Pełny podgląd zapiski o zdarzeniu dotyczącym pełnionych funkcji/urzędów/ról

Fragment zapiski 1 , Numer strony/karty w źródle: 127

CLXV. Sbigneus (de Oleśnica) Cardinalis et Episcopus Cracoviensis erectionem altaris tituli Omnium Sanctorum in Cracoviensi ecclesia parochiali S. Stephani per Stanislaum Durink executorem testamenti olim Petri Hirschberg mercatoris d. 14 Iulii A. 1451 factam, approbat.
Cracoviae, Anno 1451, die 16 mensis Iulii.

Fragment zapiski 2 , Numer strony/karty w źródle: 127

In nomine Domini Amen. Sbigneus divina miseratione tituli Sanctae Priscae sacrosanctae Romanae Ecclesiae presbyter Cardinalis et Episcopus Cracoviensis, ad rei memoriam sempiternam. Quoniam inter sollicitudines pastoralis officii nobis divinitus crediti nostra potissimum cura est, divini nominis cultum adaugere et animarum Christi sanguine redemptarum saluti possetenus providere: libenter profecto nostram his studiis auctoritatem impartimur, quibus huiusmodi cultus crescere creditur et animarum salus merito procuratur. Proinde universis et singulis quibus expedit, notum facimus per praesentes: quomodo in nostra constitutus praesentia in Christo devotus Stanislaus Petri Oleatoris de Cracovia alias Durynk executor testamenti olim providi Petri Hirsberg mercatoris de Cracovia, prosequendo executionem huiusmodi testamenti iuxta voluntatem eiusdem Petri testatoris, altari dudum ad laudem et honorem Dei Omnipotentis et Omnium Sanctorum Apostolorum in ecclesia parochiali Sancti Stephani in Cracovia dedicato et consecrato, alias per praefatum Petrum Hirsberg fundato et erecto, et pro ipsius altaris dotatione octo marcas census annui monetae et numeri Polonicalium per ipsum Stanislaum executorem in praetorio Cracoviensi et ipsius censibus, proventibus et reditibus apud dominos Consules Cracovienses pro Centum quadraginta marcis latorum grossorum de bonis dicti Petii Hirsberg per ipsum derelictis, sub contractu tamen reemptionis emptas et comparatas, prout de hoc nobis per literas patentes ipsorum dominorum Consulum Cracoviensium sibi Stanislao Durynk super dicto censu octo marcarum datas, plena fuit et est facta fides, certis et bonis conditionibus et cautelis, quibus huiusmodi census, non obstante reemptione, temporibus posset subsistere duraturis, adhibitis, dedit, donavit ac realiter et cum effectu assignavit, per ipsum altare et eius pro tempore altaristas habendum, tenendum, possidendum et percipiendum: prout et quemadmodum ex literis praefati Stanislai Durynk et per ipsum super huiusmodi dotatione et donatione confectis, coram nobis facto et realiter exhibitis, quarum tenor de verbo ad verbum sequitur et est talis, plenius constare poterit atque constat:

Fragment zapiski 3 , Numer strony/karty w źródle: 127

„In nomine Domini Amen. Quoniam in hanc lucem intrantes maiestatem Dei nostris offendimus malis, gratia indigemus, et unumquemque de hac luce translatum opportet ante terribile tribunal aeterni Iudicis praesentari, ut recipiat, prout gessit in corpore, sive bonum sive malum. Proinde ego Stanislaus Petri Oleatoris de Cracovia alias Durynk executor testamenti olim providi domini Petri Hirsberg mercatoris

Fragment zapiski 4 , Numer strony/karty w źródle: 128

de Cracovia, universis et singulis quibus expedit, notum facio per praesentes: quomodo in defectu praefati Petri Oleatoris patris mei carissimi et coexecutoris testamenti praedicti, de hac luce nutu divino iam sublati, prosequendo executionem eiusdem testamenti domini Petri Hirsberg, iuxta eius ultimam voluntatem octo marcas census annui monetae et numeri Polonicalium, in et super praetorio et ipsius censibus, fructibus, proventibus et reditibus universis civitatis Cracoviensis, apud dominos Consules Cracovienses pro Centum quadraginta marcis latorum grossorum de bonis praefati Petri Hirsberg per eum derelictis, sub conditione reemptionis et aliis expressis circa huiusmodi reemptionis contractum exprimi solitis, per me empti, altari ad laudem et honorem Dei Omnipotentis et Omnium Sanctorum Apostolorum in ecclesia parochiali Sancti Stephani in Cracovia dudum dedicato et intitulato, alias per ipsum dominum Petrum Hirsberg adhuc in humanis agentem fundato et erecto, et pro eius dotatione, ipsiusque dominis pro tempore altaristis et per eos a dominis pro tempore Consulibus Cracoviensibus exigendum, tollendum et percipiendum ac ad eorum usus beneplacitos convertendum, iuxta continentiam et tenorem literarum ipsorum dominorum Consulum desuper habitarum, do, dono et assigno realiter et cum effectu. Quos quidem dominos pro tempore altaristas eiusdem altaris astringo et obligo, prout et praefatus dominus Hirsberg principalis fundator ipsos obligare voluit et obligavit ad duas missas defunctorum pro anima ipsius domini Petri Hirsberg et in remedium salutis suae et suorum progenitorum, omniumque fidelium defunctorum, et per ipsos singulis septimanis cuiuslibet anni circa praedictum altare legendas et cum effectu perficiendas. Cuius quidem altaris Omnium Sanctorum Apostolorum in ecclesia parochiali Sancti Stephani praedicta ius patronatus et praesentandi mihi et posteris meis propinquioribus reservo temporibus duraturis, prout et praefatus dominus Petrus Hirsberg illud mihi cum dicto Petro Oleatore patre meo carissimo et coexecutore, cum omnibus nostris posteris propinquioribus, in editione dicti sui testamenti reservare voluit et reservavit, ita tamen, quod ad dictum altare, quotienscunque illius vacatio occurrerit, patroni personas bene meritas et approbatas praesentabunt et praesentare tenebuntur. Hoc etiam minime praetermisso, quod postquam praedictum censum per dominos Consules reemi contigerit, quod extunc domini pro tempore altaristae eiusdem altaris una cum patronis, receptis praedictis pecuniis, pro quibus dicti census, ut praefertur, fuerunt et sunt comparati, statim alios census in eadem vel maiori quantitate, temporales vel perpetuos, prout contigerit, fideliter emere debent et tenebuntur; alioquin si tales „census statim emi non possint, extunc pecunias praedictas tam domini altaristae, quam patroni, in continenti postquam ipsas a dominis Consulibus receperint, in una ladula sub duabus aut tribus clavibus, in certo et tuto loco, in praesentia dominorum Consulum Cracoviensium reponere debent cum effectu, nec ipsas aliquatenus de loco eodem movere, dividere aut mutuare, usque dum alii census pro eisdem altaribus et eorum altaristis fuerint inventi et comparati, ut tali cautela adhibita altare praedictum subsistere possit temporibus duraturis. Actum et datum in castro Cracoviensi, feria quarta proxima post festum Sanctae Margarethae, Anno Domini Millesimo Quadringentesimo quinquagesimo primo, meo sigillo praesentibus in fidem omnium et singulorum praemissorum subappenso. Praesentibus ibidem honorabilibus viris dominis Iohanne Dlugosch rectore ecclesiae parochialis in Clobuczsko, Iohanne

Fragment zapiski 5 , Numer strony/karty w źródle: 129

de Sthaaw et Mathia de Mileyow vicariis perpetuis canonicalibus ecclesiae Cracoviensis, et aliis circa praemissa testibus.“

Fragment zapiski 6 , Numer strony/karty w źródle: 129

Quapropter post dotationem huiusmodi et dictarum literarum exhibitionem praefatus Stanislaus Durynk executor testamenti praedicti Petri Hirsberg, nobis debita cum instantia supplicavit et supplicare curavit, quatenus fundationem, erectionem, dedicationem et dotationem altaris praedicti Omnium Sanctorum Apostolorum in ecclesia parochiali Sancti Stephani, sic ut praemittitur, factas, admittere, approbare, ra- tificare et confirmare, ac ipsum altare de novo erigere dignaremur. Nos extunc supplicationibus praefati Stanislai Durynk utpote iustis et favorabilibus paterne annuentes, praedictum altare in ecclesia parochiali Sancti Stephani in Cracovia ad laudem et honorem Dei Omnipotentis et Omnium Sanctorum Apostolorum temporibus perpetuis duraturum, pastoralis cura officii ad id incitati, in nomine Domini de novo ereximus et fundavimus ac etiam erigimus et fundamus, dotationem quoque ipsius ac donationem et assignationem census supradicti octo marcarum, ut praefertur, factas in omnibus et singulis punctis, clausulis et conditionibus admittendum, approbandum, ratificandum et confirmandum duximus et praesentium tenore admittimus, approbamus, ratificamus et confirmamus, ac etiam decretum et robur auctoritatis ordinariae in vim realis et perpetuae firmitatis apponimus, et insuper pro maiori cautela et subsistentia praemissorum, praedictum censum altaris Omnium Sanctorum Apostolorum praedicti iurisdictioni et tuitioni ecclesiasticae appropriamus et ascribimus, ut de caetero census ecclesiasticus nominetur et pro eius defensione ad forum ecclesiasticum recursus habeatur. Ius quoque patronatus et praesentandi eiusdem altaris, quotienscunque illius vacatio in antea occurrerit, praefato Stanislao Durynk et suis posteris propinquioribus reservamus, et altaristas eiusdem pro tempore altaris ad praedictas duas missas per ipsos, ut praefertur, cum effectu circa altare praedictum legendas et perficiendas sub poena excommunicationis astringimus et obligamus. Actum et datum in curia nostra in civitate Cracoviensi, decima sexta die mensis Iulii, Anno Domini Millesimo Quadringentesimo quinquagesimo primo, nostro maiori sub sigillo praesentibus in fidem praemissorum subappenso. Praesentibus ibidem venerabili et honorabilibus viris dominis Iohanne Dlugosch Custode Visliciensi et Canonico Cracoviensi, cancellario, Daniele rectore parochialis ecclesiae in Thuchow, thesaurario, Alberto Iacobi de Nova civitate et Bartholomeo Iohannis de Gorka notariis nostris, et aliis circa praemissa testibus.

Komentarz do fragmentu zapiski:
(Ex archetypo membranaceo, cum sigillo magno cereo rubro, filis sericis coloris rosei appenso. Sigillum formae ellipticae affabre sculptum, eiusdem typi ac sub Nr. CLXIV. — Nr. Archiv. Univ. 12,262.)