Full view of a note about event related to functions/offices/roles

Note fragment 1 , Page/tab number in the source: 185

CLXXXIX. Literae Nicolai de Kalis Canonici et Vicarii in Spiritualibus generalis Cracoviensis, approbationem donationis testamentariae domus in Cracovia sitae pro fundatione altaris tituli S. Nicolai in ecclesia S. Annae, unius Collegiaturae in Minori Collegio Artistarum atque Bursae Hungarorum vel Almannorum, per Nicolaum Belonka de Nova villa d, 31 m. Maii A. 1452 factae, in se continentes.
Cracoviae, Anno 1457, die 3 mensis Martii.

Note fragment 2 , Page/tab number in the source: 185

In nomine Domini Amen. Nicolaus de Kalis Decretorum Doctor, Canonicus et Vicarius in Spiritualibus reverendissimi in Christo patris et domini, domini Thomae Dei gratia Episcopi Cracoviensis, generalis, nec non Iudex commissarius ad faciendum et exequendum infrascripta per ipsum dominum Episcopum vivae vocis oraculo specialiter deputatus, significamus tenore praesentium, quibus expedit universis, quorum interest seu interesse poterit quomodolibet in futurum: quomodo venerabilis Magister Nicolaus de Lanka Baccalarius formatus, Decanus ecclesiae collegiatae Sancti Floriani extra muros Cracovienses, praepositus et procurator domus Collegii Artistarum Cracoviensis, suo et aliorum omnium Doctorum et Magistrorum Collegiatorum studii Cracoviensis nominibus coram nobis et Notario ac testibus infrascriptis personaliter constitutus, tenens et habens suis in manibus testamentum infrascriptum per nobilem olim dominum Nicolaum Belonka de Nova villa alias de Nowa wesz, in et super domo sua ex opposito Minoris Collegii Cracoviae sita, ipsis

Note fragment 3 , Page/tab number in the source: 186

dominis Doctoribus et Magistris Collegiatis pro certo Collegiato sive altarista, prout in eodem testamento latius continetur, factum et conditum, in pergameno scriptum, eiusque vero sigillo ab intus de viridi, ab extra autem de communi ceris, in pensula pergameni subappensum, munitum et roboratum; in cuius quidem sigilli medio erat clipeus et in clipeo lilium scriptum seu sculptum, in circumferentiis autem eiusdem legebantur literae seu verba sculpta in hunc modum: S. Nicolai de Nova villa, sanum, salvum et integrum, non vitiatum, non abrasum, nec in aliqua sui parte suspectum: quod testamentum extunc recepimus de verbo ad verbum huiusmodi sub tenore:

Note fragment 4 , Page/tab number in the source: 186

„Reverendissimo in Christo patri et domino, domino Sbigneo miseratione divina tituli Sanctae Priscae sacrosanctae Romanae Ecclesiae presbytero Cardinali, Episcopo Cracoviensi, aut ipsius in Spiritualibus Vicario, Nicolaus Belonka de Nowa wesz reverentiam debitam cum honore filiali. Reverendissime pater et domine, domine gratiosissime! Sacra attestantur eloquia, quod licet Deus omnipotens omnia propter se creaverit, creatis tamen universis hominem praefecit, ipsiusque ditioni omnia et singula subiecit et potestati; quem etsi rectum fecerit et beneficio imaginis suae et similitudinis miro modo praeinsignivit, ipse tamen homo a suae institutionis rectitudine inimici seductus invidia declinavit miserabiliter et corruit. Eius lapsui et ruinae idem ipse Creator ex suae immensae pietatis et misericordiae visceribus compatiens, Unigenitum suum aeternaliter genitum misit in mundum temporaliter incarnandum, ut hominem praedictum rubricato suo sanguine redimeret, ut sic idem esset redemptor, qui extitit et creator. Cui pro tam immensae pietatis beneficio ipse miser homo non habet, quibus meritis respondeat, ratio tamen dictat, suadet virtus, exigit honestas et gratitudo pro gratia et benivolentia pro beneficentia, etsi non ex condigno, saltem utcumque de congruo rependat. Proinde ego Nicolaus Belonka animadvertens tanta erga hominem divina impensa beneficia, gestiens cunctis intimis meis desideriis, bonorum mihi ab Altissimo misericorditer creditorum dispensationem dignam facere et fidelem, et ad honorem, gloriam et laudem ipsius mei Creatoris et Redemptoris, a quo adhuc in spe retributionis aeternae praemium praestolor et expecto, ipsa bona mea temporaliter mihi ad usum ab eodem Altissimo data et concessa, pro posse testamentaliter et ultimae voluntatis irrevocabili deliberatione convertere, ordinare et disponere decrevi potissimum pro eo tempore, quo adhuc mei corporis pariter et mentis usus viget et ratio, quae plerumque nedum rerum temporalium cura et superflua solicitudo, verum etiam sui prius sinit ipsa languoris vehementia oblivisci; cupiens et huius inevitabile conditionis humanae debitum zelo caritatis ampliori, uberiori que pietatis studio praevenire, omnium virium mearum ex affectu ad opera cultus divini propensius prospiciens: ad honorem, gloriam et laudem omnipotentis Dei ac praecelsae Virginis genitricis eius, et specialiter in titulum Sancti Nicolai altare de caetero nominandum fundo, erigo, constituo et doto in ecclesia Sanctae Annae in Cracovia circa hostium in ingressu eiusdem ecclesiae ad partem sinistram; cuius quidem altaris ministro, qui pro tempore fuerit et ipsi praeficietur, ut spiritualibus intendens temporalibus sustentetur et relevetur, domum meam in Cracovia sitam in parochia dictae ecclesiae Sanctae Annae directe ex opposito Minoris Collegii Artistarum, prout in suis limitibus longe lateque extat distincta, do, dono, tribuo, confero, trado, approprio, inscribo et incorporo perpetuis temporibus cum omni iure, dominio et proprietate, veluti ad me pertinebat, pertinet et pleno iure dinoscitur pertinere, ea donationis via, iure, modo et forma, quae per

Note fragment 5 , Page/tab number in the source: 187

vivos sanae mentis et rationis testamentaliter et irrevocabiliter consuevit fieri, nihil iuris, dominii aut proprietatis pro me aut meis successoribus legitimis quibuscunque reservando, praeterea quodlibet ius prorsus et omnino ab eisdem et quibuslibet aliis, sive tales essent consanguinei, sive affines, sive quacunque alia societate proximi censeantur, etiam si esset persona matrimonialiter coniuncta, abrogando, et dumptaxat per ministrum et altaristam, qui pro tempore fuerit, altaris praedicti habendam, tenendam, possidendam, gubernandam, utifruendam, locandam et nunquam exaliqua causa vel ratione in toto vel in parte quomodolibet alienandam: dempto casu extremae necessitatis, quo aliter vitam meam non possem sustentare aut ducere, tunc liceret mihi fructus domus eiusdem vendicare solummodo in vita; post mortem autem cederet pro altaris ministro secundum formam praescriptam. Minister vero altaris praescripti domum praemissam tenebitur locare primum Hungaris pro Bursa, si saltem voluerint eandem inhabitare et si ipsorum sufficientia poterit haberi; qui si defuerint, erit pro Almannis sub diffinitis modis; alias in defectu horum omnium locabitur quibuscunque aliis personis. Quam quidem Bursam saepefatus minister alitaris per se poterit regere, aut si illi libuerit, poterit in Collegio Minori manere: erit enim Collegiatus de Minori Collegio, in quo cum caeteris Collegiatis eiusdem Minoris Collegii ordinem habebit iuxta suam vocationem et ordinationem super eo factam. Nihilominus ego Belonka interim quo vivo, reservo mihi posse et faculta,tem praedictam domum inhabitandi, responsurus tamen singulis annis de censibus ministro altaris saepedicti, quo alii responderent, si eam conducendo inhabitarent. Ipsum quoque altare et ipsius ius patronatus et praesentandi, disponendi, eligendi et ordinandi altaristam seu rectorem et ministrum altari praenarrato, do, dono, tribuo, confero, inscribo, approprio et incorporo venerabilibus viris Doctoribus et Magistris promotis et Collegiatis Collegii dumptaxat Maioris Artistarum almae Uni,versitatis studii Cracoviensis, qui quotiens cunque praedictum altare vacaverit aut vacare contingerit cedente aut decedente altarista ipsius, praenominati Doctores et Magistri promoti et Collegiati Collegii Maioris Artistarum personam idoneam, ut puta Magistrum Artium in altaristam altaris antedicti Loci ordinario aut eius Vicario ad instituendum perpetuis temporibus post decessum meum et providi viri domini Iohannis Lubarth civis Cracoviensis, quem ob singulare amoris vinculum horum bonorum, quae agentur in orationibus aut quibuscunque aliis salutiferis remediis pro anima mea et praedecessorum meorum, occasione dicti mei beneficii per me exhibiti cupio et volo esse participem, ut pro ipso uti pro me specialis memoria habeatur, habebunt potestatem praesentandi; nam interim quo vivo, aut dictus Lubarth, coniunctim et divisim, si unus ex nobis prius ab huius vitae luce migraverit, praesentandi sub nostris sigillis habebimus facultatem eum dumptaxat, qui per praefatos promotos et Magistros Collegii Maioris electus fuerit et ad praesentandum oblatus. Et quoniam frustra requirit emolumenta, qui refugit subire onera, cum beneficium datur propter officium: ideo altarista saepenumero nominatus tenebitur in qualibet (h)ebdomada per se vel per alium in ipso altari duas missas legere et celebrare per hunc modum, quod nobis duobus superviventibus, unam pro peccatis, alteram pro defunctis legere sit astrictus; nobis vero ab hac vita decedentibus, loco missae pro peccatis leget de Beata Virgine, ita tamen quod penultima collecta imponatur pro animarum nostrarum salute et requie sempiterna; insuper unum actum quolibet die legibili in Collegio Artistarum legendo aut exercitando, prout arbitrio Magistrorum

Note fragment 6 , Page/tab number in the source: 188

Collegiatorum magis videbitur expedire, laborare tenebitur. Quibus sic dispositis et ordinatis, opto ab Altissimo, quatenus pro his temporibus aeterna pro terrenis, coelestia pro transitoriis mansura consequi merear, quae ipse devotionis affectu sibi servientibus confert affluenter et largitur. Et cum iusta et pia petentibus non debeat deesse exauditio, eatenus supplicibus et votis studiosis quibus valeo, rogo et instantibus precibus postulo, quatenus V. R. P. mercedem ab Altissimo receptura, hoc opus pro honore, gloria et laude omnipotentis Dei et incremento Universitatis studii Cracoviensis per me conceptum, factum, ordinatum, dispositum et consummatum dignetur roborare, solidare et confirmare altare praenominatum, duce Deo perpetuis temporibus duraturum. Et ad evidentiam huiusmodi voluntatis meae et decreti pleniorem roborisque firmitatem praesentis meae donationis, fundationis et perpetuationis, sigillum meum duxi huic literae appendendum. Datum in Collegio olim serenissimi Principis Wladislai Dei gratia Regis Poloniae etc. et in habitatione venerabilis viri Magistri Nicolai Bylina de Lesczini Sacrae Theologiae Professoris, Canonici Sancti Floriani Collegiatae in Cleparz et rectoris parochialis in Strosziska ecclesiarum, in platea Sanctae Annae Cracoviae sito, feria quarta proxima ante festum Sanctae Trinitatis, alias ipso die Sanctae Petronellae, Anno Domini Millesimo Quadringentesimo quinquagesimo secundo. Praesentibus ibidem venerabili, honorabilibus et discretis dominis Magistro Nicolao Bylina Professore Sacrae Theologiae, Canonico et plebano praelibato, Alberto de Oppathow facultatis Artium Decano et Mathia de Slupcza Artium Magistris, Nicolao Stanislai Bylina de Lesczini Artium Baccalario, Derslao Michaelis de Carnicze clerico Posnaniensis diocesis, publico apostolica et imperiali auctoritatibus Notario, et Nicolao Alberti de Cozlye, clericis Gnesnensis, Cracoviensis et Vratislaviensis diocesum, testibus ad praemissa vocatis et rogatis in fidem et testimonium omnium et singulorum praemissorum."

Note fragment 7 , Page/tab number in the source: 188

Post cuius quidem testamenti exhibitionem, praesentationem et receptionem nobis et per nos taliter habitas et factas, fuit nobis per dictum Magistrum Nicolaum de Lanka praepositum et procuratorem debita cum instantia supplicatum, quatinus de mandato et voluntate speciali ipsius domini Nicolai Belonka testatoris ipsum testamentum in omnibus et singulis punctis, clausulis et conditionibus admitti, ratificari, approbari et confirmari ac immunitati ecclesiasticae incorporari et ascribi, ac alias omni meliori modo, via, iure, stilo et forma, quibus melius et efficacius potest et debet effici et exequi, dignaremur. Nos igitur Nicolaus Vicarius in Spiritualibus Cracoviensis et Iudex commissarius memoratus, dicti Magistri Nicolai de Lanka praepositi et procuratoris huiusmodi petitionibus utpote iuri et rationi consonis annuentes, quodque iusta petentibus non est denegandus assensus, volentesque praedictum Nicolaum Belonka testatorem in suo laudabili et favorabili proposito conservare et amplius certificare cupientes, viso ante omnia consensu serenissimi Principis et domini, domini Kazimiri Dei gratia Regis Poloniae et Magni Ducis Lithuaniae etc. in certa alia eiusdem Maiestatis litera speciali expressato ad dictum testamentum specialiter accedente et facto, ac certis nostris per edictum citationis literis in forma iuris contra omnes et singulos sua communiter vel divisim ex adverso interesse putantes, ad certos dies et terminos peremptorios competentes rite et legitime praemissis, ipsisque successive debite executis et in eisdem diebus et terminis per ipsum Magistrum Nicolaum de Lanka reproductis, ac contumacia eorum citatorum non com-

Note fragment 8 , Page/tab number in the source: 189

parentium accusata, eosque prout merito erat, contumaces pronuntiatos et in contumaciam ipsorum dictum testamentum et ultimam voluntatem in et per omnia in omnibus et singulis suis punctis, clausulis, capitulis et conditionibus auctoritate et mandato nobis taliter concessa, in nomine Domini, prout et quemadmodum in eisdem testamento et ultima voluntate supra praeinsertis continetur, habetur et cavetur, admisimus, ratificavimus, gratificavimus, approbavimus, confirmavimus et immunitati, iuri ac defensioni ecclesiasticae libertatis appropriavimus, ascripsimus et incorporavimus, ac tenore praesentium admittimus, ratificamus, gratificamus, approbamus, confirmamus, appropriamus, ascribimus et incorporamus, decernentes ex nunc ipsum testamentum et omnia in eodem contenta et hanc nostram confirmationem et appropriationem robur habere perpetuae firmitatis. Quibus omnibus et singulis praemissis auctoritatem nostram ordinariam, qua fungimur, interposuimus et praesentibus interponimus pariter et decretum. In quorum omnium et singulorum fidem et testimonium praemissorum praesentes nostras confirmationis et approbationis literas sive praesens publicum Instrumentum per Notarium publicum, causarum et facti huiusmodi coram nobis scribam subscriptum scribi, subscribi et publicari mandavimus, nostrique sigilli, quo communiter utimur, appensione iussimus et fecimus communiri. Actum et datum Cracoviae, sub Anno Nativitatis Domini Millesimo Quadringentesimo quinquagesimo septimo, Indictione quinta, Pontificatus sanctissimi in Christo patris et domini nostri, domini Calisti divina providentia Papae tertii anno ipsius tertio, die vero Iovis tertia mensis Martii, in domo nostrae habitationis in Collegio Iuristarum Cracoviensi, hora Tertiarum vel quasi. Praesentibus ibidem venerabili viro domino Iohanne de Pnyow Decretorum Doctore, Archidiacono Cracoviensi, et discretis Mathia Martini de Odolino psalterista, Nicolao Dobeslai de Przeweczerzino altarista Cracoviensi, Nicolao Cosmala de Woynicz et Iohanne Petri de Slup familiaribus domini Iudicis, Gnesnensis, Cracoviensis et Vladislaviensis diocesum testibus ad praemissa.

Note fragment 9 , Page/tab number in the source: 189

(L. S. n.) Et ego Iohannes Henrici de Schebnya clericus Cracoviensis, apostolica et imperiali auctoritatibus publicus Notarius, causarum et facti huiusmodi coram praelibato venerabili domino Nicolao Vicario in Spiritualibus Cracoviensi et Iudice commissario scriba, quia praeinserti testamenti praesentationi, receptioni et ratificationi, approbationi et citationum praemissioni, nec non decreti appositioni, aliisque omnibus et singulis praemissis, dum sic ut praemittitur, agerentur et fierent, una cum praenominatis testibus praesens interfui, eaque omnia et singula praemissa sic fieri vidi et audivi: ideo hoc praesens publicum ratificationis Instrumentum manu mea propria scriptum exinde extraxi, recepi et me hinc subscribens in hanc publicam formam redegi, signo quoque et nomine meis solitis una cum appensione sigilli dicti domini Nicolai Vicarii et Iudicis consignavi, rogatus et requisitus in fidem et testimonium omnium et singulorum praemissorum.

Comment to note fragment:
(Ex archetypo membranaceo, cum sigillo parvo cereo rubro, taeniola membranacea appenso. Sigillum attritum defert scutum cum quodam insigni.— Nr. Archiv. Univ. 5478.)