Full view of a note about event related to functions/offices/roles

Note fragment 1 , Page/tab number in the source: 188

CCXCIII. Executores testamenti Mathiae de Kobylino S. Theologiae Professoris altare tituli S. Donati in ecclesia parochiali Cracoviensi S. Annae, cum adiuncto officio Professoris in facultate philosophica Universitatis studii Cracoviensis, fundant,
Cracoviae, Anno 1492, die 3 mensis Augusti.

Note fragment 2 , Page/tab number in the source: 188

In nomine Domini Amen. Ad perpetuam rei memoriam. Quoniam hic civitatem manentem non habemus, sed pergimus ad futuram: ideo inter caetera cordis nostri desideria ad haec praecipue nostra suspirat intentio, ut in hac vita misera fructum piis operibus comparemus, quo in futura Iudicis aeterni nobis vultum placabilem et ipsum Iudicem gratiosum utcunque sentiamus. Hinc est, quod nos Valentinus de Ilkusch Decretorum Doctor, Canonicus Cracoviensis, Andreas de Labyschyn Sacrae Theologiae et Decretorum similiter Doctor, Custosque collegiatae Sancti Floriani in Cleparz ecclesiarum, et Iohannes de Thulcze dictae ecclesiae Sancti Floriani sacrista, executores testamenti auctoritate ordinaria confirmati olim venerabilis et egregii viri Magistri Mathiae de Cobilino Sacrae Theologiae Professoris et lectoris ordinarii eiusdem in Universitate Cracoviensi, per eundem deputati et consignati, significamus tenore praesentium universis et singulis praesentibus et futuris, praesentiumque notitiam habituris: quomodo pro nanciscenda olim dicti Magistri Mathiae de Cobilino et suorum consanguineorum, amicorumque ac

Note fragment 3 , Page/tab number in the source: 189

nostrarum animarum salute et cultu divino augendo, ultimaeque voluntati dicti domini testatoris in testamento ipso inter caetera optatae et descriptae, ut tenemur satisfaciendo, ad honorem omnipotentis Dei, eiusque Genitricis intemeratae, Sanctorumque Mathiae, Floriani, Fabiani, Sebestiani, Cosmae, Damiani, Decem millia Martyrum, Valentini, Dorotheae et Donati, totiusque caelestis militiae praeconium et decorem, utque testamentum et ultima voluntas praefati domini testatoris debitae executioni, ut praetactum est, demandetur, de assensu et voluntate illustrissimi ac reverendissimi domini et domini nostri, domini Frederici Dei gratia electi confirmati Cracoviensis, domini gratiosissimi, ad hoc per nos impetrando, unum altare sub titulo et vocabulo Sancti Donati speciali in ecclesia parochiali Sanctae Annae in Cracovia, sub organo versus hostium posterius situm, nostro, praedictique testatoris nominibus, in nomine Domini fundamus, constituimus et locamus, dictoque altari, cuius spiritualia nequeunt sine temporalibus subsistere, annuum censum quatuordecim marcarum communis pecuniae et monetae usualis in Regno Poloniae communiter currentis, quadraginta octo grossos in quamlibet marcam computando, apud olim divae memoriae serenissimum dominum et dominum Kazimirum Dei gratia Regem Poloniae, Magnum Ducem Lithuaniae, Russiae, Prussiaeque dominum et haeredem, super macellis sutorum et ipsis sutoribus Cracoviensibus, pro Quingentis florenis seu ducatis Hungaricalibus boni et iusti ponderis, sub titulo redemptionis sive reemptionis, prout in literis dicti Regis super hoc confectis et sigillo regio munitis, clarius et expressius continetur, emptum et inscriptum damus, assignamus, demonstramus et perpetuo donationis titulo incorporamus, invisceramus et ascribimus, nihil iuris, proprietatis aut dominii nobis et nostris successoribus in eisdem censibus et pecuniis reservando, praeter ipsius altaris ius patronatus et praesentandi seu praesentationem et collationem, quae ad nos ad duas duntaxat vices, perpetuis vero temporibus ad venerabiles viros dominos Praepositum, Doctores et Magistros Maioris Collegii Artistarum Universitatis Cracoviensis pertinebunt et spectabunt pleno iure, et per dicti altaris erigendi altaristam seu ministrum infrascriptum pro tempore quoque per nos seu ipsos nostros successores praesentandum seu praesentandos, ad tempora in dictis emptionis literis specificata, a praefatis sutoribus Cracoviensibus seu alias a Procuratore Cracoviensi generali aut ipsius vicesgerente censum praefatum annuum exigendum, levandum et in usus beneplacitos convertendum plenam damus et praesentibus concedimus facultatem. Et quia cum sit naturae consonum, illos non recusare onera, qui rerum commoda complectuntur: praefati illustrissimi ac reverendissimi domini electi confirmati consensu adveniente, altaristam pro tempore existentem et per nos praesentatum ac praesentandum, ad duas missas duntaxat, unam de Sancta Cruce, aliam pro defunctis alias pro sacerdote, singulis septimanis perpetuis temporibus circa huiusmodi altare per se aut per alterum legendas, praesentandum vero sive praesentandos per dictos dominos Collegiatos Maioris Collegii Artistarum, qui extunc Magister in Artibus esse debebit et Collegio Minori Artistarum incorporari, ad dictas duas missas et lectionem unam in die in Philosophia vel in Artibus, quamcunque duxerit assumendam, legendum et actus ordinarios diebus sabbativis in ordine suo visitandum, oneramus et adstringimus postulantes per eosdem dicti Doctoris Mathiae animam in memoria habere. Praeterea postquam dictum censum quatuordecim marcarum redimi per serenissimum dominum Regem praefati domini Kazimiri olim

Note fragment 4 , Page/tab number in the source: 190

Regis Poloniae successorem legitimum, aut per quempiam ad id ius et potestatem habentem, cum id sibi licuerit, contigerit: extunc pecunia capitalis videlicet Quingenti floreni in manibus nostris et altaristae pro tempore existentis, si nobis vita comes fuerit; sin autem, extunc dominis Doctoribus et Magistris praefati Collegii Artistarum cum effectu reponi debebit et fideliter conservari in numero et pondere praeinsertis, donec in loco alio census huiusmodi forisatus fuerit et comparatus per eosdem. Vobis itaque illustrissimo ac reverendissimo in Christo patri et domino, domino Frederico Dei gratia electo confirmato Cracoviensi, eiusmodi fundationem et dotationem erigendam et confirmandam humiliter offerimus, porrigimusque, ad dictum quoque altare venerabilem dominum Magistrum Mathiam de Cobilino actu presbyterum, Collegiatumque Maioris Collegii Artistarum, praetacti testamenti coexecutorem, praesentamus instituendum et investiendum, humiliter petentes, quatenus huiusmodi fundationem et dotationem gratam habentes, ipsam admittere et huiusmodi altare confirmare, erigere et de novo fundare, illudque eum dicto censu ecclesiasticae libertati et emunitati cum interpositione auctoritatis ordinariae subicere pariter et protectioni, dictoque altari titulum et vocabulum videlicet Sancti Donati impertiri et intitulari, praefatumque praesentatum nostrum ad idem altare confirmandum per manus vestrae capiti suo impositionem instituere et investire dignaretur, regimen temporalium et administrationem spiritualium eidem committendo, prout id ad officium V. P. R. spectat, pastorale praemium propterea ab Altissimo receptura. Datum Cracoviae, die Veneris tertia mensis Augusti, Anno Domini Millesimo Quadringentesimo nonagesimo secundo, nostris sigillis praesentibus subappensis.

Comment to note fragment:
(Ex archetypo membranaceo, cum sigillo parvo cereo rubro, taeniola membranacea appenso. Sigillum exhibet scutum cum quodam insigni ignoto.— Nr. Archiv. Univ. 385.)