Pełny podgląd zapiski o zdarzeniu dotyczącym edukacji i stopni naukowych

Fragment zapiski 1 , Numer strony/karty w źródle: 28

CXVII. Doctores et Canonici ecclesiae S. Floriani agrum in Książnice cum Nicolao de Kun­czyce (Kuniecki) pro simili agro in Kunczyce, ratione melioris dislimitationis ea­rundem villarum, coram Officio terrestris iudicii Cracoviensis commutant.
Cracoviae, Anno 1443, die 4 mensis Novembris.

Fragment zapiski 2 , Numer strony/karty w źródle: 28

Nos Barthossius de Gory Index et Petrus de Czcikouicze Subiudex terrae Cra­coviensis generales notum facimus quibus expedit universis, praesentibus et futuris, praesentium notitiam habituris: quod in Iudicio terrestri Cracoviensi nostro coram certis Camerariis iudicialibus nostris constituti personaliter honorabiles et illuminati domini Benedictus Hesse Decanus, Mathias de Labischin Custos ecclesiae Sancti Floriani in Florentia alias in Kleparz, Nicolaus Coszlowszky, Laurentius de Rathi­bor, Iohannes Puschca de Cracovia, Bartholomeus de Radom, Paulus Pyczkowszky Magistri Artium Collegiati Artistarum Collegii in Cracovia nec non Canonici dictae ecclesiae Sancti Floriani in Florentia ex una, et nobilis Nicolaus de Cuncicze hae­res ex altera partibus, sani mentibus et corporibus existentes, non compulsi neque coacti, sed de bona ipsorum voluntate talem commutationem perpetuam inter se ipsos pro agris subscriptis fecisse recognoverunt, videlicet ita quod ipse Nicolaus de Cun­czicze agrum suum ibidem penes antiquas metas et fossuras inter Cunczicze et Xang­nicze haereditates iacentem, usque ad fossuras aut palos infossos ex una parte; ex alia parte a via communi, quae ducit a Xangnice in ipsam villam Cunczicze in dextra parte, usque ad fossuras aut palos iuxta flumen factos; a fossuris vero aut signis versus fluvium factis, usque ad rippam eiusdem fluvii cum omni iure; pro agro a dextra parte viae eundo de Cracovia in Slomniky, penes metas dictae Cunczicze et Dzecanouicze haereditates iacente, similiter cum omni iu re, praefatis Magistris et ipsorum successoribus in totum dedit, commutavit et in perpetuum iudicialiter re­signavit, haereditatem pro haereditate commutando. Ipse vero Nicolaus de Cunczicze dictum flumen et rippam eiusdem fluminis pro se reservavit, tali tamen conditione in­terposita, quod si aqua destruxerit usque ad fossuras prope fluvium aut signa facta, extunc idem Nicolaus nihil sibi reservavit, nisi rippam et fluvium, prout superius dictum est; et similiter iam dicti Magistri agrum ipsorum, ut supra dictum, a dextra parte viae eundo de Cracovia in Slomniki, penes metas dictarum Cunczicze et Dze­canouicze haereditatum iacentem, cum omni iure pro agro ibidem in Cunczicze, qui ager iacet penes antiquas metas inter easdem haereditates Cunczicze et Xangnicze, prout superius scriptum est, praedicto Nicolao de Cuncicze et eius liberis legitimis in totum dederunt, commutaverunt et in perpetuum iudicialiter resignaverunt haere­ditatem pro haereditate commutantes, promittentes eis hic inde hanc commutationem ut supra factam rate, grate atque firme inviolabiliter tenere et in perpetuum obser­vare, etiam promittentes eis ex utraque parte, scilicet dicti Magistri occasione prae­-

Fragment zapiski 3 , Numer strony/karty w źródle: 29

tacti agri ipsorum a dextra parte viae iacentis eundo de Cracovia in Slomniky, ipsum Nicolaum de Cunczicze, et idem Nicolaus occasione agri sui antedicti penes anti­quas metas inter Cunczicze et Xangnicze iacentis, ipsos Magistros ab omnibus impe­dimentis atque dampnis quarumlibet personarum iuxta consuetudinem terrestrem Cra­coviensem ubilibet intercedere et relevare, nullis praescriptionibus ipsum Nicolaum evadentes. Insuper iam fati Magistri fideiusserunt nominato Nicolao de Cunczicze pro aliis duobus Magistris, videlicet Nicolao de Brega et Stanislao Sobnowszky, in hunc modum, quod dicti duo Magistri eandem commutationem, ut supra scriptum, debent inviolabiliter tenere et in perpetuum observare. In cuius rei testimonium si­gilla nostra praesentibus sunt appensa. Actum et datum Cracoviae, feria secunda proxima post festum Sanctorum Simonis et Iudae Apostolorum, Anno Domini Mil­lesimo Quadringentesimo quadragesimo tertio. Praesentibus his testibus nobilibus Stanislao de Mlodzeyowicze, Petro Saffranecz de Pyeschcowazkala, Marco de Mli­noga, Petro de Nowavyes, Nicolao de Damicze, Petro de Tharnowa haeredibus, aliis quam pluribus fide dignis etc.

Komentarz do fragmentu zapiski:
(Ex archetypo membranaceo, cum duobus sigillis cereis, taeniolis membra­naceis appensis. Sigillum primum coloris viridis exhibet scutum cum insigni Odrowąż et cum inscriptione in ambitu: ☼ s. barthossij † de gori iudicis ☼. Al­terum autem sigillum coloris albi exhibet scutum cum insigni Radwan, in cuius ambitu legitur inscriptio: S. Petri de Cz??kovice subiudic. — Nr. Archiv.Univ. 2054.)