Blick im Eintrag über Bildung/Akademichen Graden

Eintragsabschnitt 1 , Seite/Karte in der Quelle: 4

Arenda domus Universitatis Bursa Vngarorum dicta.
Anno Domini 1580, die vero 4 Iulii. Venerabilis magister Paulus Lodensis, Collegii Maioris collega, sanctae Annae canonicus et procurator Universitatis proventuum, et honesti Paulus Czuntoron de terra Olstinski, pictor Cracoviensis, cum coniuge sua Barbara de Brzeg coram officio et actis praesentibus recognoverunt, quia cum consensu et approbatione magistri domini rectoris Universitatis, reverendi domini Martini Pilznensis, sacrae theologiae doctoris, ecclesiarum cathedralium |-et-| Cracoviensis et Wratislauiensis canonici, se fecisse inter se certum contractum occasione arendae domusb Universitatis, wlgo Bursa Vngarorum dictae, et in platea Fratrum appellata Cracoviae sittae, in hunc, qui sequitur, modum: Quia praefati Paulus Czuntoron cum Barbara coniuge sua eandem domum lapideam Universitatis tenebunt per modum arendae et non alio iure aut modo atque eam inhabitabunt per totum et integrum triennium proxime sequentes, quod incipiet a festo sancti Michaelis Archangeli in anno praesenti millesimo quingentesimo octogesimo [29 IX 1580 r.] et terminabitur in anno Domini millesimo quingentesimo octogesimo tertio, similiter in festo sancti Michaelis Archangeli [29 IX 1583 r.]. rationes cuius arendae et inhabitationis singulis annis numerabit in manus praefati aut pro tempore existentis procuratoris Universitatis proventuum florenos centum et decem in moneta Polonicali per mediam sexagenam computando ad duas ratas, videlicet pro festo sanctissimi Pascatis in anno Domini millesimo quingentesimo octogesimo primo [26 III 1581 r.] florenos quinquaginta quinque et pro festo sancti Michaelis Archangeli in anno eodem [29 IX 1581 r.] similiter quinquaginta et quinque florenos. Ad haec tenebitur intra hoc ipsum triennium cellarium in atrio ruinosum expurgare et propriis sumptibus atque expensis bene et competenter testudinare in aedificiisque eiusdem domus, tam lapideis quam ligneis, suo sumptu reparare tenebuntur ea omnia, quae grossorum quindecem sumptum non excedant. Onera quoque civilia, quae rector Universitatis pro tempore existens sustinenda iudicaverit, suis expensis sustinere tenebuntur. In eademque domo inquilinos fovebant primo et principaliter studiosos Universitati Cracoviensi incorporatos, iuramento et intitulatione consuetis; in defectu autem horum, sacerdotes vel artifices honestos cum uxoribus modestis, liberis et familia compositis, ne ex illis aliquid dedecoris et periculi Universitas in hac domo sua patiatur. Nec facient ex ea tabernam aut cauponam et reliqua eiusmodo, per quae haec domus militaris et Universitatis libera, ad onera civilia servilis esse cogatur. Quae omnia et singula praefati coniuges se praestaturos bona fide et sub rescissione arendae servaturos solenniter promiserunt et praesenti inscriptione obligaverunt. Nihilominus propter maiorem securitatem et certitudinem super iis omnibus manu tenendis et exequendis fideiussores, videlicet famatos cives Cracovienses Paulum Vadianum Hectorem, in circulo Cracoviensi manentem, et Baltasarum Gerszman, in platea sancti Nicolai manentem, qui libere et non compulsi ad omnia praemissa bona fide per praefatos coniuges arendantes implenda, onus fideiussionis in se susceperunt. Et si quid per praefatos coniuges arendantes, tam in solutione ratharum, quam in adiunctis conditionibus, neglectum fuerit et non satisfactum, praeter rescissionem arendae cum ipsis coniugibus Paulo atque Barbara faciendam ipsimet se soluturos et satisfacturos absque omni dilatione obligarunt, renuntiando ex nunc prout ex tunc omnibus exceptionibus atque remediis iuris et facti, in primo termino tanquam peremptorio ad quodcunque officii spirituale vel seculare citati fuerint responsuri et satisfacturi. Acta sunt haec praesentibus Joanne Siroczensi [et] Alberto Pilznensi studiosis, Simone Albimontano [et] Simone [recte: Stanislao] Zabloczki bedelis Universitatis.