Pełny podgląd zapiski o zdarzeniu dotyczącym pełnionych funkcji/urzędów/ról

Fragment zapiski 1 , Numer strony/karty w źródle: 45

CCL. Iacobus de Schadek Decretorum Doctor, Canonicus ecclesiae cathedralis Cracoviensis, Rector cum tota Universitate studii generalis Cracoviensis, inhaerendo conclusioni Anno 1449 die 18 mensis Octobris factae, novum Collegium minus Artistarum erigit.
Cracoviae, Anno 1476, die 26 mensis Aprilis.

Fragment zapiski 2 , Numer strony/karty w źródle: 45

In nomine Domini Amen. Cum actus humani nullatenus in aeternitate subsistant, nisi literis et testimonio probatissimorum sigillorumque robore et munimento

Fragment zapiski 3 , Numer strony/karty w źródle: 46

commendentur: nos igitur Magister Iacobus de Schadek Decretorum Doctor, Canonicus ecclesiae cathedralis Cracoviensis ac Universitatis almae Cracoviensis tunc Rector, una cum tota Universitate eiusdem studii, significamus universis et singulis praesentium notitiam habituris, lecturis et audituris: quomodo de Anno Domini Millesimo Quadringentesimo quadragesimo nono, Decima octava mensis Octobris, hora Tertiarum, in stuba maiori Collegii Artistarum facta omnium Doctorum et Magistrorum, promotorum videlicet et Collegiatorum, per scedulam consuetam convocatione sub poena non contradicendi, per Praepositum eiusdem Collegii Artistarum (Magistrum) Iohannem de Dambrowka, pro incremento eiusdem Universitatis Cracoviensis ex unanimi omnium et singulorum consensu et voluntate, nullo contradicente et quolibet ipsorum respondente per placet, uno quoque ipsorum singillatim requisito, conclusum est Collegium (minus) pro Minoribus Collegiatis erigendum. Cuius erectionis tenor sequitur in hunc modum. Quatinus Universitas praedicta in Collegiis diversis et personis distinctis et ordinatis instar aliarum Universitatum reluceat: fundamus, erigimus, disponimus, ordinamus, statuimus et nominamus Novum Collegium nostro Collegio Maiori vicinum, pro statu, repositione et inhabitatione Minorum Collegiatorum, quorum aliqui tres duntaxat etsi ex favore et gratia nostris, nostrorumque praedecessorum, promotorum videlicet et Collegiatorum regalium, specialibus, participium et communionem quoad habitationem et tabulam in Collegio Artistarum serenissimi Principis domini et domini Wladislai Dei gratia Regis Poloniae usquemodo obtinebant, quia tamen non de iure, ideo praemissa non poterant in perpetuum merito vendicare, cum dictum Collegium Artistarum pro promotis et Collegiatis regalibus duntaxat dinoscitur esse institutum. Quibus Collegiatis Minoribus domus in postico Maioris Collegii fuit lignea consignata ad inhabitandum, quae post breve tempus igne penitus fuit consumpta et incinerata: qua ex re dicti Minores Collegiati passim hinc inde in magnum dedecus Universitatis et laborum decrementum et in multam mali occasionem passim hospitia quaerere cogebantur; propter quod etiam multae et variae dissensiones, controversiae et lites inter illos et Maius Collegium imo verius totam Universitatem, quae nunquam quieta poterat esse, oriebantur. Proinde nos praenominatus Rector ad obviandum his malis et occurrendum et aliis, de quibus inpost timor erat, Anno Domini Millesimo Quadringentesimo septuagesimo quinto, die septima mensis Octobris, in Collegio Canonistarum facta omnium Doctorum et Magistrorum, ut assolet, salariatorum, ad quos spectat Universitatis ordinatio, convocatione sub poena non contradicendi, ex unanimi omnium tunc congregatorum voto et singulorum quolibet requisito singillatim et respondente per placet, ad sopiendas omnes lites et dissensiones, odia et rancores, conclusimus dandam et assignandam praedictis Minoribus Collegiatis domum muratam ibidem in postico Maioris Collegii, quae Bursa divitum dicebatur, ad inhabitandum, de qua Collegiatus domini Stobneri pro laboribus suis, quos in Astronomia faciebat, censum tollebat. In qua quidem domo omnes Minores Collegiati, qui tunc fuerant vel adhuc in futurum erunt, stare tenebuntur, praeter Pauperum Collegii Seniorem, qui praesens ibi semper esse debet propter multa, quae in Collegiis solent evenire. Quales Collegiati sunt aut tunc erant venerabilium et honorabilium dominorum Nowkonis, Stobneri, venerabilis Magistri (Martini) dicti Rex de Przemislia Doctoris Medicinae, dominae Katherinae Mazykonissae, Sancti Adalberti praebendarius, Nicolai de Brzesnycza

Fragment zapiski 4 , Numer strony/karty w źródle: 47

plebani olim ad Sanctam Annam, Magistri Iacobi de Zaborow, et Altarista altaris in ecclesia Omnium Sanctorum retro hostium siti, et duo Collegiati Magistri Iohannis de Dambrowka. Quorum quilibet ibi inhabitans magis se (h)abilem et idoneum faciendo ad hoc, ut ad Maius Collegium prius alio vocetur, hos labores, qui sequuntur, diligenter attemptabunt, ita ut Collegiatus domini Nowkonis legat Tullii novam et veterem Rhetoricas, Gamfredi Poetriam, Quintilianum de oratoria institutione, et alia quae ad Oratoriam spectant, exerceat. Stobneri vero Euclidem, Perspectivam, Arismetricam, Musicam, Theoricas planetarum, Alphoncii Tabulas, Algorismo praemisso Minutiarum, aut Resolutas, Eclipses quoque cum Minutionibus et farmaciis practicabit, intimabit et conficiet, Almanach quoque singulis annis Universitati praesentabit. Magistri Martini autem dicti Rex Ptolomeum in Quadripartito, Alcabicium, Centiloquium verborum Ptolomei, Albumasar et alios libros spectantes ad Astrologiam, Indicium quoque correctum et a senioribus in eadem facultate revisum et approbatum, Universitati singulis annis praesentabit. Mazykonyssae autem opera Virgilii, Ovidii, Statii, (H)oratii, Therentii quoque et Plauti Comedias aut alia Poetica; Nicolai vero de Brzesznycza Maius et minus volumen Prisciani, Modos significandi aut alia Grammaticalia; et idem intelligere volumus de Collegiato domini Zaborowsky, ita ut alternatim inter se tales lectiones Grammaticae distribuant. Alii vero praeter nominatos, ad unam duntaxat quamcunque lectionem in Artibus faciendam sint astricti, nisi plures legere voluerint, ita tamen quod singuli et expressas et non expressas lectiones per se et non per alium expleant, non obstantibus privilegiis quibuscunque in contrarium facientibus. Volumus etiam, quod singuli (ex eis) tripartiti ad morem Collegiatorum Maioris Collegii actus ordinarios Magistrorum diebus intrent Sabbativis per se, et ibi pro honestate Universitatis et sua, audientium quoque doctrina, arguant, et quod statutis et conclusionibus Maioris Collegii subsint et iuxta dirigantur illa et regantur. Ubi autem quilibet horum condignam suis laboribus mercedem videre et expetere debeat, facimus in hunc qui sequitur modum manifestum. Nowkonis censum habebit de domo ex opposito Sancti Andreae in platea Castrensi sita; Stobneri vero quia Domus Divitum, de qua prius censum habebat, omnibus in commune est consignata, ordinamus, decernimus et consignamus de consensu executorum et voluntate illi censum de una Collegiatura Dambrowczae, quae est decem marcarum; habebitque ultra illas decem marcas duas alias de quatuor, quas Domus Collegii Maioris Artis tarum de censibus villae Bosczyn tenebitur eisdem Minoribus Collegiatis in subsidium ad commune singulis annis offerre; gaudebitque his duabus marcis eo tempore, quo Almanach domui Collegii Maioris solet praesentare ad prandium sedentibus. Mazykonissae vero duodecim marcas a dominis Canonicis Sancti Floriani habebit; sed Nicolai de Brzesznycza decem marcas de pratis et (li)orto et piscinis circa Lobsow exquiret. Zaborowsky vero censum habebit de villa Szydzyna et omnia quae ibi provenerint emolumenta. Altarista autem ad Omnes Sanctos, Prebendarius Sancti Adalberti et alius Collegiatus domini Doctoris Dambrowczae et Senior Collegii Pauperum, iuxta dispositionem suorum privilegiorum census in locis descriptis habebunt. Insuper quatinus hi Collegiati Minores sic instituti possint in eadem domo honeste subsistere et onera eius ferre, ordinamus, statuimus et disponimus, ut Universitas ratione illius, quod his Collegiatis prius institutis sex marcas solvebat, et eius gratia quod domus Collegii Iuristarum sit in perpetuum a censibus libera;

Fragment zapiski 5 , Numer strony/karty w źródle: 48

de cuius tamen censibus obligabatur Universitas solvere censum Collegiato Stobneri, si quando sedecim marcas idem Collegiatus de Bursa olim Divitum plene habere non potuisset, det et offerat realiter cum effectu eisdem Minoribus Collegiatis pro festo Michaelis ad commune pro victualibus et aliis necessariis communibus quatuor marcas; Collegiati vero Maioris Collegii ratione eius, quod dicti Minores Collegiati Actus ordinarios diebus Sabbativis intrabunt, de censibus villae Bosczyna, quae ratione talium Actuum Magistris per Universitatem est tradita et condonata, pro festo Purificationis duas marcas similiter offerant realiter cum effectu, praeter illas duas, quas dare debebunt Collegiato in Mathematica. In cuius rei testimonium sigillum Rectoratus praesentibus est subappensum. Datum Cracoviae, feria sexta infra Conductum Paschae, Anno Domini Millesimo Quadringentesimo septuagesimo sexto.

Komentarz do fragmentu zapiski:
(Ex archetypo membranaceo, cuius sigillum est avulsum. — Nr. Archiv. Univ. 5602.)