Pełny podgląd zapiski o zdarzeniu dotyczącym pełnionych funkcji/urzędów/ról

Fragment zapiski 1 , Numer strony/karty w źródle: 23

CCCXC. Ioannes Korcbok Witkowski decanus Gnesnensis, scholasticus Plocensis et canonicus Cracoviensis censum annuum reemptionalem 52 florenorum in molendinis quibusdam et macellis laniorum Cracoviensibus sibi inscriptum, Contubernio pauperum studiosorum Cracoviensi confert.
Cracoviae, anno 1554, die 20 inensis Iulii.

Fragment zapiski 2 , Numer strony/karty w źródle: 23

Anno Domini millesimo quingentesimo quinquagesimo quarto, die Veneris, vigesima mensis Iulii, reuerendus dominus Ioannes Corzbokg Vithkowski decanus Gnesnensis, scholasticus Plocensis et canonicus Cracoviensis, coram reuerendo domino vicario et apud acta praesentia personaliter constitutus, volens apud omnes testatum relinquere, qua benevolentia ergo studiosos Contubernii Pauperum Cracoviensis semper fuerit, censum annuum quinquaginta duorum florenorum numeri et monetae Polonicalium, per ipsum pro summa mille florenorum pecuniae in molendinibus (s) regalibus Camienni et Dembni dictis, in valvo (s) ante portam Sutorum sitis, et maccellis laniorum in civitate Cracoviensi, apud generosos dominos Andream et Iacobum Bonarowie, eorundem molendinorum et maccellorum tenutarios et possessores, cum consensu S. R. Maiestatis emptum et ad acta praesentia anno praesenti, die vero vigesima secunda Maii inscriptum, studiosis supradicti Contubernii Pauperum Cracoviensis dedit, donavit et per seniorem et consiliarios dicti Contubernii Pauperum Cracoviensis singulis quartualibus per tredecim florenos pro communi mensa eius Contubernii perpetuo tollendum, percipiendum de eoque quietandum concessit; successu vero temporis cum huiusmodi census quinquaginta duorum florenorum pecuniae ab ipsis dominis Andrea et Iacobo Bonarowie aut eorum successoribus, dictorum molendinorum et maccellorum possessoribus, ex praedictis molendinis et maccellis reemptus fuerit, extunc praedicta summa mille florenorum in manus venerabilium dominorum rectoris et doctorum ac magistrorum Studii generalis Cracoviensis reponi debebit, pro qua summa mille florenorum pecuniarum dicti domini rector, doctores et magistri similem aut maiorem censum pro communi mensa praedictorum studiosorum Contubernii Pauperum Cracoviensis in aliquo loco tuto comparare et coemere debebunt et tenebuntur. Ut autem ipse dominus Ioannes Corzbokg pro huiusmodi sua benignitate a praedictis studiosis Contubernii Pauperum aliquam referat gratitudinem, voluit, ut praedicti studiosi pro tempore existentes, singulis ferii sextis missam de quinque vulneribus Christi per sacerdotem per ipsos ordinandum, in estuario communi praedicti Contubernii legendam volentes audiant, initio autem singulorum mensium missam superspecificatam proxima quaque Dominica vocibus consonis praecanente ex

Fragment zapiski 3 , Numer strony/karty w źródle: 24

studiosis aliquo per seniorem praedicti Contubernii deputando, decantent, non volentes tantum sed iussi etiam ac obstricti poena unius grossi in eos, qui non adfuerint, proposita, in quibus quidem missis tam legendis quam cantandis sacerdotes collectas unam de quinque vulneribus Domini, secundam pro peccatis, tertiam pro salute parentum ipsius, praedicti vero studiosi pro tempore existentes, quinque orationes dominicas totidemque salutationes ac unum Symbolum vivente ipso domino Ioanne Corzbok pro peccatis ipsius, cum autem in vivis esse desierit, pro eius parentumque illius animarum salute interponent. Ne autem et familia ipsius domini Ioannis Corzbokg tantae benignitatis expers fiat, voluit idem dominus Ioannes Corzbokg, ut quilibet ex armis et genealogia ipsius domini Ioannis Corzbokg ac domo Vithkowo duntaxat, diocesis Gnesnensis, qui praedictum Contubernium Pauperum inhabitare voluerit, potiori habitatione in praedicto Contubernio gaudeat ac locum circa tabulam primum post baccalaureos obtineat; praedictique studiosi seu senior singulis quartualibus unum grossum contionatori, qui contionem in missa ad Universitatem Studii generalis Cracoviensis habebit et commemorationem tanti beneficii per ipsum dominum Ioannem Corzbog in supradictos studiosos praestiti faciet, dent et tribuant. Ad quod venerabiles et nobiles ac discreti domini Foelix a Sierpcz, senior, Albertus a Siecziechow artium magistri, Ludovicus Iaroschowski, Mathias a Lowicz consiliarii, Andreas Vempierski carbonarius, Franciscus Gaiowski, Stanislaus Zniczki, Ioachimus Rodolphi Opoliensis, Paulus a Pakosth, dicti Contubernii studiosi per communitatem Bursae praefatae electi et deputati, se et alios studiosos praesentes et pro tempore dicti Contubernii existentes, sub conscientiis suis et aliorum studiosorum submiserunt ac omnia suprascripta adimplere se manu stipulata obligaverunt. Praesentibus tunc ibidem reuerendis et nobilibus ac discretis viris dominis Sigismundo a Sthezicza iuris, rectore Studii generalis Cracoviensis, Nicolao Schadek, canonicis Cracoviensibus, Benedicto a Cozmin, archidiacono Sandomiriensi, theologiae doctoribus donationem huiusmodi acceptantibus et approbantibus; Ioanne Modleniski in Gieczno plebano, Alberto Modrzeiowski, Andrea Bogurski, Stanislao Dobrzki ad praemissa testibus vocatis specialiter et rogatis.

Komentarz do fragmentu zapiski:
(Ex transumpto Stanislai Szlomowski praepositi Calissiensis, archidiaconi Sandecensis et vicarii in spiritualibus Cracoviensis, de anno 1554. — Nr. Archiv. Univ. 362. S.)