Pełny podgląd zapiski o zdarzeniu dotyczącym pełnionych funkcji/urzędów/ról

Fragment zapiski 1 , Numer strony/karty w źródle: 122

LXIV. Vladislaus Rex Poloniae iuspatronatum ecclesiae parochialis S. Annae in Cracovia Universitati studii generalis Cracoviensis donat.
Cracoviae, Anno 1418, die 29 mensis Decembris.

Fragment zapiski 2 , Numer strony/karty w źródle: 122

In nomine Domini Amen. Ad regiae dignitatis munificentiam pertinet, pro republica bene agentibus et praecipue viris scientiis liberalibus et sacris Canonibus et scripturis theologicis eruditis, qui per literarum studia legendo et rudes seu indoctos instruendo et alios illustrando indefessis laboribus se exercent, virtutum praemia tribuere, et ut ipsi retributionis emolimenta percipiendo congrua, ad exequenda, quae ipsis incumbunt, alacriores reddantur, caeterique eorum exemplo etiam spe firma refecti, ad acquirendum bravium in eisdem scientiis ferventius elaborent. Proinde ad perpetuam memoriam rei, nos Wladislaus Dei gratia Rex Poloniae, nec non terrarum Cracoviae, Sandomiriae, Siradiae, Lanciciae, Cuyaviae, etc. Princeps supremus Lithwaniae, Pomeraniae, Russiaeque dominus et haeres, ad notitiam omnium et singuloram, quibus expedit, universorum tam praesentium quam futurorum, deducimus per praesentes: quod flagranti desiderio cupientes generale Studium in civitate nostra Cracoviensi per nos fundatum et certis privilegiis, libertatibus, iuribus, exemptionibus communitum, magis radicare ac firmare, ut dilatato sui tentorii funiculo, uberiores producat fructus, milites quoque et professores fidei catholicae generet, qui obscura dilucident, aenigmata reserent, errantes ad viam veritatis reducant, ac possint in die certaminis, dum et quando tam reipublicae seu regno nostro, quam orthodoxae fidei ingruerit, resistere ascendentibus ex adverso, ad laudem divini nominis, venerabilibus Professoribus, Doctoribus et Magistris almae Universitatis studii in civitate nostra Cracoviensi, nec noc venerabili et religioso viro Abbati de Claratumba alias de Mogila, pro tempore existenti, devotis nobis sincere dilectis, pure, simpliciter et irrevocabiliter, nec non in perpetuum nostra munificentia ac liberalitate regia speciali tradimus, concedimus et donamus per praesentes iuspatronatus ecclesiae parochialis Sanctae Annae in civitate nostra Cracoviensi, quod ius ad praedecessores nostros, recolendae memoriae Reges Poloniae, qui pro tempore fuerunt, et nos deinde atque hactenus pertinuit, et qui quidem Reges successive fuerunt et nos etiam fuimus hucusque in pacifica possessione vel quasi iuris antedicti, in ipsos quoque Professores, Doctores et Magistros, ipsamque Universitatem et Abbatem antedictos idem iuspatronatus transfundimus et transferimus, renuntiantes eidem iuripatronatus ecclesiae Sanctae Annae praedictae totaliter et omnino, nec aliquid pro nobis et nostris successoribus, Regibus Poloniae in eodem iure patronatus penitus reservantes. Ut autem omnia et singula praemissa robur firmitatis perpetuo obtineant, praesentes nostras literas scribi iussimus, nostrique maioris sigilli munimine roborari in fidem et testimonium omnium praemissorum. Actum Cracoviae, in crastino Innocentum, ipso videlicet die beati Thomae pontificis et martyris, Anno Dom-

Fragment zapiski 3 , Numer strony/karty w źródle: 123

ini Millesimo Quadringentesimo decimo octavo. Praesentibus reverendo in Christo patre domino Alberto Dei gratia Episcopo Cracoviensi, Regis Poloniae Cancellario, venerabilibusque et nobilibus viris Petro Wolframi Licentiato in Decretis, Scolastico Gnesnensi, Canonico Cracoviensi, in regno Poloniae et provincia Gnesnensi Camerae apostolicae collectore, Magistro Nicolao Hynczonis Canonico Cracoviensi, Thesaurario nostro, Nicolao de Michalow Palatino Sandomiriensi, Capitaneo Cracoviensi, Clemente Wantropka de Strzelcze generali terrae Cracoviensis Procuratore, multisque aliis nostris tam spiritualis, quam saecularis status fidelibus fide dignis. Datum per manus praedicti domini Alberti Episcopi Cracoviensis et venerabilis viri domini Iohannis Schaffranecz Decani et Canonici Cracoviensis, eiusdem regni Vicecancellarii, nobis sincere dilectorum. Ad relationem Serenissimae Principis dominae Elizabeth Dei gratia Reginae Poloniae.

Komentarz do fragmentu zapiski:
(Ex archetypo membranaceo, cum reliquiis minoris sigilli regni, cerei rubri, filis sericis coloris albi, rosei et nigri appensi.— Nr. Archiv. Univ. 9001.)