Pełny podgląd zapiski o zdarzeniu dotyczącym pełnionych funkcji/urzędów/ról

Fragment zapiski 1 , Numer strony/karty w źródle: 138

654. Iohannes Gerwasij de Sworcz dyocesis Albensis, studens Vniuersitatis Cracouiensis, et mgr. Iohannes de Crasna, Discreti Anthonij de ibidem, studentis eiusdem Albensis dyocesis, sui germani, nomine cauendo de rathihabicione eiusdem, ipse Iohannes de Sworcz, sentencie diffinitiue, superius in actis die Mercurij prima mensis Aprilis contente, ipse quoque mgr. Iohannes, apellacioni ab eadem sentencia per prefatum Anthonium, fratrem suum, interposite et eius prosecucioni renunciantes, expensisque et impensis ac fatigis parcere volentes, in Venerabiles viros, dnos mgros Mathiam de Cobilino, decanum et rectorem Alme Vniuersitatis, Stanislaum de Zawathka, s. theologie professores, canonicum s. Ffloriani in Cleparz, Mathiam de Costhen, s. Anne in Cracouia, Iohannem de Oswyanczim, sancti Nicolai extra muros Cracouienses ecclesiarum rectores, decretorum, Iohannem de Reguli, medicine, dres, Iohannem de Glogowia, arcium et aliarum prefatarum facultatum decanos, et Bernardum de Myanow, canonicum Sandeczensem, tamquam arbitros, arbitratores et amicabiles compositores, de alto et basso compromiserunt, renunciantes per expressum et scientes omnibus contradiccionibus iuris et facti, quominus laudum siue arbitrium, per eos faciendum et pronunciandum, suum debitum illico sortiretur effectum. Qui quidem dni arbitri, arbitratores prenominati, suscepto in ipsos propter bonum pacis arbitrio, huiusmodi sentenciam diffinitiuam arbitralem prefatis partibus presentibus et petentibus tulerunt in hunc, qui sequitur, modum. Cristi nomine invocato et ipsum solum Deum pre oculis habentes, pro tribunalj sedentes in causa presenti, inter Discretos dnos, Iohannem de Sworcz et Anthonium de Craszna, Vniuersitatis Cracouiensis studentes, coram nobis vigore compromissi, in nos libere facti, vertente, per hanc nostram sentenciam diffinitiuam arbitralem, quam de assensu dnorum coarbitrorum nostrorum ferimus in his scriptis, dicimus, decernimus, pronunciamus et declaramus omnes lites, inter partes exortas, extingwendas et mortificandas, mortificamusque et extingwimus easdem. Item pronunciamus et laudamus, quod prefatus Antonius dicto Iohannj soluat decem fflorenos, alias medium in sentencia, contra eum lata, sume ibidem expresse, infra hinc ad festum sancti Michaelis proximum. Quod si huiusmodi decem fflorenos sibi Iohanni soluere pro dicto termino recusauerit et neglexerit, extunc sentenciam diffinitiuam, de viginti fflorenis contra eum latam, saluam in toto fore volumus et ipsum ad parendum eidem obligatum fore decernimus. Item, ut hec nostra sentencia arbitralis sit firma et solida, penam centum fflorenorum interponimus et vallamus, parti tenenti huiusmodi sentenciam nostram per partem in toto uel

Fragment zapiski 2 , Numer strony/karty w źródle: 139

in parte contrauenientem irrefragabiliter persoluendam, sentencia nostra huiusmodj nichilominus in suo robore permanente. Item expensas huiusmodj factas compensamus. Lecta, lata et in scriptis pronunciata fuit hec nostra sentencia diffinitiua arbitralis per nos Bernhardum, canonicum prefatum, de consensu et annuencia nostrorum coarbitrorum, anno Dni millesimo cccclxxviij die Martis xxj Aprilis hora vesperarum in stuba superiori alba Collegij maioris artistarum, prefatis partibus presentibus et petentibus. Quam quidem sentenciam diffinitiuam arbitralem, sic latam, prefate partes in omnibus suis punctis, articulis et clausulis laudarunt, approbarunt et emologarunt penamque in eadem vallatam susceperunt per solennem manus suplicacionem, in manibus mei notarij infrascripti, facti huiusmodj scribe, factam. Presentibus ibidem Honorabilibus et Circumspectis dnis mgro Bartholomeo de Zneijna, collegiato in maiorj, Iohanne de Wyeliczka, causarum consistorij Cracouiensis procuratore, et alijs quam pluribus testibus fidedignis, ad premissa vocatis. Albertus Iohannis de Cleparz, facti huiusmodj scriba, subscripsit.