi taliter beneficiati maneant, sive in Collegio, sive in aliquibus sacrarum aedium scholis, dummodo vestitu decenti scholasticaeque condi-

Eintragsabschnitt 4 , Seite/Karte in der Quelle: 91

tioni convenienti, utantur nec sint suspecti de aliqua haeresi aut ne apud suspectos habitent. Insuper etiam deligendi erunt, qui ingenii, studii eruditionisque suae specimina aliqua declaraverint, egestatisque, honestatis ac religionis suae et a praeceptoribus suis et aliis fidedignis hominibus ad curatores praesentis ordinationis sufficientia attulerint testimonia iuraverintque se in omnibus religionis articulis cum catholica atque ipsa sancta Romana ecclesia consentire, nec unquam ab eadem scienter recessuros, haereticorum autem doctrinam et consuetudinem sedulo, quoad fieri potest, vitaturos esse. Caeterum hoc beneficio singulis studiosis a familia doctoris Rzeczycza alienis, ex eo participantibus, ultra tres annos diutius uti et participare non licebit, ut etiam alii simili inopia pressi in loca post triennalia studia amotorum, in participationem huius eleemosinae succedere possint. Nepotibus tamen et consanguineis memorati domini doctoris Rzeczycza toto etiam decennio singulis eo beneficio uti conceditur, quoad usque ad gradum etiam magisterii pervenire possint et perveniant. Atque tot numero ad participationem beneficii istius suscipientur, quot commode sustentari possint, ita videlicet, ut censuum annuorum ultra distributiones praedictas septimanales aliquid semper superesse possit atque in promptu habeatur, unde in lites, si forte occasione censuum retentorum aliquas, quod absit, exoriri contingat, necessario impendatur, unde etiam domini provisores et curatores huius ordinationis, qui census huiusmodi exigent dispensabuntque et universae ordinationi huic praeerunt, suam debitam habeant consolationem, penes quos etiam dominos curatores studiosos idoneos deligendi et ad participationem praedicti beneficii suscipiendi, minus autem idoneos amovendi plena et integra semper erit potestas. Qui quidem curatores ratione laborum suorum ex eisdem censibus resultantibus florenis sex pecuniae, per grossos triginta Polonicalis monetae computatis, annuatim contenti erunt et pro se tollent et percipient. Circa rationem autem per ipsos dominos curatores de censibus perceptis et distributis annuatim faciendam, nobilis Stanislaus Radziczki et famatus Petrus de Nova Civitate civis et syndicus consulatus Cracoviensis, memorati doctoris Rzeczycza nepotes vel eorum alter, quamdiu sunt in vivis, et post eorum decessum ex nepotibus et consanguineis eiusdem doctoris Rzeczycza superstitibus duo vel unus praesentes aderunt et ad hoc faciendum specialiter advocabuntur. Et quoniam beneficium datur propter officium, ideo congruum videtur, ut ipsi studiosi, quamdiu beneficio supramemorato participaverint, tamdiu singulis septimanis vigilias defunctorum ob salutem animae ipsius doctoris Stanislai Rzeczycza cum collecta pro sacerdote et altera generali Fidelium Deus omnium etc. die, quam commodiorem singuli elegerint, sub eorum conscientiae scrupulo privatim devote exorent. Quoniam vero etiam beneficium istud utilitatis publicae huius regni gratia, uti praemissum est, confertur, idcirco studiosi ex eodem participantes, qui fuerint felicis ingenii et praestantis doctrinae, dabunt operam, ut in contubernio studiosorum aliquo vel aliqua schola lectionem ex infrascriptis aliquam, quam quisque eorum duxerit eligendam, licet non ex obligatione aliqua vel mercede alia, sed exercitii animi gratia, cum scientia tamen et consensu dominorum curatorum ordinationis huius publice praelegant, utpote Philosophiam Alberti Magni, Parvulum philosophiae, Sphaeram materialem, Introductorium astronomiae, Musicam, Arithmeticam, Practicam, Computum ecclesiasticum, De accentibus ecclesiasticis, Artem poeticam et versificatoriam sive prosodiam, poema aliquod, Cosmographiam, Geographiam, Grammaticam Graecam seu Hebream. Tales autem lectores ultra septimanalem ipsorum et aliorum sustentationem singuli duobus grossis singulis septimanis adiiciendis consolabuntur. Hii autem nihilominus et omnes etiam caeteri participantes qualibet commutatione studii ternas lectiones publice lectas in eadem Academia Cracoviensi audient, duas videlicet in Artibus et Philosophia et tertiam, quam unusquisque voluerit, diebus autem canicularibus et in Quadragesima binas singuli, in quacumque Facultate voluerint, audient lectiones. Praeterea iidem participantes actus et disputationes publicas sabbatis et dominicis diebus frequentabunt, partes problematorum suscipient, exercitii animi gratia dis-

Eintragsabschnitt 5 , Seite/Karte in der Quelle: 92

putabunt atque opponentibus docte et prudenter respondere studebunt. Quam ordinationem suprascriptam nostram ad laudem et gloriam omnipotentis Dei et honorem sanctorum electorum eius, in animae suprascripti doctoris salutem, studiosorum pauperum consolationem et totius reipublicae huius incliti regni utilitatem aeviterne et perpetuo durare et permanere cupimus et volumus. In cuius rei fidem sigillum nostrum praesentibus est appensum. — Datum Cracoviae in domo residentiae nostrae, in confinio Collegii dominorum Canonistarum et aedis s. Mariae Magdalenae sita, a. D. millesimo quingentesimo septuagesimo secundo, die vero Martis, tredecima mensis Maii. Praesentibus ibidem nobili et discretis viris dominis: suprascripto Stanislao Radziczki bonorum magnifici domini regni cancellarii oeconomo, Sebastiano Woynicz et Mathia Calisz testibus circa praemissa adhibitis.

Eintragsabschnitt 6 , Seite/Karte in der Quelle: 92

(S. N.) Et ego Andreas Pirzchala a Strzezow clericus diocesis Cracoviensis, sacris apostolica et imperiali auctoritatibus notarius publicus, quia praemissis interfui eaque sic fieri vidi et audivi, ideo praesentis ordinationis litteras scripsi, subscripsi signoque et nomine meo communivi, in fidem praemissorum rogatus et requisitus. — Idem Andreas notarius manu sua subscripsit.

Bemerkungen zum Eintragsabschnitt:
(Ex archetypo membranaceo cum sigillo cereo rubro, taeniola membranacea appenso. — Nr. Archiv. Univ. 2418).