Pełny podgląd zapiski o zdarzeniu dotyczącym edukacji i stopni naukowych

Fragment zapiski 1 , Numer strony/karty w źródle: 271

CCXXVIII. Literae significatoriales Ioannis (Lutkonis de Brzezie) Episcopi Cracoviensis, recognitionem debiti 400 marcarum per Ioannem de Tenczyn Palatinum Cracoviensem apud Sbigneum (de Oleśnica) Episcopum Cracoviensem, Anno 1454 die 21 mensis
Martii contracti, in se continentes.
In Iłża, Anno 1470, die 8 mensis Angusti.

Fragment zapiski 2 , Numer strony/karty w źródle: 271

Iohannes Dei gratia Episcopus Cracoviensis significamus tenore praesentium, quibus expedit universis: quomodo ad instantem postulationem et petitionem venerabilis domini Iohannis senioris Dlugosz Canonici Cracoviensis, ut dicitur executoris testamenti olim domini Sbignei Cardinalis et Episcopi Cracoviensis, acta curiae nostrae episcopalis et coram olim praefato domino Sbigneo Cardinali Episcopo Cracoviensi, praedecessore nostro, tunc dum ageret in humanis, successive conscripta et acticata, in thesauroque nostro reposita, diligenter revolventes et recensentes, certam inscriptionem sive obligationem pro parte eiusdem domini Sbignei Cardinalis et tunc Episcopi Cracoviensis per olim magnificum dominum Iohannem de Thanczyn protunc Palatinum Cracoviensem principalem debitorem ac providos Iohannem Sweidniczer, Rynth, Walthec et Bartholomeum generum Wyrzinkonis Consules Cracovienses et pro ipso domino Iohanne de Thanczyn fideiussores praetextu Quadringentarum marcarum, ut ex eadem liquet inscriptione, per dictum dominum Iohannem de Thanczyn apud ipsum dominum Sbigneum Cardinalem et Episcopum in mutuum receptarum, factam et notatam comperuimus et invenimus huiusmodi sub tenore:

Fragment zapiski 3 , Numer strony/karty w źródle: 271

,,Cracoviae, vicesima prima Martii Anno Domini Millesimo Quadringentesimo quinquagesimo quarto, magnificus dominus Iohannes de Thanczyn Palatinus Cracoviensis, tanquam principalis, et providi Sweidniczer, Rynth, Walthec et Bartholomeus gener Wyrzinkonis Consules Cracovienses tanquam fideiussores pro eo manu coniuncta et indivisibili obligant se Quadringentas marcas per reverendissimum dominum Cardinalem eidem domino Iohanni Palatino mutuatas, pro festo Purificationis Sanctae Mariae proximo eidem domino Cardinali soluturos sub poenis excommunicationis, promittentes praefatum dominum Cardinalem nullo ingenio aut colore evadere nec aliquibus erga Suam Paternitatem uti cautelis, quae sibi obessent et ipsis prodessent. Praesentibus venerabilibus ac honorabilibus dominis Iohanne Dlugosz Custode Visliciensi et Canonico Cracoviensi, Magistro Iacobo de Schadek Officiali, Daniele Canonicis Sandomiriensibus, in Tuchow, et Marco in Kanthy plebanis."

Fragment zapiski 4 , Numer strony/karty w źródle: 271

Nos vero Iohannes Dei gratia Episcopus Cracoviensis memoratus iustis utpote et rationabilibus praefati domini Iohannis senioris Dlugosz executoris testamenti praescripti petitionibus acclinati, praedictam notam inscriptionis seu obligationis, ex huiusmodi domini Sbignei praedecessoris nostri, ut praefertur, actis acticatis transumi, transexemplificari et transscribi fideliter, nil addendo vel minuendo, quod facti sub-

Fragment zapiski 5 , Numer strony/karty w źródle: 272

stantiam immutaret aut variaret intellectum, sed praecise et directe quemadmodum in ipsius continebatur actis, praesentibusque de verbo ad verbum inseri iussimus et mandavimus, decernentes, quatenus huic transumpto nostro in iudicio et extra ac alias ubique locorum stetur, credatur, plenariaque fides adhibeatur ac si ipsa nota inscriptionis seu obligationis cum actis dicti domini Sbignei praedecessoris nostri originaliter exhibita foret et ostenta. In quorum omnium et singulorum fidem et testimonium praemissorum praesentes nostras transumpti literas sive Instrumentum publicum per Notarium nostrum, causarumque coram nobis scribam infrascriptum scribi et publicari mandavimus et nostri sigilli appensione fecimus communiri. Actum et datum Islza, Anno Domini Millesimo Quadringentesimo septuagesimo, Indictione tertia, Pontificatus Sanctissimi in Christo patris et domini nostri, domini Pauli divina providentia Papae secundi anno ipsius sexto, die vero octava mensis Augusti, hora Tertiarum vel quasi. Praesentibus ibidem venerabilibus et honorabilibus dominis Iacobo de Dominikowice Praeposito Visliciensi, Iacobo de Schadek Decretorum Doctore, Iohanne de Aurentow Cancellario, Canonicis Cracoviensibus et Iohanne de Land plebano in Siemunia, Notario Curiae nostrae, testibus circa praemissa.

Fragment zapiski 6 , Numer strony/karty w źródle: 272

(L. S. n.) Et ego Iohannes Andreae de Gorzyce clericus Posnaniensis diocesis, publicus imperiali auctoritate Notarius, causarumque et facti huiusmodi coram reverendissimo in Christo patre et domino, domino Iohanne Episcopo Cracoviensi memorato scriba, quia praedictis actorum revolutionum, notae inscriptionis repertorum transumpti decreto, aliisque omnibus et singulis praemissis, dum sic ut praemittitur, agerentur et fierent, una cum praenominatis testibus praesens interfui, eaque omnia et singula praemissa sic fieri vidi et audivi: ideo praesentes transumpti literas sive Instrumentum publicum ex actis praefatis olim domini Sbignei Cardinalis et Episcopi Cracoviensis huiusmodi inscriptionis notam fideliter trans- scribendo exinde confeci, manuque propria scripsi et hic subscribens in hanc publicam formam redegi, signoque et nomine meis solitis et consuetis una cum sigilli appensione praefati reverendissimi domini Episcopi Cracoviensis et de eius mandato speciali consignavi in fidem et testimonium omnium et singulorum praemissorum.

Komentarz do fragmentu zapiski:
(Ex libro manuscripto: „Iura et privilegia Universitatis Cracoviensis in copia ab Anno 1394 ad 1681“, in Archiv. Univ. sub Nr. 44 asservato, pag. 206.)