Pełny podgląd zapiski o zdarzeniu dotyczącym edukacji i stopni naukowych

Fragment zapiski 1 , Numer strony/karty w źródle: 179

CCCLXXV. Petrus Gamrat Archiepiscopus Gnesnensis, Episcopus Cracoviensis, altare tituli Assumptionis B. Mariae V. in ecclesia collegiata Sancti Floriani per executores testamenti olim Ioannis Kaffman Praepositi ecclesiae collegiatae Sanctae Annae fundatum, erigit.
Cracoviae, Anno 1544, die 10 mensis Decembris.

Fragment zapiski 2 , Numer strony/karty w źródle: 179

In nomine Domini, Amen. Petrus Dei gratia Archiepiscopus Gnesnensis et Episcopus Cracoviensis, Sedis Apostolicae Legatus natus ac Regni Poloniae Primas, manifestum facimus tenore praesentium, quibus expedit universis, praesentibus et futuris, harum notitiam habituris: quomodo venerabiles et egregii viri domini Stanislaus Borek Decanus, tutor, Iacobus de Cleparz Canonicus, Matheus Costen poenitentiarius ecclesiae nostrae cathedralis Cracoviensis et Nicolaus Shadek Sacrae Theologiae Professores, exequutores testamenti venerabilis olim domini Ioannis Kaphman Praepositi ecclesiae Sanctae Annae in civitate Cracoviensi et Canonici Sandomiriensis, zelo devotionis accensi, cupientes sincero affectu voluntatem ultimam praefati olim domini Ioannis Kaphman per omnia, ut decet, adimplere, nobis humiliter debita cum instantia supplicarunt, ut censum annuum undecim cum media marcarum monetae et numeri Polonicalis, in quamlibet marcam quadraginta octo grossos usuales computando, pro Quadringentis florenis usualis pecuniae apud famatos viros Albertum Sthalni sartorem et Barbaram uxorem, Nicolaum Thederla lanium et Catherinam coniugem, Felicem pistorem Vithek, Annam coniuges, Stanislaum Shthrussovicz et Apoloniam uxorem suam legitimam, cives Cazimiriensis civitatis, in vim reemptionis alias Nawiderkoph emptum et in domibus ipsorum in civitate Cazimiriensi obligatum, pro fundanda capellania perpetua seu altari, pro remissione peccaminum et salute animae praefati olim testatoris, ad gloriam vero Dei omnipotentis et Assumptionis beatissimae Mariae Virginis etc. etc. in augmentum cultus divini in ecclesia collegiata Sancti Floriani in Cleparz fundare, dotare, erigere, eique censum undecim cum media marcarum praedictum cum eius summa capitali ascribere, appropriare et incorporare auctoritate ordinaria dignaremur. Cuius quidem census inscriptionis et obligationis ac consensus in Actis nostris et civitatis Cazimiriensis libris contenti tenores sequuntur et sunt tales:

Fragment zapiski 3 , Numer strony/karty w źródle: 179

„Actum feria sexta ante festum Sancti Martini proxima, Anno a Nativitate Domini Millesimo Quingentesimo quadragesimo quarto. Coram nobis praesentia liter comparentes famati ac circumspecti Albertus Sthalni sartor, officii consularis nostri confrater, una cum Barbara conthorali sua legitima, Nicolaus Thederlalanius cum Catherina coniuge sua legitima, Felix Vithek pistor cum Anna consorte sua legitima, Stanislaus Sthrussouicz cum Apolonia legitima sua consorte,

Fragment zapiski 4 , Numer strony/karty w źródle: 180

praefati viri per se, uxores autem eorum per supra specificatos maritos et tutores suos legitimos, sua sponte recognoverunt palamque fassi sunt, se censum annuum undecim cum media marcarum monetae et numeri Polonicalis, in quamlibet marcam grossos quadraginta octo computando, ad quodlibet divi Martini festum quotannis solvendum, in vim tamen reemptionis fiendae, alias Na viderkow, manu coniuncta et indivisa vendidisse egregiis ac venerabilibus dominis Praeposito, Doctoribus, Magistris ac totae communitati Maioris Collegii Studii almae Universitatis Cracoviensis, pro Quadringentis florenis numeri et monetae Polonicalis, per triginta grossos in quemlibet florenum computando. Quos quidem Qua,dringentos florenos recognoverunt se manu coniuncta et indivisa praefati census venditores a supratacti census emptoribus in pecunia parata realiter et cum effectu numerasse, tulisse et percepisse; maioris tamen securitatis gratia memorati census dicti venditores supradictis dominis praefati census emptoribus manu coniuncta et indivisa inscribunt, reformant et assecurant huiusmodi summam capitalem Quadringentorum florenorum, nec non censum annuum undecim cum media marcarum, singulis annis pro singulis festis Sancti Martini modo praemisso solvendum, in et super omnibus bonis eorum tam mobilibus, quam immobilibus, quocunque in loco habitis et possessis, nullis penitus demptis seu exclusis, et nominanter praefatus dominus Albertus Sthalnii cum sua supradicta consorte, in duabus domibus suis, una inter domos Stanislai Boczan et Martini Spunth in platea Cracoviensi, et alia inter domos Lapczinski et Stanislai Boczan in Canino circulo sitis; Nicolaus Thederla lanius cum dicta coniuge sua, in domo inter domos Catherinae Niedzielanka et Nicolai Boczanek sita, et in macello laniali inter macella famati Valentini Clainer et Catherinae Markowa iacente; Felix Vithek pistor cum Anna sua conthorali legitima, in domo sua in acie penes domum Sipior in platea Vieliciensi sita, et in duabus iattis pistoralibus, inter alias iattas pistorum sitis; Stanislaus autem Sthrushouicz cum Apolonia coniuge sua legitima, in macello suo laniali, ab acie secundo, inter macella ab utraque parte Stanislai Boczan sito. Quem censum annuum undecim cum media marcarum supratacti census venditores praemissi census emptoribus pro singulis festis Sancti Martini singulis annis, incipiendo talem solutionem Anno Domini Millesimo Quingentesimo quadragesimo quinto, una cum suis successoribus, praefatorum bonorum possessoribus, sub intromissione et evacuatione in bona praemissa memorati census emptoribus, tanquam omnia iura transacta essent et omnes gradus iuridici prodiicti et obtenti fuissent, danda, manu coniuncta et in solidum unusquisque et indivisa se solvere una cum successoribus suis, nullis coloribus, remediis iuris, dilationibus aut quibusvis appellationibus praenominatos census dicti emptores evadendo, et se tuendo, usque ad restitutionem summae capitalis solvere se obligarunt; liberum quoque erit praefati census venditoribus aut eorum successoribus, reposita simul et semel Quadringentorum summa una cum censibus pro tunc retentis, bona sua eliberare, denuntiatione tamen, intimationeque quartuali uno anni prius facta, soluta summa capitalis circa Acta, etc. Extractum ex Actis consularibus Cazimiriensibus“.
Tenor vero aliarum literarum obligationis

Fragment zapiski 5 , Numer strony/karty w źródle: 180

Tenor vero aliarum literarum obligationis in Actis nostris contentae, sequitur et est talis:

Fragment zapiski 6 , Numer strony/karty w źródle: 181

„Anno Domini Millesimo Quingentesimo quadragesimo quinto, die Lunae, prima Decembris, Famati Albertus Stalni Consul, Nicolaus Tiderla lanius, Felix Vithek pistor, Stanislaus Sthrussouicz cives Cazimirienses principales principaliter pro se ipsis ad Acta praesentia personaliter constituti, non compulsi, nec coacti, sed sponte, libere et per expressum ac matura deliberatione intra se praehabita, confessi sunt et recognoverunt, se a venerabilibus dominis Stanislao Borek Decano Cracoviensi, tutore, Iacobo de Cleparz Canonico, Matheo a Costen poenitentiario ecclesiae cathedralis Cracoviensis, et Nicolao Shadek Sacrae Theologiae Professoribus, exequutoribus testamenti venerabilis olim domini Ioannis Kaffman Praepositi ecclesiae Sanctae Annae in civitate Cracoviensi, Quadringentos florenos pecuniarum numeri et monetae Polonicalis, quemlibet in florenum triginta grossos computando, recepisse, tulisse ac in prompta et numerata pecunia effectualiter levasse, ac pro eadem summa Quadringentorum florenorum pecuniarum, undecim cum media marcas pecuniarum, marcam in quamlibet quadraginta et octo grossos usuales computando, census annui in et super omnibus bonis eorum in civitate Cazimiriensi et alias ubicunque habitis et imposterum habendis, pro altarista altaris in ecclesia praefata Sancti Floriani per ipsos exequutores fundandi et dotandi, et per reverendissimum dominum Archiepiscopum Gnesnensem et Episcopum Cracoviensem feliciter modernum no viter erigendi, in vim tamen reemptionis alias Na widerkow, titulo venditionis vendidisse, eundemque censum undecim cum media marcarum resignasse. De quibus quidem Quadringentis florenis pecuniarum dicti cives Cazimirienses eosdem exequutores praefati olim Ioannis Kaffman quietaverunt et liberos dimiserunt. Quas quidem undecim marcas pecuniarum ipsi cives Cazimirienses se et suos legitimos successores, altaristis altaris huiusmodi noviter erigendi et aliis pro tempore existentibus, seu in defectu erectionis huiusmodi altaris novi, Praeposito Maioris Collegii Universitatis Cracoviensis, sub poenis et censuris ecclesiasticis per memoratum reverendissimum dominum Archiepiscopum Gnesnensem et Episcopum Cracoviensem, et suae reverendissimae Dominationis successores et alios Iudices ecclesiasticos in diocesi Cracoviensi pro tempore existentes, totiens quotiens in dicto censu undecim cum media marcarum altaristae solvendo fuissent remissi et negligentes, duntaxat trium dierum monitione praemissa, ferendis et fulminandis, singulis annis pro quolibet festo Sancti Martini Episcopi et confessoris, usque ad repositionem summae capitalis ipsorum Quadringentorum florenorum, submiserunt, inscripserunt et obligaverunt, prout submittunt, inscribunt et obligant, praesentibus Notariis Curiae “.

Fragment zapiski 7 , Numer strony/karty w źródle: 181

Nos igitur Petrus de Gamratis Dei gratia Archiepiscopus Gnesnensis, Episcopus Cracoviensis, Legatus natus et Regni Poloniae Primas, modum et formam in similibus observari solitum tenere volentes, literas citationis nostrae in vim Cridae ante omnia duximus praemittendas. In quarum termino comparuit coram nobis, Anno et die infrascriptis, Magister Laurentius Cizewski praedictorum exequutorum testamenti venerabilis olim domini Ioannis Kaffman Praepositi Sanctae Annae in Cracovia legitimus procurator, omnium et singulorum sua communiter vel divisim interesse putantium, literis Cridae legitime exequutis, coram nobis productis, citatorum non comparentium contumaciam accusavit, et in contumaciam illorum altare praedictum, uti petebatur, fundari, dotari, erigi, censum praedictum

Fragment zapiski 8 , Numer strony/karty w źródle: 182

cum summa principali eidem ascribi, incorporari et onera infrascripta altaristae pro tempore existenti imponi, debita cum instantia postulavit. Nos vero citatis non comparentibus, ad horam usque debitam legitime expectatis, in eorum contumaciam capellaniam perpetuam seu altare ad gloriam Dei omnipotentis, Assumptionis beatissimae Virginis Mariae et Sancti Stanislai martyris et pontificis, in ecclesia collegiata praenominata Sancti Floriani in Cleparz fundandam, dotandam, erigendam, altaristae et venerabilibus dominis Doctoribus et Magistris Maioris Collegii, altaris praedicti patronis, censum memoratum decem cum media marca- rum, cum eius summa capitali Quadringentorum florenorum, apud praefatos cives Cazimirienses emptum, attribuendum, incorporandum, eundemque censum cum eius summa capitali immunitati ecclesiasticae ascribendum duximus, prout fundamus, dotamus, erigimus, incorporamus et ascribimus in Dei nomine per praesentes, decernentes, ut pro eiusdem census et summae capitalis repetitione et omni actione nonnisi ad Iudicem ecclesiasticum, quotiens opus fuerit et necesse, semper recursus habeatur. Et quoniam beneficium datur propter officium: ideo statuimus, decernimus et ordinamus, ut altarista pro tempore existens duas Missas singulis hebdomadis per se, seu per alium presbyterum idoneum, sub conscientia sua legere et adimplere sit obligatus et astrictus, videlicet unam de Assumptione beatae Virginis Mariae, secundam Missam pro anima fundatoris. Ius patronatus autem et praesentandi venerabilibus et egregiis viris dominis Doctoribus et Magistris Maioris Collegii Artistarum Universitatis Cracoviensis, praesentibus et futuris existentibus, perpetuo reservamus et ascribimus. Qui quidem domini Doctores et Magistri praefati reverendissimis dominis Episcopis Cracoviensibus, pro tempore existentibus, ad hoc ipsum altare eligent et praesentabunt Magistrum eiusdem Collegii Artistarum Universitatis Cracoviensis; qui quidem Magister altarista existens, per se seu per alium idoneum presbyterum onera altaris eiusdem suprascripti adimplere, nec non singulis quartualibus Quatuortemporum perpetuis futuris temporibus Vesperas mortuorum feria quinta, in crastino vero feria sexta Quatuortemporum Vigilias mortuorum orare per se seu substitutum suum debebit. Statuimus insuper et ordinamus, ut idem altarista altaris praefati pro tempore existens, non nisi tres marcas census per ipsum singulis annis tollendas habeat; residuum vero census octo cum media marcas praefati Doctores et Magistri pro communi mensa singulis annis et temporibus perpetuis tollant, ceramque ad praefatum altare providere debent, nec non singulis annis perpetuis futuris temporibus grossos quatuor, videlicet singulis quartualibus Quatuortemporum cuiuslibet anni per unum grossum concionatori, qui fecerit concionem infra Missarum solennia, quae solent peragi in ecclesia Sancti Floriani in Cleparz in praesentia totius Universitatis, et post concionem exhortationem ad clerum pro praefato fundatore ac pro quodam alio sacerdote Michaele a Tharnow, ex cuius testamento nonnihil adpositum est ad summam principalem, pendere tenebuntur et erunt astricti. Census vero praefatus undecim cum media marcarum, per praefatos Albertum Stalni sartorem, Nicolaum Tederla lanium, Felicem Vithek et Stanislaum Sthrushouicz, et illorum successores ac alios censitas pro tempore existentes, a summa praefata Quadringentorum florenorum singulis annis pro quolibet festo Sancti Martini Episcopi solvi debet. Quibus omnibus robur et auctoritatem ordinariam impartimur perpetuo et in aevum, tenore praesentium mediante, prout in effectu venerabilem dominum Leonardum

Fragment zapiski 9 , Numer strony/karty w źródle: 183

a Visuka Sacrae Theologiae Doctorem, Custodem ecclesiae Sancti Floriani, ad eam ipsam praebendam seu altare per venerabiles dominos Doctores et Magistros Collegii Artistarum Universitatis Cracoviensis nobis praesentatum, per manus nostrae capiti suo impositionem instituimus, curam et administrationem spiritualium et regimen temporalium sibi in eodem altari in his scriptis committentes. In quorum omnium et singulorum fidem et testimonium praesentes literas scribi et per Notarium nostrum publicum subscribi, sigillique nostri appensione iussimus communiri. Actum et datum Cracoviae, die Mercurii, decima mensis Decembris, Anno Domini Millesimo Quingentesimo quadragesimo quarto. Praesentibus tunc ibidem reverendo, venerabili et honorabilibus dominis Bartholomeo Gandkowski Archidiacono Cracoviensi, Gnesnensi, Canonico Posnaniensi et Curiae nostrae Cancellario, Sigismundo a Sthazicza Iuris utriusque Doctoribus, Canonico Cracoviensi, Auditore, Mathia Grzimala in Dobrzechow, Andrea Hincza in Cadlub plebanis, Martino Zidowski, Notariis Curiae nostrae, testibus ad praemissa.

Fragment zapiski 10 , Numer strony/karty w źródle: 183

(L. S. n.) Et me Bartholomeo Siekierzeczki clerico Posnaniensis diocesis, sacra auctoritate apostolica Notario publico et coram memorato reverendissimo domino Archiepiscopo Gnesnensi et Episcopo Cracoviensi causarum scriba, qui decreto erectionis, summae capitalis et census libertati ecclesiasticae ascriptioni, ordinationi, aliisque praemissis, institutionis decreto, dum sic agerentur et fierent, praesens interfui, eaque omnia et singula sic fieri vidi et audivi: ideo has praesentes literas manu mea propria subscripsi et signo consignavi, ac de mandato suae Dominationis reverendissimae sigillum appensum feci in fidem praemissorum.

Komentarz do fragmentu zapiski:
(Ex archetypo membranaceo, cum sigillo cereo rubro, funiculo ex filis sericis coloris rosei, flavi et viridis contexto, appenso. Sigillum eiusdem typi ac sub Nr. CCCLXXIV. — Nr. Archiv. Univ. 1302.)