Pełny podgląd zapiski o zdarzeniu dotyczącym edukacji i stopni naukowych

Fragment zapiski 1 , Numer strony/karty w źródle: 263

CCXXIV. Rector et Doctores Universitatis studii Cracoviensis domum dictam Bursa pisarum in platea Canonicali per commutationem pro area in postico Collegii Artistarum sita, ubi olim synagoga Iudaeorum fuit, Capitulo ecclesiae cathedralis Cracoviensis resignant.
Cracoviae, Anno 1469, die 28 mensis Februarii.

Fragment zapiski 2 , Numer strony/karty w źródle: 263

Nos Iohannes de Lyathoszin Decretorum Doctor, Canonicus Sanctae Mariae Tharnoviensis, Rector, nec non Doctores et Magistri almae Universitatis studii Cracoviensis, significamus tenore praesentium quibus expedit universis ad perpetuam me-

Fragment zapiski 3 , Numer strony/karty w źródle: 264

moriam modernorum et posterorum: quod licet venerabiles domini Praelati et Canonici, totumque Capitulum ecclesiae Cracoviensis singulari zelo et affectione in Universitatem nostram et in eius commoda et profectus permoti, certam domum et aream in platea Canonicali seu Castrensi in civitate Cracoviensi, eundo ex castro in parte sinistra, et domui capitulari per dominum olim Nawogium de Thanczin Decanum Cracoviensem muratae contiguam, Universitati praefatae Cracoviensi pro recollectione et mansione studentium luris canonici donatione perpetua, cum consensu reverendissimi in Christo patris domini Sbignei tunc quidem Episcopi, expost vero Cardinalis Cracoviensis, per certas sui tenoris literas, eiusdem domini Sbignei et sui Capitularis sigillis communitas, donassent et inscripsissent, quae in diem hanc Bursa pisarum vulgari appellatione Grochowa bursa dicebatur; quia tamen domus ipsa sive Bursa pro angustia sui officinis correquisitis carens, plurium studentium non erat capax, et praefatum venerabile Capitulum Cracoviense situ illius et area pro erigenda ex coctili latere nova domo in provisionem suam capitularem et in perpetuum anniversarium praefati domini Sbignei Cardinalis et Episcopi Cracoviensis indigebat: quam quidem indigentiam nos habentes in prospectu, recepta in compensationem ab ipso Capitulo Cracoviensi legitima et iusta alia area in postico Collegii Artistarum sita, ubi olim Iudaeorum synagoga et hospitalia habebantur, per venerabiles dominos Iohannem seniorem et Iohannem iuniorem Dlugosch Canonicos Cracovienses, in quorum ditionem, titulum et proprietatem praefata synagoga et hospitalia iure perpetuo transiverant, hodierna die nobis in Iure terrestri resignata et in sexingentis marcis reformata, de praefata domo seu Bursa pisarum et illius area census, si qui in eadem essent quibuscumque personis spiritualibus seu saecularibus in quibuscumque iudiciis ecclesiasticis et saecularibus per nos aut alias personas quomodolibet inscripti et obnoxii, abolentes ex eadem area et in nos eosdem suscipientes, et a solutione illorum Capitulum ac possessores areae et domus eiusdem in totum liberantes, praefato venerabili Capitulo Cracoviensi non per errorem aut improvide, sed de certa scientia, cessione et renuntiatione perpetua et irrevocabili cessimus et renuntiavimus, cedimusque et renuntiamus per praesentes, nihil iuris, proprietatis, tituli aut dominii nobis aut successoribus nostris in domo eadem seu Bursa pisarum reservando, sed omne ius, quod nobis quomodolibet competebat vel competere potuit in praefata Bursa, in praefatum Cracoviense Capitulum transfundimus, literasque donationis, inscriptionis et collationis super eadem domo sive Bursa pisarum nobis concessas annullamus, cassamus, mortificamus et extinguimus per praesentes. In cuius rei testimonium sigillum nostrum praesentibus est appensum. Datum Cracoviae, die Martis, ultima mensis Februarii, Anno Domini Millesimo Quadringentesimo sexagesimo nono. Praesentibus venerabilibus et honorabilibus dominis Georgio Sworcz de Cracovia Decano Sanctae Mariae Sandomiriensi, Thoma Thrampczinsky Canonico Posnaniensi, Alberto de Nova civitate Decretorum Doctore, in Pyotrawin, Magistro Iohanne ad Sanctam Annam, Magistro Floriano ad Sanctum Stephanum in Cracovia, Iohanne de Schebnya in Rumpella, Bilina ad Sanctum Iacobum in Kazimiria ecclesiarum parochialium rectoribus et aliis quam pluribus fide dignis.

Komentarz do fragmentu zapiski:
(Ex archetypo membranaceo, cum sigillo maiori Universitatis Cracoviensis cereo rubro, funiculis sericis coloris albi, rosei et caerulei appenso. Sigillum eiusdem typi ac sub Nr. LXXXIV. — Nr. Archiv. Univ. 5781.)