Full view of a note about event related to functions/offices/roles

Note fragment 1 , Page/tab number in the source: 19

CCCLXXXVI. Divisio proventuum ecclesiarum parochialium in Korczyn et Proszowice inter rectores earundem ecclesiarum et professores Universitatis Cracoviensis.
Cracoviae, anno 1554, die 29 mensis Ianuarii.

Note fragment 2 , Page/tab number in the source: 19

In nomine Domini Amen. Per hoc praesens publicum instrumentum cunctis pateat evidenter et sit notum, quomodo anno a Nativitate Domini millesimo quingentesimo quinquagesimo quarto, inditione duodecima, pontificatus sanctissimi in Christo patris et domini, nostri domini Julii divina providentia papae tertii, anno tertio, die vero vigesima nona mensis Ianuarii, in mei notarii publici et testium infrascriptorum ad hoc vocatorum specialiter et rogatorum praesentia, personaliter constituti reuerendi et venerabiles viri domini Anthonius a Napachanie, decanus ecclesiae collegiatae s. Floriani in Cleparz et in Antiqua Corczin plebanus, et almae Universitatis Studii generalis Cracouiensis rector, Nicolaus a Shadek, canonicus Cracoviensis, Michael a Vislicia s. Floriani in Cleparz custos, Benedictus a Coszmin, archidiaconus Sandomiriensis et canonicus s. Floriani in Cleparz, s. theologiae, Adamus Mathlia in Luborzicza plebanus, Martinus Crokier Luceoriensis canonicus, iurium, Martinus a Croshna, medicinae doctores, Nicolaus a Budzissow et Ioannes Leopoliensis artium magistri, praefati domini rectoris consiliarii et facultatum decani, recognoverunt et publice fassi sunt, se anno proxime praeterito, die vigesima octava mensis Augusti unacum reuerendo domino Ioanne Przerembski, ecclesiae cathedralis Cracouiensis praeposito et regni Poloniae vicecancellario, tanquam per reuerendissimum in Christo patrem et dominum Andream Dei gratia episcopum Cracouiensem in locum suum surrogato, ad deliberandum et consultandum ac statuendum de dismembratione decimarum et aliorum proventuum ad ecclesias parochiales in Antiqua Corczin et Prossowicze inter lectores Universitatis, Maioris et Minoris Collegii Studii generalis Cracouiensis et dictarum ecclesiarum plebanos, iuxta litteras donationis dictarum ecclesiarum parrochialium Universitati Studii Cracoviensis per s. Regiam Maiestatem perpetuo factae, sigillo suae Maiestatis communitarum (s) et manu propria subscriptarum, per ipsum reuerendissimum dominum episcopum Cracouiensem et rectorem cum consiliariis suis ac decanis facultatum fuisse congregatos. In qua quidem congregatione, consultatione et deliberatione dismembrationem dictarum decimarum et proventuum praefatarum ecclesiarum in hunc, qui sequitur, modum deliberaverunt et statuerunt. Ita videlicet, quod decimas manipulares ex agris villarum Laka et Szedzislawicze excrescentes et ad praefatam ecclesiam in Antiqua Corczin spectantes, lectoribus Maioris et Minoris Collegii Studii generalis Cracouiensis perpetuo ascripserunt et appropriaverunt, plebano vero in praefata Corczin pro tempore existenti, decimas manipulares ex agris villarum Corczin et Zukowicze cum praedio, tabernatoribus, cmethonibus, hortulano, fluvio et quthowe in Nova Civitate Corczin reservaverunt. Ratione quarum decimarum et proventuum ipse plebanus in Corczin pro tempore existens, duobus vicariis per unam sexagenam et ministro ecclesiae in Corczin praefata per mediam marcam singulis quartualibus perpetuo solvere ac curam animarum habere perpetuo tenebitur et erit astrictus. Et quia aedificia ecclesiae, domus plebanalis, domorum vicariorum et scholae in praefata Corczin sunt attrita et deteriorata, ideo ipsi domini lectores ex suis decimis praefatis et dominus plebanus ex suis etiam proventibus annorum proxime praeteriti, praesentis et proxime futuri

Note fragment 3 , Page/tab number in the source: 20

singuli per decem marcas pecuniae pro aedificiis ecclesiae, domus plebanalis et domorum vicariorum ac scholae praefatae contribuere et componere debebunt, eritque summa sexaginta marcarum; in posterum vero ipse dominus pro tempore existens, praedicta aedificia aedificare et reparare iuxta dispositionem iuris communis semper tenebitur et erit astrictus. In Prossewicze vero plebano pro tempore existenti, pro praedio agrum seu ortum, pratum,
decimas manipulares ex agris praedialibus villarum Gniasdowicze et Sczithniki provenientes et censum ex quattuor domibus in Prossewicze perpetue ex huiusmodi dismembratione reservaverunt; decimas vero ex agris civitatis Prosseviensis et ex curia regali ac molendino Gorni dicto excrescentes, et ad dictam ecclesiam in Prossewicze spectantes, ipse plebanus et procurator Universitatis Studii generalis Cracouiensis pro tempore existens, manu coniuncta vendent et pecunia huiusmodi inter ipsum plebanum et lectores aequaliter dividetur. Pensionis vero annuae viginti quinque marcarum pecuniae, qua huiusmodi ecclesia in Prossewicze est onerata, plebanus medietatem et Universitas Studii generalis Cracouiensis alteram medietatem illi, cui de iure debebitur, solvet. Praeterea ipse plebanus et Universitas Studii generalis Cracouiensis domum plebanalem ibidem in Prossewicze ex proventibus solum anni praeteriti aedificabunt, de caetero vero ipse plebanus suis sumptibus propriis dictam domum aedificabit et reparabit. Super quibus omnibus et singulis praemissis dictus reuerendissimus dominus rector, doctores et magistri, consiliarii et decani petierunt et requisiverunt a me notario publico infrascripto, sibi fieri, confici et tradi unum, duo aut plura publicum seu publica instrumentum seu instrumenta. Acta sunt haec Cracoviae in Collegio Maiori dominorum theologorum, in habitatione praefati reuerendissimi domini rectoris, anno, inditione, pontificatu, die et mense, quibus supra. Praesentibus tunc ibidem discretis viris: Alberto a Schamotuli, bedello Studii Cracoviensis, Christophero Storzich de Cracovia et Georgio Gorzkowski, testibus ad praemissa vocatis specialiter et rogatis. — Subscriptio vero notarii publici infrascripti sub eodem instrumento sequitur et est talis: Et quia ego Caspar Iacobi de Nova Szmigrod diocesis Cracouiensis clericus et s. auctoritate apostolica notarius publicus, suprascriptis omnibus et singulis unacum praenominatis testibus praesens interfui, eaque omnia et singula praemissa sic fieri vidi et audivi, ideo hoc praesens publicum instrumentum manu alterius de mandato meo fideliter scriptum, exinde confeci, manu mea propria subscripsi signoque et nomine meis solitis communivi in fidem omnium et singulorum praemissorum rogatus et requisitus.

Comment to note fragment:
(Ex confirmatione Philippi Padniewski archidiaconi et Petri Myszkowski scholastici Cracoviensium de anno 1554. — Nr. Archiv. Univ. 8101).