Pełny podgląd zapiski o zdarzeniu dotyczącym pełnionych funkcji/urzędów/ról

Fragment zapiski 1 , Numer strony/karty w źródle: 9

Quietatio, obligatio et evictio venerabilis olim viri M. Stanislai Marenii, maioris collegae, sanctae theologiae sententiarii, sancti Floriani canonici. Execurores testamenti.
Anno Domini MDLXXX, die Martis 11 Octobris. Coram magnifico domino Martino Pilsnensi, sanctae theologiae professore, canonico Cracoviensi et Wratislawiensi cathedralium et almae Universitatis Cracoviensis rectore, et ad acta rectoratus ipsius comparens personaliter providus vir Mathias Thwardi de villa Marzenino

Fragment zapiski 2 , Numer strony/karty w źródle: 10

subditus venerabilis capituli Gnesnensis, frater germanus venerabilis olim Stanislai Marennii, canonici Clepardiensis et Maioris Collegii Cracoviensis collegae, ultro ac libere recognovit et expresse fassus est, quomodo venerabilibus viris ac dominis Andrea Zielenski, Adamo Varesnensi et Blasio Golniensi, magistris Collegii Cracoviensis et executoribus testamenti praefati olim Stanislai Marennii testatoris, suo ac aliorum consanguineorum, videlicet Alberti fratris, Helizabeth, Annae [et] Zophiae sororum germanarum absentium nomine, vestes varias tam ex panno, quam alia quamvis materia confectas, nonnullas vulpinis pellibus subductas, deinde interulas seu, ut vulgo vocant vestes albas ex lino factas, praeterea lectisternia et plumatica in sarcinis duobus reconditas per praefatum olim testatorem eiusdem Mathiae Thwardi et Alberto fratribus, nec non Elizabeth, Annae [et] Zophiae, sororibus suis germanis praedictis, legatas, et aequali forte secundum illius extremam voluntatem testamentariam inter ipsos consanguineos dividendas, levavit et percepit iuxta inventarium, in quo ipsi domini executores sigillatim res praedictas, ad tollendas discensiones et iniurias, fides vero faciendam aliis fratri et sororibus, conscriptas, manibus suis subscripserunt et sigillis obligaverunt et idem inventarium Mathiae dederunt. De quibus omnibus et singulis supradictis levatis ex perceptis rebus praefatus Mathias Thwardy ipsos dominos executores quietavit et liberos misit quietatque liberos temporibus perpetuis, actu praesenti ad praemissa mediante. Et nihilominus praefatus Mathias Thwardi, quando quidem mandato et plenipotentia praefatorum Alberti fratris et Elizabeth, Annae et Zophia sororum absentium comparuit et res praedictas illorum nomine levavit a iure sua et iurisdictione quacumque recedendo et se iurisdictioni cum suis bonis omnibus incorporando inscripsit et obligavit se suoque successores in omnibus bonis suis mobilibus et immobilibus sub quacunque iurisdictione existentibus, nunc habitis et habituris in posterum, in summis pecuniariis acb iuribus ipsum quolibet concernentibus, quod res praedictas ad oppidum Wrzesnia advehet et ibidem apud aliquem amicorum deponet et easdem in praesentia famati domini Alberti Stuliszewski, civis Wrzesnensis, ad id vocati, praedicti consanguinei praefati olim Stanislai Marenii, aequali sorte seu alias ne eorum aliquis conqueratur et occasionem conquirendi habeat, inter se divident ac distribuent, qua divisione facta omnes coniunctim coram officio Wresnensi ipsos dominos exequutores quietabunt et extractum huius quietationis authenticum Cracouiam eisdem executoribus remittent, si reliqua legata ipsis percipere voluerunt. Praeterea praefatus Mathias Thwardy antequam praemissa divisio legittimum suum sortiretur effectum inscripsit et obligavit se modo suprascripto pernarratos dominos executores, occasione rerum praedictarum, ab omnibus impedimentis iuridicis vel non iuridicis personarum,

Fragment zapiski 3 , Numer strony/karty w źródle: 11

status et sexus cuiuscunque, praesertim vero consanguineorum praedictorum motis et movendis aliquando in quocunque foro et iurisdictione tueri, evincere et intercedere et ipsos occasione horum omnium si citati et vocati in aliquod iudicium ab ipsis consanguineis et amicis fuerint pro eisdem executoribus principalem debitorem, reum et evictorem ponere decretoque illius iudicio et iudicis parere neque eidem contradicere. Quam immo omnia praemissa tam in toto, quam etiam in parte adimplere sub vadio centum florenorum pecuniarum, numeri et monetae in Regno currentae, omnibus quibusvis defensionibus, exceptionibus, allegationibus, appellationibus, iuris et facti ignorantiae renuntiando, quibus se contra praemissa tueri, deffendere et eiusdem uti posset. Petierunt insuper partes utraeque eandem quietationem, obligationem et evictionem ad acta rectoratus per magnificum dominum rectorem praedictum inscribi et redigi, quod ex illius decreto obtinuerunt.