Full view of a note about event related to functions/offices/roles

Note fragment 1 , Page/tab number in the source: 60

CCLVII. Sixtus IV. Papa erectionem novi Collegii minoris Artistarum per Iacobum de Schadek Rectorem cum tota Universitate studii generalis Cracoviensis Anno 1476 die 26 mensis Aprilis factam, confirmat.
Romae, Anno 1478, die 11 mensis Iunii.

Note fragment 2 , Page/tab number in the source: 60

Sixtus Episcopus servus servorum Dei, ad perpetuam rei memoriam. His quae laudabili et provida circumspectione pro venustate et decore Universitatum studiorum ac personarum inibi literarum studio insistentium, facta et ordinata sunt, ut firma perpetuo et illibata persistant, cum a nobis petitur, libenter apostolici adicimus muniminis firmitatem. Sane pro parte dilectorum filiorum Rectoris ac salariatorum nuncupatorum Doctorum et Magistrorum Universitatis studii Cracoviensis nobis nuper exhibita petitio continebat, quod Rector, Doctores et Magistri praedicti de communi consensu et beneplacito dilectorum filiorum Scolarium Collegiatorum Collegii minoris in Universitate studii huiusmodi noviter erecti nuncupatorum, nemine eorum discrepante, nonnulla statuta et ordinationes sub certis modo et forma honorem et commodum Universitatis et Collegiatorum huiusmodi concernentia, fecerunt et ordinarunt, prout in quibusdam literis desuper confectis plenius continetur. Quare pro parte Rectoris, Doctorum, Magistrorum et Collegiatorum praedictorum nobis fuit humiliter supplicatum, ut statutis et ordinationibus huiusmodi pro eorum subsistentia firmiori, robur apostolicae confirmationis adicere, aliasque in praemissis opportune providere de benignitate apostolica dignaremur. Nos igitur qui literas praedictas inspici et examinari, ac omissis caracteribus et signis, de verbo ad verbum praesentibus annotari fecimus, huiusmodi supplicationibus inclinati, statuta et ordinationes praedicta ac prout illa concernunt, omnia et singula in eisdem literis contenta, auctoritate apostolica tenore praesentium approbamus et confirmamus, supplentes omnes et singulos defectus, si qui forsan intervenerint in eisdem, non obstantibus constitutionibus et ordinationibus apostolicis, nec non dictae Universitatis iuramento, confirmatione apostolica vel quavis firmitate alia

Note fragment 3 , Page/tab number in the source: 61

roboratis statutis et consuetudinibus, caeterisque contrariis quibuscunque. Tenor vero dictarum literarum talis est:

Note fragment 4 , Page/tab number in the source: 61

„Martinus divina patientia Abbas monasterii Clarae tumbae alias de Mogila ordinis Cisterciensis, diocesis Cracoviensis, nec non Iudex et Conservator bonorum et privilegiorum venerabilium, honorabilium et ingeniosorum dominorum Rectoris, Doctorum, Magistrorum, Baccalariorum, caeterorumque Scolarium et suppositorum almae Universitatis studii generalis Cracoviensis a Sede Apostolica specialiter delegatus, ad universorum notitiam deducimus per praesentes: quomodo coram nobis venerabilis vir dominus Magister Mathias de Cobilino Sacrae Theologiae Professor, Decanus ecclesiae collegiatae Sancti Floriani in Cleparzs extra muros Cracovienses et Collegiatus domus maioris Collegii Artistarum in Cracovia, personaliter constitutus, exhibuit et produxit certas privilegii literas reverendi patris domini Iacobi de Schadek Decretorum Doctoris, Canonici et Rectoris almae Universitatis studii Cracoviensis, sigillo maiori Rectoris praenominatae Universitatis, ab extra de communi, ab intra vero de rubea ceris, in pensula pergameni more consueto subimpendenti, sigillatas, in omnibus et per omnia salvas et integras, omni prorsus vitio et suspicionis nota carentes; in cuius sigilli medio Aquila sub imagine episcopali alis extensis sculpta apparebat, in circumferentiis vero eiusdem sigilli hae legebantur literae: Sigillum Universitatis Studii Cracoviensis generalis, Sanctus Stanislaus, Wladislaus Rex Poloniae. Quas quidem literas sic exhibitas et productas, praenominatus venerabilis dominus Mathias Decanus et Professor Sacrae Theologiae, suo et venerabilium et honorabilium dominorum Doctorum, Magistrorum et totius Universitatis studii Cracoviensis praefatae nominibus cavendo de rato petivit transumendas, transcribendas, trans exemplandas decerni et auctoritatem nostram iudiciariam interponi. Quarum privilegii literarum tenor de verbo ad verbum, nihil addendo et minuendo, sequitur in hunc modum:

Note fragment 5 , Page/tab number in the source: 61

„In nomine Domini Amen. Cum actus humani nullatenus in aeternitate subsistant, etc. Vide Nr. CCL.

Note fragment 6 , Page/tab number in the source: 61

„Nos vero Martinus Abbas, Iudex et privilegiorum ac bonorum Universitatis praefatae Conservator a Sede Apostolica specialiter deputatus praelibatus, praeinsertis privilegii literis diligenter revisis, auscultatis et collationatis, inventisque cum praesenti nostro exemplo seu vero transumpto in omnibus concordare, ac praelibati venerabilis Magistri Mathiae Decani petitionibus tanquam iustis, iurique et rationi consonis, annuentes, easdem privilegii praescripti literas transumendas, transcribendas decrevimus, transumimus et transcribimus in Dei nomine, auctoritatemque nostram interponimus per praesentes, volentes et decernentes, quatinus praesenti nostro transumpto plenaria fides in iudiciis et extra ubi alias exhibita fuerit, tanquam ipsae literae originales apparerent, adhibeatur. In quorum omnium singulorum fidem et testimonium ac robur praemissorum, praesentes nostras transumpti literas sive praesens publicum Instrumentum huiusmodi in se continentes, per Notarium nostrum publicum, causarum et facti huiusmodi coram nobis scribam infrascriptum, scribi et publicari fecimus, nostrique sigilli appensione communiri iussimus et mandavimus. Actum et datum Cracoviae in domo nostrae solitae residentiae, Anno Domini Millesimo Quadringentesimo septuagesimo octavo (sic), Indictione undecima, Pontificatus sanctissimi in Christo patris et domini nostri, domini Sixti divina providentia Papae quarti anno ipsius septimo, die

Note fragment 7 , Page/tab number in the source: 62

vero Mercurii sedecima mensis Iunii, hora Vesperorum vel quasi. Praesentibus ibidem venerabili et religioso ac discreto dominis Magistro Iohanne de Rathibor Baccalario formato Sacrae Theologiae, fratre monasterii praedicti, et Iohanne de Thulcze studente praefatae Universitatis studii Cracoviensis, et aliis compluribus fide dignis testibus ad praemissa vocatis et rogatis. Et me Alberto Iohannis de Cleparzs Cracoviensis diocesis, publico imperiali auctoritate Notario et coram memorato reverendo patre domino Martino Abbate, Iudice et Conservatore iurium, bonorum et privilegiorum praefatae Universitatis studii Cracoviensis a Sede Apostolica specialiter delegato, causarum et huiusmodi facti scriba, qui praedictis praeinsertarum literarum exhibitioni, transumpti petitioni et decreto, aliisque omnibus et singulis praemissis, dum sic ut praemittitur agerentur et fierent, una cum praenominatis testibus praesens interfui, eaque omnia et singula praemissa sic fieri vidi et audivi: ideo hoc praesens publicum transumpti Instrumentum huiusmodi manu propria scriptum exinde confeci, subscripsi et publicavi, in hancque formam publicam redegi, ac signo et nomine meis solitis et fieri consuetis, nec non sigilli appensione praelibati domini Iudicis et Conservatoris, de eius iussu et voluntate specialibus, consignavi et communivi, rogatus et requisitus in fidem et testimonium omnium et singulorum praemissorum.“

Note fragment 8 , Page/tab number in the source: 62

Nulli ergo omnino hominum liceat hanc paginam nostrae approbationis, confirmationis et suppletionis infringere vel ei ausu temerario contraire. Si quis autem hoc attemptare praesumpserit, indignationem omnipotentis Dei ac beatorum Petri et Pauli Apostolorum eius se noverit incursurum. Datum Romae apud Sanctum Petrum, Anno Incarnationis Dominicae Millesimo Quadringentesimo septuagesimo octavo, Tertio Idus Iunii, Pontificatus nostri anno septimo.

Note fragment 9 , Page/tab number in the source: 62

N. de Granfredis. — Io. de Sala.— A. Ingheramni.— N. de Castillo. — A. de Mucciatellis.— Rescripta.— D. Gallettus.— Io. de Regio.

Comment to note fragment:
(Signaturae ad latus et in dorso:)
(Ex archetypo membranaceo, cuius sigillum est avulsum. — Nr. Archiv. Univ. 12,516.)