Pełny podgląd zapiski o zdarzeniu dotyczącym edukacji i stopni naukowych

Fragment zapiski 1 , Numer strony/karty w źródle: 66

CXXXI. Doctores Collegii Artistarum Universitatis studii generalis Cracoviensis rippam et agrum Kobiela dictum in villa Boszczyn cum Martino Byrowo de Przybynice pro novem mediis stadiis agrorum penes metas villae Belzow iacentibus, coram Officio terrestris iudicii Cracoviensis commutant.
In Proszowice, Anno 1446, die 2 mensis Iunii.

Fragment zapiski 2 , Numer strony/karty w źródle: 66

Nos Barthossius de Gory Iudex et Petrus de Czcikouice Subiudex terrae Cracoviensis generales notum facimus quibus expedit universis, praesentibus et futuris, praesentium notitiam habituris: quod in Iudicio terrestri Cracoviensi nostro coram certis Camerariis iudicialibus nostris constituti personaliter venerabiles et egregii Doctores et Magistri, videlicet Benedictus Hesse Decanus, Bartholomeus de Radom, Laurentius de Rathiborz Praelati et Canonici ecclesiae Sancti Floriani in Florentia alias in Kleparz, Doctores et Sacrae Theologiae Professores, caeterique omnes et singuli Doctores et Magistri Collegiati Artistarum Collegii in Cracovia ex una, et nobilis Martinus Byrowo de Przibinicze haeres ex altera partibus, sani mentibus et corporibus existentes, non compulsi neque coacti, sed de bona ipsorum voluntate talem contractum concordiae amicabilis pro bonis haereditariis subscriptis inter se ipsos fecisse perpetualiter recognoverunt, videlicet ita, quod ipse Martinus Byrowo novem media stadia agrorum penes metas haereditatis Belszow iacentia, cum omni iure et dominio pro rippa et agro dicto Cobyela cum prato eodem modo dicto in Boszczin, praefatis Doctoribus et Magistris et eorum successoribus Collegiatis Artistarum Collegii ibidem in Cracovia, et similiter praefati Doctores et Magistri ipsam rippam cum agro et prato iam dicto pro praemissis novem mediis stadiis agrorum sibi Martino Byrowo et suae posteritati ex utraque parte mutuo eis in totum dederunt, vendiderunt, commutaverunt et in perpetuum inde resignaverunt, haereditatem pro haereditate commutantes, talibus tamen conditionibus inter ipsos factis, scilicet ita, quod ipse Martinus per suam haereditatem et prata ibidem in Przibinicze viam liberam ad agros ut supra scriptos ipsis Doctoribus et Magistris et eorum hominibus dare debebit in aeternum tantum quantum ipsis fuerit opportunum; idem vero Martinus Byrowo molendinum aedificare seu construere et aggerem piscinae suae in praedicta rippa pro se potens est facere tam longe et late, velut eadem piscina inundaverit. Etiam praetactus Martinus aquam de eadem piscina sua antiquo alveo et non aliunde ad piscinam et ad molendinum ipsorum Doctorum et Magistrorum mittere tenetur, et viam communem de ipsa haereditate Przibinicze in Boszczin iuxta decursum antiquum eisdem Doctoribus cum Magistris et eorum hominibus dare debebit. Insuper iam fatus Martinus piscinam suam praedictam in Przibinicze infra hinc ad duos annos debet facere et eam perficere. Metae autem seu limites et gra- niciae inter praedictas haereditates Boszczin et Przibinicze debent esse iuxta anti-

Fragment zapiski 3 , Numer strony/karty w źródle: 67

quam consuetudinem, promittentes eis hinc inde rate, grate atque firme sub vadio centum marcarum praemissa ut supra scripta inviolabiliter tenere et in perpetuum observare. In cuius rei testimonium sigilla nostra praesentibus sunt appensa. Actum et datum in Proschouicze feria quinta in Octava Ascensionis Domini, Anno eiusdem Domini Millesimo Quadringentesimo quadragesimo sexto. Praesentibus his testibus nobilibus Iohanne de Iancouicze, Iohanne de Poborouicze, Stanislao Zidowca de Raczslauicze, Iohanne quondam de Woywanouicze, Nicolao Plasza de Syeczechouicze, Iohanne de Barczkow haeredibus, aliisque pluribus fide dignis etc.

Komentarz do fragmentu zapiski:
(Ex archetypo membranaceo, cum duobus sigillis cereis, taeniolis membranaceis appensis. Sigilla eiusdem typi ac sub Nr. CXVII. — Nr. Archiv. Univ. 44.)