Pełny podgląd zapiski o zdarzeniu dotyczącym edukacji i stopni naukowych

Fragment zapiski 1 , Numer strony/karty w źródle: 56

CCCCXVIII. Ordinatio executorum testamenti Stanislai Borek, decani Cracoviensis, de pauperibus scholaribus Universitatis Cracoviensis sustentandis.
Cracoviae, anno 1565, die 5. mensis Maii.

Fragment zapiski 2 , Numer strony/karty w źródle: 56

Martinus Isdbienski de Russiecz, archidiaconus Posnaniensis, custos et vicarius in spiritualibus generalis Cracouiensis, universis et singulis praesentium notitiam habituris et quos praesens tangit negotium seu tangere poterit quomodolibet in futurum, significamus, quomodo comparentes coram nobis et officio nostro reuerendi domini Mathias Drzewiczki Vladislauiensis praepositus, Petrus Porembski officialis generalis et Martinus Cromerus utriusque iuris doctor, canonici Cracouienses, executores testamenti reuerendi olim domini Stanislai Borek utriusque iuris doctoris, decani Cracouiensis, donationem anniversariorum censuum ducentorum octuaginta sex florenorum pecuniae usitatae, in diversis bonis immobilibus in vim redemptionis obligatorum una cum capitalibus summis ad septem millia et quadringentos florenos pecuniae pertingentibus, Almae Universitati et Academiae Cracoviensi ac eiusdem rectori pro tempore existenti, in usum ac sustentationem egentium et studiosorum scholasticorum factam et assignatam, nec non ordinationem certam perpetuo valituram, secundum mentem et voluntatem praefati olim doctoris Stanislai Borek, decani Cracoviensis, per eos constitutam, in scriptis exhibuerunt ac obtulerunt et eiusmodi donationem et assignationem ac alia in dicta ordinatione eorum contenta, omnia et singula ratificari, approbari et confirmari roburque auctoritatis ordinariae et firmitatis perpetuae decretum eisdem apponi, a nobis instanter

Fragment zapiski 3 , Numer strony/karty w źródle: 57

in iure suo per celerae approbationis et confirmationis decretum praeiudicare videamur, nostras ante omnia citationis in vim publici edicti seu cridae litteras contra omnes et singulos, sua ex adverso interesse putantes, praemittendas decrevimus. Cuius quidem donationis et ordinationis supradictae tenor talis est, ut sequitur: Nos Mathias Drzewiczki, Wladislauiensis praepositus, Petrus Porembski officialis generalis et Martinus Cromerus utriusque iuris doctor, Sandomiriensis et Visliciensis custos, canonicique Cracouienses, curatores et executores testamenti reuerendi et eximii olim domini Stanislai Borek utriusque iuris doctoris, decani Cracouiensis etc. pie in Christo defuncti, testatum facimus universis et singulis, quorum interest intereritve unquam quovis modo, quod cum ille ipse dominus Stanislaus Borek, decanus etc., in omni vita sua id potissimum studio habuisset, ut de quam plurimis hominibus ac de republica ecclesiastica regnique huius totius bene mereretur, compendiariam ad id viam esse existimavit, si bonae indolis iuvenum, qui aliis vicissim postea prodesse et ad ecclesiae ministeria reique publicae gubernacula recte admoveri possent, industriam conatusque ad capessendas honestas disciplinas omni ratione adiuvaret; cumque animadverteret, multis rem angustam domi obstare, quominus commode liberalibus studiis vacare et aliquo usque prodire queant, facultates suas honeste partas et ab aliis etiam relictas suaeque fidei concreditas, eo potissimum convertit ac census perpetuos partim ipse vivens emit, partim moriens nobis emendos mandavit, unde complures studiosi bonarum litterarum atque disciplinarum iuvenes in hac Cracouiensi Academia perpetuo sustentarentur. Quod quidem ita curatum est hactenus, ut census anniversarii in eam rem empti, ad summam trecentorum florenorum usitatae in hoc regno monetae et numeri, fere perveniant, quorum ratio haec est: Apud generosos dominos Ioannem et Laurentium Komorowskie fratres floreni quadraginta pro mille flor. pecuniae empti et in villis Krzessow et Sliemie coram Regia Maiestate et coram reuerendo domino Petro Miskowski, generali tunc in spiritualibus vicario Cracoviensi a. D. millesimo quingentesimo quadragesimo nono inscripti; apud dominum Balthasarem Porembski floreni quadraginta pro mille itidem flor. empti et in villa Halsnarowicze apud acta reuerendi domini Petri Porembski canonici et officialis generalis Cracouiensis a. D. millesimo quingentesimo quinquagesimo et coram iudicio terrestri Oszwięcimensi inscripti, apud Ioannem pellionem, Ioannem Zaborowski, Nicolaum Walker, Tobiam Fox et Martinum Kaczmarczik, cives Casimirienses, floreni quadraginta quattuor pro mille flor. empti et in domibus eorum apud acta eiusdem domini officialis et apud acta civilia eiusdem oppidi a. D. millesimo quingentesimo quinquagesimo secundo inscripti. Item floreni sexaginta pro florenis mille quingentis empti et in domo Carniowska in circulo Cracouiensi sita, apud eundem dominum officialem per dominum Ioannem Gliwicz a. D. millesimo quingentesimo quinquagesimo primo. Item floreni viginti pro florenis quingentis empti et in eiusdem domus medietate apud acta eiusdem domini officialis per eundem dominum Ioannem Gliwicz a. millesimo quingentesimo quinquagesimo quarto. Item floreni viginti duo pro florenis quingentis empti et in domo dicta Karlowicz, in platea s. Nicolai Cracouiae sita, per eundem dominum Ioannem Gliwicz apud acta eiusdem domini officialis a. D. millesimo quingentesimo quinquagesimo primo. Item floreni sexaginta pro florenis mille quingentis empti et in domo eiusdem domini Ioannis Gliwicz propria, ad acta eiusdem domini officialis a. D. millesimo quingentesimo quinquagesimo secundo inscripti, et omnes hi etiam in actis civilibus Cracouiensibus vel coram Regia Maiestate, quemadmodum nobis cum ipso olim domino Ioanne Gliwicz convenit, inscripti aut adhuc per haeredes et successores eius inscribendi. Item floreni quattuor apud Gabrielem sartorem, civem et consulem Casimiriensem et uxorem eius florenis centum empti et super domo eius ibidem apud acta civilia a. millesimo quingentesimo quinquagesimo septimo obligati. Item alii floreni quattuor apud Simonem Zawilek et uxorem eius cives Cracouienses, tantidem empti et in domo ipsorum apud acta Iuris supremi castri Crac. a. millesimo quingentesimo quinquagesimo inscripti. Quae summae omnes collectae faciunt

Fragment zapiski 4 , Numer strony/karty w źródle: 58

florenos septem millia sexcentos, census vero pro iis empti florenos ducentos nonaginta quattuor. Quibus omnibus censibus emendis accessit luculentus S. R. Maiestatis assensus et approbatio, ad universam hanc et ampliorem etiam summam sese extendens et iuri libertatique immunitatique ecclesiasticae adscriptio, quemadmodum videre est in authenticis litterarum monumentis ea de re conscriptis. Nos igitur voluntati supramemorati domini Stanislai Borek decani etc. innitentes, ac testamento eius satisfacientes, eos ipsos census una cum summis capitalibus dudum computatis, Almae Universitati doctorum, magistrorum, baccalaureorum et studentium sive scholasticorum Studii Generalis Crac. una cum rectore ipsius pronunc et pro tempore existenti, cum omni proprietate et iure donavimus et donamus, addicimus et appropriamus iure optimo sempiternoque sine ullo cuiusquam impedimento exigendos, percipiendos et in usum et sustentationem egentium scholasticorum seu studentium hoc, qui sequitur, et non alio modo perpetuo convertendos. Nimirum debebit pecunia ex huiusmodi censibus collecta, perpetuo in singulas septimanas distribui pro victu studiosis et honestis iuvenibus idoneis ad capessendas litteras et in grammaticis aliquousque iam progressis et exercitatis in hac urbe et Academia Crac. honestarum disciplinarum studio vacantibus, qui commode et sufficienter neque de patrimonio neque de beneficiis ecclesiasticis neque de quibusvis aliis censibus et proventibus sustentare se possint, nullo generis, conditionis aut nationis discrimine ita, ut ex aequo nobilium et plebeiorum, saecularium ac sacris initiatorum, externorum ac totius regni Poloniae indigenarum ratio ducatur, nisi quod maior tamen indigenarum et praesertim eorum, qui sunt vel erunt de genere ipsius domini Stanislai Borek ex masculina seu feminina linea, ratio haberi debebit. Nec erunt reiiciendi baccalaurei et magistri artium idonei et qui legendo ac docendo publice gratis prodesse studiosis Academiamque hanc ornare studebunt, aliam provisionem non habentes, ita tamen, ut magistri quaternarium, baccalaurei vero senarium numerum non excedant. Neque quicquam refert sive in aliqua bursa ii beneficiarii maneant, sive in Collegio, sive in schola, sive in hospitio saltim honesto, dummodo vestitu decenti scholasticaeque conditioni convenienti utantur, nec sint suspecti de aliqua haeresi aut apud suspectos habitent. Nec aliter quisquam suscipietur ad participationem huius beneficii, nisi horum, quae modo commemorata sunt, et insuper ingenii, studii, eruditionis, egestatis et honestatis sufficiens testimonium a praeceptore suo et aliis fidedignis hominibus ad curatores huius ordinationis, de quibus post dicetur, attulerit et probaverit iuraveritque etiam (si prius id in hac Academia non fecit), se in omnibus religionis articulis cum catholica et Romana ecclesia consentire, nec unquam ab ea scienter recessurum haereticorumque consuetudinem sedulo, quoad fieri poterit, vitaturum esse. Nec tamen hoc beneficium magistro vel sacerdoti nunquam ultra annum, baccalaureo ultra duos, studenti vero ultra tres annos impendatur, nisi iusta aliqua causa aliud suaserit. Numerabuntur autem in quamlibet septimanam singulis scholasticis quidem sive studentibus et baccalaureis sex grossi, magistris vero artium octo grossi ac tot suscipientur ad participandum hoc beneficio, quot sustentari censibus illis annuis poterunt, nihil reservando, exceptis quinquaginta florenis, qui quotannis de summa illa in certos usus inferius describendos seponentur. Et quoniam beneficium hoc partim utilitatis publicae gratia, partim ob salutem anime defuncti donatoris confertur, magister quidem, si quis utetur hac beneficentia, obligatus erit pro se quisque ultra aliam obligationem quamlibet sine ulla alia cuiusquam mercede qualibet commutatione in Collegio Maiori legere unam lectionem in artibus sive in philosophia sive in studiis humanitatis sive in Graecis aut Hebraicis litteris, pro sua quisque facultate et aptitudine curatorumque et rectoris iudicio; baccalaureus item quilibet diebus canicularibus et tempore Quadragesimae leget in eodem Collegio publice itidem pro facultate et aptitudine sua curatorumque et rectoris iudicio unam aliquam de his lectionibus: nempe Philosophiam Alberti Magni, Parvulum Philosophiae, Sphaeram materialem, Introductorium astronomiae, Musicam et Arithmeticam practicam, Computum ecclesiasticum, De accentibus

Fragment zapiski 5 , Numer strony/karty w źródle: 59

ecclesiasticis, Artem poeticam et Versificatoriam sive prosodiam, poema aliquod, Cosmographiam, Geographiam, Grammaticam Graecam vel Hebraeam. Quamdiu vero leget quisque sive baccalaureus sive magister, tamdiu augebitur ei pensio singulis septimanis duobus grossis. Quod quidem extendi volumus etiam ad studentes, si qui erunt praestantis doctrinae et in bursa seu schola aliqua aliquam de supradictis lectionibus non ex obligatione aliqua et sine alia mercede curatoribus iubentibus vel assentientibus praelegent. Caeteri vero beneficiarii qualibet studii commutatione ternas lectiones publicas audient, sacerdotes quidem in theologia duas, tertiam in artibus et philosophia sive in linguis Graeca sive Hebraica, alii vero studentes duas adminus in artibus et philosophia sive in linguis, tertiam quamcunque voluerint. Diebus autem canicularibus et in Quadragesima singuli binas audient in quavis facultate. Ad haec disputationes sive actus publicos sabbatis ac dominicis diebus frequentabunt et in iis pro diversitate gradus et profectus quinque vel ad minus quattuor problemata seu quaestiones et conclusiones qualibet commutatione sustinebunt; in fine autem commutationis a decano vel a praeceptoribus suis, magistris sive baccalaureis testimonia diligentiae suae tam in lectionibus, quam in disputationibus ad curatores afferent. Tam magistri autem et baccalaurei, quam caeteri participes huius beneficii singulis diebus dominicis sub obligatione conscientiae suae debebunt in templo sub tempus sacrificii seu missae pro anima donatoris devote orare antiphonam, Absolve Domine cum collecta pro sacerdote defuncto, quamdiu utentur hoc beneficio, vigilias vero trium lectionum cum laudibus singuli devote orabunt toties, quoties Universitatis missa pro defunctis mandato rectoris celebrabitur sive quater quotannis. Iustum est enim, ut gratitudinem quisque suam ostendat erga eum, a quo beneficium accepit vel accipit. Porro cum praeclarum sit studiosos non solum necessariis sumptibus sublevare, sed etiam aliquousque, ut aliis prodesse queant, provehere, si qui ex iis, qui huius beneficii participes erunt vel in defectu eorum alii studiosi eruditique iuven.es volent ad altiorem gradum promoveri, nec sufficientes impensas aliunde habebunt, dabuntur unicuique ad baccalaureatus quidem gradum promovende duo floreni, ad magisterii vero gradum quattuor floreni de quinquaginta illis florenis seponendis, quoad supererit aliis necessariis impensis, quae infra describentur. Caeterum nisi curentur haec a quopiam, subsistere ac durare ipsa per se non possunt; quae autem a multis curantur neque commode, neque recte fere perficiuntur, nec unus quispiam multis rebus curandis sufficit, duo esse debebunt peculiares huius totius negotii curatores, qui in commune census exigent ac dispensabunt ac universae huic ordinationi praeerunt et moderabuntur. Ac penes eos erit ius et potestas deligendi et suscipiendi eos, qui usuri sunt hac eleemosina, reiiciendique indignos ac decernendi conferendique promovendis subsidii. Quod si unus longius abfuerit vel accitus sine legittima excusatione adesse renuerit, alter habebit potestatem agendi et peragendi omnia supradicta. Ab aegroto tamen collega, si commode poterit, consilium et sententiam exquiret. Neminem autem ii suscipient ad participationem huius eleemosinae, nisi prius de paupertate ingenioque et studiis eius luculenta et fide digna testimonia susceperint et ipsi de progressu eius in litteris brevi examine cognoverint. Habebunt autem ii album sive matriculam perpetuam, in qua praenotabuntur singulis annis nomina ipsorum curatorum, deinde ascripta die suscepti nomen, genus et patria praeceptorque inscribentur. Suscepto et inscripto cuilibet statim exhibebitur haec ordinatio perlegenda, praesertim quantum ad ipsos beneficiarios attinet, ut sciat quilibet, quomodo se gerere debeat. Sic autem inscriptis qualibet septimana certo die curatorum alter dabit constitutam stipem. Quodsi quo casu pecunia defuerit, ea percepta postea solvi debebunt nihilominus unicuique retentae stipes vel septimanae. Diligens tamen opera adhiberi debebit a curatoribus, ne quando desit; in fine vero cuiuslibet commutationis convenient curatores accitisque beneficiariis exigent ab unoquoque testimonia diligentiae, sicuti superius dictum est, et quoad fieri poterit, per se vel quempiam subdelegatum examinabunt unumquemque obiter,

Fragment zapiski 6 , Numer strony/karty w źródle: 60

quem is profectum e qualibet lectione ceperit, magistrum vero quam lectionem ea commutatione publice praelegerit, similiter et baccalaureum Quadragesima et canicula. Quod si quisquam supradictorum aliquid demonstrare non potuerit, aut alioqui secundum ea, quae superius memorata sunt, reprehensibilis esse visus fuerit, admoneatur primum a curatoribus et admonitio illa in matricula annotetur; porro semel admonitus, si non correxerit peccatum suum, aut aliquid aliud huic ordinationi contrarium admiserit, multetur dimidio stipendio ad arbitrium curatorum; tertium vero delinquens privetur toto hoc beneficio deinceps sine ulla remissione et indulgentia et privatio pariter cum causa in matriculam inscribatur. Similiter etiam inscribatur, quando quis quavis alia de causa desinit uti hoc beneficio. Debebit etiam privari is, qui intermedio tempore sufficientem provisionem e beneficio vel officio sive aliqua alia ex causa nactus erit, et alius in locum vacantem suscipi. Quamvis autem pro tam pio labore praeclara merces a Deo optimo maximo curatoribus expectanda sit, tamen quia vulgo dictitatur »aggravat ille labor, quem praemia nulla sequuntur« habebunt curatores illi duo pro mercede quotannis sedecim florenos inter se dividendos; nec erit necesse dispensatoribus et exactoribus supradictis in lites et sumptus exigendorum censuum sive in quoscunque alios usus exequendae et conservandae huic ordinationi necessarios de suo quicquam impendere, sed de illis quinquaginta florenis in singulos annos seponendis, uti supra memoravimus, omnes impensae necessariae fient. Quamquam autem ipse dominus Stanislaus Borek, fundator huius beneficii, designavit alicubi, quosnam curatores esse vellet, tamen quia ipse id non perfecit vivens, verum deliberabat adhuc, moriens autem liberam et absolutam huius ordinationis et omnium rerum suarum potestatem nobis curatoribus et executoribus testamenti sui permisit, nos meliore deliberatione repensata per electionem in triennium curatores creari volumus ita tamen, ut si quis curatorum primo vel secundo anno curationis suae cesserit vel decesserit, in reliquum tempus alius in locum eius surrogetur. Eius autem electionis huiusmodi rationem instituendam esse duximus et instituimus, nimirum quod rector Universitatis cum seniore patre Collegii Maioris et decanis facultatum, adhibito etiam ad minus vno de nobis suprascriptis executoribus vel in defectu uno aliquo e praelatis vel canonicis ecclesiae cathedralis Crac., quem venerabile capitulum ad intimationem et requisitionem rectoris seu primorum Almae Universitatis deputaverit, habebunt perpetuum ius eligendi duos illos curatores atque dispensatores de numero doctorum et magistrorum Maioris et Minoris Collegii, quoscunque idoneos fore iudicabunt, in quo conscientiae ipsorum oneratae sunt, et ipsi autem electorum a se conscientias obligare debebunt, ut recte et secundum hanc ordinationem omnia administrent non declinando neque ad dexteram neque ad sinistram. Caeterum rectori satis alioqui negotiorum habenti curatio haec cum onere dispensandi nunquam mandari debebit, verum si quis post susceptam curationem rector creatus fuerit, poterit, si volet, curationem ad finem triennii sui continuare. Obnoxii autem erunt dispensatores et curatores reddere quotannis rationem administrationis suae rectori cum supramemoratis personis, ad electionem ipsorum pertinentibus. Quod si forte idem erit rector Universitatis et senior pater, unicam is personam in ratione et electione sustinebit, nec licebit ei quemquam pro se in alterum locum substituere. Debebit autem haec ratio et electio fieri constituto aliquo die intra Natalem Christi et festum Epiphaniarum et quo alacrius ad eam conveniatur ac diligentius ei intendatur, dispensatores et curatores huius ordinationis distribuent inter eos, qui de suprascriptis dominis rationi interfuerint, quattuor florenos sumptos de quinquaginta illis florenis seponendis. Circa rationem repraesentabuntur omnes participes huius eleemosinae et beneficii et ex matricula eorum nomina recitabuntur. Liberum autem erit praesidentibus rationi admonere, si quid circa delectum vel conservationem eorum animadversione dignum iudicarint. Ratione absoluta post tertium quemque annum novos curatores eligent et beneficiariis omnibus praesentibus commendabunt; poterit tamen iisdem curatoribus ad alterum atque etiam tertium triennium curatio

Fragment zapiski 7 , Numer strony/karty w źródle: 61

prorogari vel ambobus vel alteri, qui recte se prius in ea gesserit; quod si alterum de curatoribus cedere vel decedere quovis tempore contigerit, alter, si volet, solus nihilominus omnia peragat et exequatur usque ad proximam eius ipsius anni rationem, ibi tunc in locum vacantem ab iis, qui rationi intererunt, alius surrogabitur, qui reliquum illius triennii cum altero collega continuabit, nisi forte rectori cum decanis facultatum ac deputato venerabilis capituli aliter videbitur. Electis novis curatoribus curatores antiqui ordinationem hanc cum matricula et regestro et pecuniam, quamcunque habebunt residuam cum summa rationis factae ac diligentiis circa exactionem censuum, si qui forte soluti non erunt, factis, intra triduum tradere tenebuntur sub poena decem flor. rectori Universitatis irremissibiliter persolvenda, cuius duae partes ipsi rectori cedent, tertia vero huic eleemosinae et ordinationi apponetur; quod si in spatio duarum septimanarum horum quippiam non fecerit neque tradiderit, in duplo puniatur et sic deinceps duplicando poenam. Ad minus autem tantum pecuniae paratae tradi debebit novis curatoribus, quantum sufficere possit dispensationi ad id usque tempus, quo census alii solvi solent. Novi autem curatores accersent ad se beneficiarios et eos ad studia noviter prosequenda exhortabuntur et ordinationem hanc recitari curabunt. Deinde caetera exequentur ad officium suum pertinentia. Quod si quando aliqua difficultas vel dubitatio circa hanc ordinationem personasque ad eam pertinentes exorta erit, ad rectorem vel solum vel una cum pertinentibus ad rationem et electionem curatorum referetur; quod si ii negligentiores esse videbuntur, licebit reuerendissimo domino episcopo lociordinario aut venerabili capitulo ecclesiae cathedralis Crac., quorum protectioni secundum Regiam Maiestatem negotium hoc omne commendatur, autoritatem suam interponere et errata corrigere. Quo alacrius autem ipsum venerabile capitulum eam curam et protectionem suscipiat, sicut iam suscepit, habebit id potestatem duos vel tres iuvenes commendandi et praesentandi ad usum huius eleemosynae. Porro quod attinet ad census huius ordinationis, si quis venditor aut pensitator liberare se pensitandi onere voluerit, debebit sex mensium spatio curatores ea de re praemonere exactoque eo tempore et retentis censibus exolutis, summam capitalem in Collegio Maiori reponere; sic autem praemoniti curatores prospicient alium locum idoneum certumque eidem summae collocandae, ne censuum pensitatio interrumpatur, nec tamen id sine scientia et assensu rectoris, senioris patris de Collegio Maiori et venerabilis capituli facient nec censum ullum ement. Danda autem erit opera semper potissimum, ut apud aliquam communitatem saecularem vel ecclesiasticam seu praefectos monasteriorum et religiosorum conventuum, habentes bona haereditaria libera et nemini obligata, census huiusmodi ematur, adhibita diligenti cautione inscribendarum obligationum, quarum exempla autentica a curatoribus ad servabuntur et in regestrum ad hoc paratum inscribentur, ne qua postea difficultas in exigendo censu existat. Haec ita perpetuo, firmiter et inviolabiliter observari reuerendi domini rectoris moderni ac totius Universitatis consensu accedente, debebunt nec aliter supramemoratorum censuum summarumque donationem vigore executionis a nobis factam, ratam esse volumus.
Tandem anno et die infrascriptis, comparentes coram nobis iudicialiter supradicti reuerendi domini Mathias Drzewiczki, Vladislaviensis praepositus, Petrus Porembski, officialis generalis, et Martinus Cromerus, utriusque iuris doctor, canonici Crac. et praefati olim reuerendi domini doctoris Stanislai Borek, decani Crac. executores, litteras citationis in vim cridae per nos decretas, una cum executione illarum legittime facta exhibuerunt et contumaciam omnium et singulorum sua ex adverso ad donationem et assignationem censuum ac ordinationem suprascriptam interesse putantium, non comparentium neque illorum confirmationem impugnare curantium, accusaverunt ipsosque contumaces reputari et in eorum contumaciam, donationem et ordinationem suprascriptam approbari, ratificari et confirmari, illisque autoritatem ordinariam et firmitatem perpetuam apponi et addici debita cum instantia a nobis petierunt. Et ibidem in continenti in eodem iudicio constituti personaliter venerabiles viri Sigismundus a Stęzicza, iurisprudentiae doctor et Almae

Fragment zapiski 8 , Numer strony/karty w źródle: 62

Universitatis generalis Studii et Academiae Crac. rector, Sebastianus a Clepars s. litterarum professor, Cracovienses et Ioannes Turobinus iurisprudentiae doctor, Chelmensis canonici, suo et doctorum, magistrorum, baccalaureorum, scholasticorum ac totius Universitatis et Academiae Crac. nomine de speciali, ut dicebant, illorum voluntate ac consensu donationem, assignationem et ordinationem suprascriptam ac omnia et singula illius contenta, rata et firma habuerunt, iliisque expresse assensi sunt seque ac totam Academiam Cracoviensem ac posteritatem suam pro tempore futuram, ad observationem omnium et singulorum articulorum et conditionum in dicta ordinatione contentarum et specificatarum obstrinxerunt ac perpetuo obligatos et obstrictos esse voluerunt. Nos itaque Martinus Izdbienski de Rusziecz custos et vicarius in spiritualibus generalis Crac. memoratus, supradictos omnes et singulos sua ex adverso interesse putantes, citatos et non comparentes, reputavimus merito prout erant contumaces, et in eorum contumaciam donationem, assignationem censuum reemptionalium et ordinationem praeinsertam ac omnia et singula illius contenta, tanquam rite et legittime facta, in omnibus clausulis, conditionibus et articulis approbanda, ratificanda et confirmanda duximus, prout approbamus, ratificamus et confirmamus roburque autoritatis ordinariae et perpetuae firmitatis decretum desuper apponimus in Dei nomine per praesentes. Quae omnia et singula praemissa vobis omnibus et singulis, quorum interfuerit in universum intimamus, insinuamus et notificamus ac ad vestram et cuiuslibet vestrum notitiam indubitatam deducimus et deduci volumus praesentibus. In cuius rei fidem ac testimonium praesentes litteras fieri, confici ac per notarium nostrum infrascriptum subscribi sigillique nostri subappensione iussimus et fecimus communiri. Actum et datum Cracouiae die quinta mensis Maii a. D. millesimo quingentesimo sexagesimo quinto, indictione octava, pontificatus sanctissimi domini nostri papae Pii Quarti, anno sexto. Praesentibus nobilibus viris: Stanislao Wielzinsky, Martino Zielienski, Luca Starzęski, Stanislao Mrowiczki et Faelice Kosz testibus adhibitis.

Fragment zapiski 9 , Numer strony/karty w źródle: 62

(S. N.) Et ego Martinus Mathiae de Sandomiria, diocesis Crac. clericus, apostolica et imperiali auctoritatibus notarius publicus, quia omnibus et singulis praemissis, dum sic coram praefato domino vicario in spiritualibus generali fierent et agerentur, una cum supranominatis testibus praesens fui eaque sic fieri vidi et audivi, ideo praesentes litteras subscripsi et in hanc publicam formam redegi, signoque et nomine meis solitis ac consuetis et sigillo praefati domini vicarii generalis subappensione signavi et communivi in fidem praemissorum
omnium et singulorum, rogatus et requisitus.

Komentarz do fragmentu zapiski:
(Ex archetypo membranaceo, cuius sigillum avulsum. — Nr. Archiv. Univ. 912 S.).