Blick im Eintrag über Bildung/Akademichen Graden

Eintragsabschnitt 1 , Seite/Karte in der Quelle: 2

Magister Paulus Lodensis, Albertus Lopynski.
Anno Domini millesimo quingentesimo octogesimo, die vero Martis ultima Maii. Ex remissione causae per reverendum dominum Albertum Ninynski, custodem Sandecensem, canonicum archipresbyterum atque in spiritualibus vicarium officialium generalem Cracoviensem, mota est controversia coram reverendo patre doctore Martino Pilznensi, rectore Universitatis, inter nobilem Albertum Lopinski et Catherinam, ipsius coniugem legittimam, ex una et venerabilem magistrum Paulum Lodensem, Maioris Collegii collegam, ex altera partibus, occasione certarum iniuriarum, quas sibi praefatus nobilis Lopinski a praenominato magistro Paulo illatas asserebat, videlicet verba inhonesta et minatoria, invasionemque sui manu armata. Quem invasionem, dum uxor ipsius Lopynski pro sua virili sedare et reprimere per interpositionem sui inter utrosque studeret, tunc ex forti praessione et trusione sui per magistrum Lodensem facta, abersum se passam esse asserebat, et super hoc protestatione coram officio castrensi Cracoviensi factam proferebat. Ex adverso memoratus magister Lodensis omnia narrata, prout narrantur, vera esse negavit et multipliciter rem se aliter habere et se iniuriis potius affectura deducebat. Praefatus ita dominus rector, auditis propositis et responsis dictarum partium, ne istiusmodi causa plus aequo in dispendium partium proteraheretur, causam eandem arbitris ex utraque parte assumendis ad cognoscendum atque, si id fieri possit, ad componendum commisit. Et diem certam cognitionis seu compositionis in domicilio principalis arbitri, cum regressu causae ad officium rectoratus, si per arbitros non determinaret, assignavit. Quomodo vero per arbitros in causa nihil decerni potuit propter partium magna dissidentia, ideo praedictae partes coram officio praefati domini rectoris in praefixo illis termino iterum comparuerent. Et magister Paulus Lodensis ipsi Alberto Lopynski excommunicationes, quibus ad instantiam ipsiusmet magister Lodensis ob non responsionem libello articulato conventionali, occasione certarum iniuriarum contra Albertum Lopynski authoritate praefati reverendi domini vicarii et officialis generalis Cracoviensisin spiritualibus latas et fulminatas, obiecit et coram officii rectoris in scripto authentice exhibuit, propter quas locum standi in iudicio habere non posset. Albertus vero Lopynski per protestationis extractum authenticum, iniurias suas contra magistrum Lodensem urgebat, iustitiamque sibi administrari postulabat. Et dominus rector ad effectum causam eiusmodi celerius determinandi et eandem expediendi partibuis innuit, ut magister Lodensis ad absolutionem excommunicationum occasione certarum iniuriarum contra Albertum Lopynski obtentarum consentiret, et Albertus Lopynski protestationem in actis castrensibus factam adversus magistrum Lodensem cassaret. Cui quidem innuitioni, cum utraque pars acquievit et magister Lodensis absolutionem atque Albertus Lopinski cassationem ad officium rectoris obtulissent, et tunc quidem de iniuriis se mutuo accusassos et certis documentis suum intentum docuissent atque deduxissent, reverendus dominus rector, controversia partium diligenter examinta et deductionibus ipsarum trutinatis, decrevit nobilem Albertum Lopynski liberum esse debere ab inculpatione venerabilis magistri Pauli Lodensis a quibusdam praetensis iniuriis ipsi, ut dicebatur, illatis. Venerabilem vero magistrum Paulum Lodensem iuxta privilegia Universitatis, ab inculpatione nobili Alberti Lopynski et Catherinae, coniugis ipsius, purgatione canonica evadere debere, si et in quantum et quandocunque intra fatalia iuris hoc fieri per ipsum praefatus Albertus Lopynski cum uxore sua praedicta postularent. Actum in loco solitae residentiae nostrae Collegii Maioris, anno et die, quibus supra. Praesentibus reverendis, venerabilis, discretis domino Jacobo Cromfeltio, iurisperitorum collegiato, magistro Stanislao Radossicio, iurisperitorum licentiati et collegiato, magistro Andrea Zielienscio, sanctae Annae Cracoviae decano, magistro Nicolao Czierwienscio, collegis maioribus eiusdem ecclesiae collegiatae canonico, tunc ad officium rectoris causas habentibus, Joanne a Szyrocz, Alberto de Pilzno studiosis, Simone Albimontano, Stanislao Zabloczki bedellis Universitatis.