Blick im Eintrag über Funktionen/Ämter/Beschäftigungen

Eintragsabschnitt 1 , Seite/Karte in der Quelle: 156

CLXXV. Literae Sbignei (de Oleśnica) Cardinalis et Episcopi Cracoviensis ordinationem ultimae voluntatis atque fundationem Bursae Ierusalem in se continentes.
Cracoviae, Anno 1454, die 15 mensis Maii.

Eintragsabschnitt 2 , Seite/Karte in der Quelle: 156

Sbigneus miseratione divina tituli Sanctae Priscae sanctae Romanae Ecclesiae presbyter Cardinalis et Episcopus Cracoviensis, significamus tenore praesentium universis: qualiter attendentes, quod humanae fragilitatis conditio nullius certitudinem habet status et per temporum momenta ad horam extremam continue properat et decurrit, et per dierum praeteritorum transactionem consumptione quotidiana moriatur; et proinde convenit nos provida ordinatione de rebus omnibus, quas de ecclesiae nostrae Cracoviensis bonis sortiti sumus, disponere et illas in pietatis opera, quae promissionem habent vitae praesentis et aeternae, antequam dies ultima, quae non sinet omnia commendare memoriae, supervenerit, dispensare. Matura itaque deliberatione inter nos praehabita, non per errorem aut improvide, sed de certa nostra scientia testamentum et ultimam voluntatem nostram Statutis provincialibus apostolica auctoritate roboratis innixi condidimus, fecimus et ordinavimus, praesentiumque

Eintragsabschnitt 3 , Seite/Karte in der Quelle: 157

tenore condimus, facimus et ordinamus per articulos et capita infrascripta. Quod quidem testamentum firmum et illibatum esse volumus et decernimus, quacunque progressione aut varietate temporum non obstante; nec per annorum quorumcunque, si illos nobis Deus ad vitam ulteriorem concesserit et protelaverit, successiones illud in toto aut in aliqua sui parte infirmari, violari, sed perinde semper ratum, firmum et inviolabile esse volumus et censemus, ac si ipso mense aut die obitus nostri esset conditum atque scriptum. In primis animam nostram Omnipotenti Deo et gloriosae Virgini Mariae, Sanctae Priscae, Sanctisque Stanislao, Venczeslao, Adalberto, Floriano ac Omnibus Sanctis, totique caelesti (h)ierarchiae commendamus, orantes, ut carne soluta, per meritum Passionis divinae et Sanctorum suffragia et merita recipiatur in sedes aeternas. Item volumus, ut in civitate Cracoviensi in loco et domo Ierusalem per nos iam empto et liberato, de coctis lateribus erigatur Collegium seu Bursa, in qua sint quinquaginta camerae cum una camera magna pro rectore Bursae, stuba libraria, coquina, pro quibus perficiendis mille marcas communis pecuniae, ultra opus quod anno transacto perfectum est et pro quo ad minus mille marcas impendimus, assignamus. Item volumus, ut in eodem Collegio seu domo habitent studentes nobiles et plebei cuiuscunque conditionis aut nationis, ad minus centum, et quilibet in ingressu teneatur dare unam sexagenam pecuniae, nec ibi diutius poterit stare nisi decem annis. Ut autem studentes eiusdem Collegii per nos provisi diligentius studiis dent operam, omne argentum nostrum in scutellis, ciphis, picariis, credenciis, cingulis, portionibus, massis et quibuscunque vasis deauratis vel non deauratis, nihil excipiendo, quod habemus ad praesens vel in futurum sumus habituri, eidem Collegio donamus, volentes ut per executores ex argento huiusmodi census emantur perpetui praefato Collegio perpetuo applicandi, si in vita nostra illos nos ipsi non ordinabimus aut non coememus. Item omnes libros nostros in Theologia, Iure canonico et civili, in Philosophia, in Medicinis, in Artibus, in nostra libraria Cracoviae et ubicunque alias repositos, legamus pro dicto Collegio seu Bursa ad librariam eiusdem pro usu scolarium in catenis ferreis ad thecas reponendos. Item volumus, ut ducentae marcae communis per executores distribuantur pro viginti virginibus nobilibus in earum dotem et cuilibet decem marcae assignentur. Item volumus, ut omnia nostra vestimenta distribuantur virginibus filiabus fratrum domus nostrae duntaxat pauperioribus. Item omnia pecorum cuiuslibet praedii mandamus distribui, medietatem inter pauperes kmethones clavium in quibus huiusmodi praedia consistunt, medietatem successori relinqui. Item pro fabrica et perfectione ecclesiae Collegiatae in Bodzanczin de Kelcze transferendae, ultra impensam per nos in muratione eius anno praesenti factam, quingentas marcas communis assignamus et legamus. Item monasterio Sancti Francisci in Cracovia quinquaginta florenos; item monasterio Sanctae Trinitatis in Cracovia quinquaginta florenos; item monasterio Corporis Christi in Kazimiria quinquaginta florenos; item monasterio Sanctae Catherinae in Kazimiria quinquaginta florenos; item monasterio Sanctae Mariae in Arena triginta florenos; item monasterio Sancti Marci in Cracovia triginta florenos, ut missas tricesimales compleant, legamus et donamus. Item volumus, ut familiares nostri expediantur, et attento cuiuslibet merito detur cuilibet praemium et retributio, sexingentaeque marcae inter illos per executores dividantur. Item volumus, ut calix noster aureus, qui iam dispositus et paratus est, detur ecclesiae nostrae Cracoviensi pro perpetuo insigni et memoriali illic conservandus. Item eidem ecclesiae Cracoviensi

Eintragsabschnitt 4 , Seite/Karte in der Quelle: 158

Viaticum magnum consignamus. Item volumus, ut vicariis ecclesiae Cracoviensis dentur centum marcae, ut agant perpetuum anniversarium pro anima nostra. Item volumus, ut pro ecclesia Sanctae Mariae Sandomiriensi formae seu stalla ad chorum utriusque lateris de pulcro et notabili opere ordinentur et disponantur et impensa omnis per executores administretur. Item volumus, ut ex mille florenis, qui iam repositi sunt in thesauro ecclesiae Cracoviensis, morte nostra sequuta, celebrentur solennes exequiae in Sancti Floriani, Sanctae Mariae, Sanctae Trinitatis, Sancti Francisci et in cathedrali ecclesiis, et cuilibet celebranti offeratur unus grossus, vestiantur tricenti pauperes et residuitas in hospitalia in usus miserabilium personarum ad Sanctum Spiritum, ad Sanctam Hedvigim, ad Sanctum Leonardum, ad Sanctum Valentinum, et monasteriis Sanctae Trinitatis, Sancti Francisci, Corporis Christi, Sanctae Catherinae, Sanctae Mariae in Arena, Sancti Marci, pro legendis tricesimis convertantur et distribuantur et tricenta luminari a disponantur. Item volumus, ut currus in quo corpus nostrum ducetur, cum sex equis nos tunc trahentibus detur universitati vicariorum Cracoviensium. Item volumus, ut baculus cum armis et insigniis Papae, Regis et nostris, qui ante nos deferebatur, detur Universitati, et in eadem forma sine aliqua permutatione illic perpetuo servetur et maneat, quotiens opus fuerit, ante personas Rectoris et Universitatis deferendus et portandus. Item pro testudinando et ornando ambitu conventus seu monasterii Sanctae Crucis Calvimontis mandamus dari centum marcas. Item ecclesiae Sandomiriensi crismale argenteum legamus. Item ecclesiae Sanctae Mariae Sandomiriensi centum marcas in paratis; item eidem ecclesiae Sandomiriensi alias centum marcas in decimis clavis Zlothensis; item ecclesiae Sanctae Mariae Visliciensi centum marcas in paratis; item eidem Visliciensi ecclesiae alias centum marcas in decimis clavis Visliciensis assignamus et legamus. Item ecclesiae Sanctae Mariae Kelcziensi quinquaginta marcas; item eidem ecclesiae Kelcziensi alias quinquaginta marcas in decimis Kelcziensibus assignamus et legamus. Item thalamum de axamento cum Oponka texta in axamento flaveo et imagine Beatae Virginis duplici, tam texta in atlassio nigro cum literis Ruthenicis, quam picta in tabula opere Graeco; item nolam maiorem ecclesiae maiori Cracoviensi assignamus et legamus. Item ecclesiis parochialibus in Senno Wyelke, in Krampa, in Rymanow, in Dlotlicze, in Wyasd, in Strzelcze, in Wrzawy, in Ruschkow, detur cuilibet unus ornatus cum omnibus attinentiis ex purpura. Item volumus, ut omnes equi nostri dividantur et distribuantur inter nostros domesticos et continuos familiares. Item pro ecclesia in Oleschnicza ornatum de axamento nigro colore partito; item eidem ecclesiae cappam choralem de purpura, quae nobiscum in curia ducebatur, legamus. Item pro fabrica monasterii Sancti Bernardini ultra impensam per nos pro eodem monasterio anno praesenti factam legamus centum marcas pecuniae. Item omnia debita nostra parva et magna, antiqua et nova, apud quascunque personas spirituales aut saeculares qualitercunque mutuata aut obligata sive etiam quoscunque nostros tenutarios et officiales, committimus executoribus nostris exigenda et in usus iam descriptos et alios pios convertenda. Item medietatem praedii quod fuit relictum in Bodzanczin de omni genere frugum, monasterio Sanctae Crucis Calvimontis, medietatem acervorum in Zlotha monasteriis Sancti Iacobi et hospitalis Sancti Spiritus in Sandomiria, medietatem acervorum praedii in Pelcziska monasterio Pyandzicouiensi, medietatem acervorum in Xany, Bobrowo da et Kamyona monasteriis in Nova Civitate et Opathowyecz, medietatem acervorum praedii in

Eintragsabschnitt 5 , Seite/Karte in der Quelle: 159

Wssew monasteriis Praedicatorum in Bochnya et Fratrum minorum in Sandecz, medietatem acervorum praedii in Schweczechow monasterio Fratrum minorum in Zawichosth, medietatem praedii in Biskupicze monasterio Fratrum Praedicatorum in Lublin, medietatem acervorum omnium praediorum clavis Cracoviensis monasteriis Fratrum mendicantium in Cracovia et in suburbiis suis, et medietas omnium acervorum in praediis praedictis relinquatur successori. Item legamus ecclesiae parochiali in Biskupicze prope Lublin ornatum de purpura, item calicem argenteum deauratum, quibus utebamur circa curiam nostram. Item mandamus, ut ex cappa nostra rubea de czamletho paretur ornatus et cappa pro ecclesia Kelcziensi. Item mandamus, ut ex tectura lecti nostri rubei adamasci paretur ornatus et cappa cum cruce et pertinentiis pro ecclesia Bodzanczinensi. Item monasterio Clarae Tumbae alias Mogila relaxamus centum marcas communis pecuniae eidem mutuatas et mandamus crucem argenteam pro vadio positam reddi, ea tamen conditione, ut in eodem monasterio perpetuum nostrum agatur anniversarium iuxta literam obligationis Abbatis et conventus super hoc factam. Executores huius testamenti nominamus magnificos dominos Iohannem de Thanczin Cracoviensem, Iohannem de Oleschnicza Sandomiriensem Palatinos, venerabilesque dominos Iacobum de Senno Protonotarium apostolicum, Praepositum, Raphaelem de Skawina et Iohannem Dlugosch Canonicos Cracovienses. In cuius rei testimonium praesentes testamenti et ultimae nostrae voluntatis literas per Notarium publicum infrascriptum, nostrum et facti huiusmodi coram nobis scribam, subscribi et publicari, nostrique sigilli appensione iussimus communiri. Actum et datum Cracoviae in curia nostra episcopali, Anno Domini Millesimo Quadringentesimo quinquagesimo quarto, Indictione secunda, Pontificatus sanctissimi in Christo patris et domini nostri, domini Nicolai divina providentia Papae quinti anno octavo, die quinta decima mensis Maii, hora Vesperorum vel quasi. Praesentibus venerabilibus, honorabilibus et provido viris dominis Iohanne de Pnyow Decretorum Doctore, Archidiacono, Stanislao Roy Canonico Cracoviensibus, Daniele Sandomiriensi Canonico, in Thuchow, Laurentio ad Sanctum Stephanum in Cracovia, Marco in Lanky plebanis et Iohanne Theschnar cive Cracoviensi, testibus ad praemissa.

Eintragsabschnitt 6 , Seite/Karte in der Quelle: 159

(L. S. n.) Et ego Albertus Iacobi de Nova Civitate clericus Posnaniensis diocesis, publicus imperiali auctoritate Notarius, quia praedicti testamenti conditioni et ultimae voluntatis dispositioni ac executorum nominationi, aliisque praemissis, dum sic ut praemittitur agerentur et fierent, una cum praenominatis testibus praesens interfui, eaque omnia et singula sic fieri vidi et audivi: ideo praesentes literas testamenti, sive praesens publicum Instrumentum per alium fideliter scriptas et scriptum exinde confeci, publicavi et manu mea propria subscripsi, signoque et nomine meis in talibus fieri solitis consignavi, requisitus in fidem et testimonium omnium praemissorum.

Bemerkungen zum Eintragsabschnitt:
(Ex archetypo membranaceo, cum sigillo magno cereo rubro, filis lineis coloris rosei appenso. Sigillum formae ellipticae affabre sculptum, eiusdem typi ac sub Nr. CLXIV. — Nr. Archiv. Univ. 5747.)