Blick im Eintrag über Bildung/Akademichen Graden

Eintragsabschnitt 1 , Seite/Karte in der Quelle: 244

Anno Domini 1545, die vero septima septembris, convocacio dominorum doctorum atque magistrorum facta est, tali textu verborum: Egregie domine doctor et magister venerabilis. Sitis hodie hora quartadecima in cenaculo estivo maioris Collegii ad eligendum seniorem burse dominorum canonistarum, que post assecutionem alterius beneficii egregii doctoris Andree Strembosch senioris vacat et ad alia tractanda reipublice nostre litterarie statum condicionemque spectancia, sub pena non contradicendi. Detur omnibus dominis doctoribus atque magistris duntaxat salariatis. Convenientibus itaque ex more reverendis, egregiis ac venerabilibus dominis, rectore celebris Universitatis Cracoviensis, doctoribus atque magistris, ad electionem senioris processum est. Verum interea duo competitores se obtulerunt, Philippus scilicet Aher de Cracovia, canonicus Wratislaviensis (per sex annos a Cracovia absens), tum vero nescitur quo casu et fato huc appulsus hac vice sit presens, decretorum dumtaxat laurea et stemmate insignitus et simplex doctor, ac item Ioannes Thurobinus artium et iuris doctor, Institucionum imperatoriarum publicus professor. Hic nempe laboribus

Eintragsabschnitt 2 , Seite/Karte in der Quelle: 245

quotidianis, quos totos decem annos in celebri Gymnasio Cracoviensi celebriter legendo agebat et obibat, partim in rhetoricis, poeticis, philosophicisque, partim in iure civili superior, ille vero etate, alterum senium et intercessiones extranearum personarum, alterum eruditio et doctrina continuique et perpetui labores commendabant. Accesserat idque quod si Ioannes Thurobinus eligeretur in seniorem, quis tandem Institutiones profiteretur, nemo tum idoneus abilisque videbatur. Unde utrique ut consuleretur satisque fieret et Philippi senio intercessionibusque extranearum personarum et Thurobini meritis, maturo consilio et deliberatione media quedam adinventa est via atque ita unanimi dominorum doctorum ac magistrorum suffragio et consensu inviolabiliter conclusum et determinatum est quatenus dominus Thurobinus Philippum anteiret prioritateque ascensus ad ordinariam lectionem et consequenter [ad] alia beneficia, quocumque illa nomine vocentur, Collegii dominorum canonistarum merito gauderet. Interea autem in officio prelegendarum Institucionum tantisper ut perseveraret, dum aliquod predictorum beneficiorum Collegii iurisprudentum vacare contigerit. Dominus Philippus vero senioratu contubernii iurisconsultorum, dehinc tandem ascensu ad Collegium iurisperitorum post Thurobinum potiretur, hoc autem, ut magis integrum esset et ne quid turbarum ob eam maxime rem postea alias in futurum excitaretur, uterque competitorum singillatim advocatus et adhibitus, in presentia tocius Universitatis dominorum doctorum et magistrorum. Quod factum conclusumque est, ratum et gratum apud se esse dixit acceptumque tulit specialiter tamen Philippus Aher, instante Ioanne Thurobino et futura previdenti iuri, quod contubernii iuristarum seniori ex privilegio quomodolibet competit in eadem dominorum doctorum et magistrorum corona hactenus renunciavit renunciaturumque apud acta domini rectoris et lociordinarii, in quantum opus fuerit, bona fide promisit, domino Iacobo de Kleparz, theologie doctore, illius fidem et integritatem animi publice commendante. Presentibus venerabilibus et eximiis dominis Ioanne Piotrkoviensi, Anthonio de Napachanye, Nicolao Shadek, decano sancti Floriani, sacre pagine, Adamo de Cracovia, Andrea Strembosch, decretorum respective doctoribus, magistro Stanislao Budzinski, notario publico, ad id vocato et assumpto, Adamo de Shamothuli et Nicolao, bedellis celebris Universitatis Cracoviensis, ad premissa testibus fidedignis.